Harei 26.7, sa-ai kamei L.T.T (daok di tinh Ca Mau) mai tal jabat kong an khan ka bruk mek hu taong phone meng lek taka so oh krein khan lac anek likei di sa-ai angan H.M.K (umo 18 thun) tavak sraiy 700 trieu dong blaoh pandar baoh sang bayar 350 trieu dong jien pabuh. Nyu jeng gham lac ba K nao tapa Campuchia. Page harei hadei, K gilac mai sang gilac njauk dom kol bleik pagat lac kong an gham lac hu pambuak tal jalan talei rao jien, pandar pabak taong abih khau di drei saong tai khoan gilang pariak, gam haong nan pandar K klaik jien dan saong ameh drei piah payua ka kol nyu.

Di Ban raya Can Tho, kapul polih kong an hu daong paklah hu ka 2 urang mabuh tame bruk “co klaik meng online” piah blah jien. Biar harei 11.7, sa rahra daok di phuong Cái Răng ba anek kamei mai sa sieu thi di dalam ban hu mbaok tame uan harei ndih tapui, min 2 tuk hadei di nan, ong mek hu bruk taong phone padaong meng anek kamei saong payua angan lek piah ong cuak ayut angaok zalo. Kol bleik pathau khan lac daok khik anek ong saong pandar caga 60 trieu dong jien pabuh, meyah oh ngak tui ye pablei anek ong tapa Campuchia. Tal tuk 23 harei 11.7, kapul ngak bruk duah anek kamei di sa hotel di phuong Ninh Kieu, Ban raya Can Tho.

Jeng dalam bilan 7, Bilik Polih hinh su An Giang pambuak haong Kong an xa Phú Tân saong xa Phú An ngak cambaih laih 2 bruk pachot pagat blah mek drap ar jien padai meng jalan ngak yau nan. Dom kol bleik cuak ayut haong dom adei anek saih blaoh taong phone pagat lac Kong an, ndom lac dom adei hu pambuak tal bruk “Chot pagat atau bruk pablei jru phil tapa negar” saong pandar dom adei brei ngak tui tacei ba, meyah oh ngak tui lac njauk daok guk.

Kol bleik cap ndok dom adei tame app "ZOOM WORKPLACE", kol nyu pabak ma angan ID piah tame kapul chat. Hadei tuk urang tame app ye njauk blah mek bruk pandar phone, pandar taong abih khau tin, tai khoan mang xa hoi, tuk ini urang dalam baoh sang oh meda pambuak hu haong dom adei.

Dahlau di nan, kapul karja di Ha Noi, Quang Ninh, Ban raya Ho Chi Minh daong paklah hu rilo anek saih, sinh vien njauk kol bleik ngak ja Kong an polih, pandar dom adei ngak ja bruk klaik mek, hadei nan pandar amaik ame payua jien pabuh anek. Bruk pambuak, gham dom urang jeng dak harei dak sanak jak saong dom kol bleik bhian kuhria tal dom urang sit thun umo oh ka hu rilo ilamo dalam raidiuk.

Trung ta Trịnh Phi Hùng – Akaok kapul polih pacang caga, pasang duah iek kol duas, Bilik Polih hinh su Kong an Ban raya Can Tho caik hatai, kol bleik taong tame hatai di urang pambuak haong ilamo kong nghe piah ngak bruk chot pagat. Meng akaok meti lac ba tabiak khau tin ja blaoh gham ngak ka urang srau kadau, var glai. Hadei nan pandar urang tame hotel, oh pambuak tal gah langiu, baoh sang, padam atau oh pang phone blaoh gam gam ngak kateik geik meyah urang oh ngak tui ye njauk mek kareik, meng nan urang tok thau ngak tui bo oh khin sahaneng hagait.

Jabat Kong an polih oh ngak bruk tapa phone, tapa mang xa hoi, oh pandar payua jien piah duh ka bruk pasang duah iek. Tuk gaok bruk ini meda sahaneng hu lac bruk chot pagat. Tuk hu urang taong phone mai pathau khan lac drei njauk duas, hu harak pandar mek,… ye brei kajap jalan sahaneng, juai huac hagait; oh pabak khau tin di drei, tai khoan gilang pariak, ma OTP, oh payua jien; oh ba drei daok karei, tame hotel saong ngak ja yau drei njauk klaik mek tui bruk pandar di kol bleik. Gam tui baoh sang tuk tok hu khau tin anek bik njauk klaik mek ye brei pambuak jabat Kong an polih piah pambuak saong hu tacei ba, oh ngak tui pandar di kol bleik./.