Daok cang taduan jru hadei tuk pasang iek ruak, dalam khan ao daok bak gluh, ong Đoàn Thanh Phương, palei Hội Phú, xa Tuy An Đông, tinh Dak Lak brei thau hadei klau harei gaok ia sua trak, ong srap gap bruk ramik sangpiah nao pasang iek ruak hadei tuk thau hu kapul bac si meng tinh Dong Nai mai daong.

“Biak thau dhar phol dom jabat ngak pahla, karja, tuk blaoh khol dahlak tuk hajan ia sua tok thau kajal di angaok tada sang min, taong abih sang danaok jeng lahik abih. Hadei di mbang ia sua praong yau nan dom kapul ngak pahla hu brei kaya alin, rivang tangi saong karja, dom jabat hu daong pasang iek ruak, brei jru nan biak thau dhar phol.”

Pan kadung jru cawao bahrau tok mek blaoh, amuk Lê Thị Hương daok di phuong Đông Hòa, tinh Dak Lak brei thau ka drut druai tuk hu dom y bac si meng biak atah, mai tal labik ini daong sangka iek glang prein yava.

“Pang mahit kapul meng ban raya Ho Chi Minh mai pasang iek ruak ka rahra khol dahlak biak bui sambai, dom bac si saong urang ngak bruk biak abih hatai tian, dui ba mikva yaok kadha. Dahlak biak thau phol, biak drut druai.”

Thac si, bac si Chuyen khoa II Nguyễn Trọng Nghĩa, Phaok Yam ndok Sang iek ruak Uranaih Dong Nai brei thau tok dalam 2 harei ngak bruk di xa Hòa Mỹ saong Tuy An Đông, tinh Dak Lak kapul pasang iek ruak jaik 1.500 mbang rahra, dalam nan hu uranaih rilo meng lac njauk dom ruak haok ia idung, pandiak rup, lavng lavaih; urang praong ye gaok rilo ruak langiu kalik, darah tagok glaong, tung guel saong njom anek ruak kayua mbaih mbaoh.

“Kapul drei srap gap biak tani tanat, drei ba sa kapul bac si dalam nan hu bac si pasang iek ruak ka uranaih, bac si ka urang praong, bac si daong samar chip saong sa radaih daong samar chip, 1 radaih pajeng kaya. Bruk pasang iek ruak di drei hu ginup jru. Dalam jru hu 2 kapul: sa kapul lac 1 ribau kadung jru brei ka yaok baoh sang hu brei alin yau jru pandiak rup, patrun pandiak rup, patrun pandik, aih caraoh… Kadung jru yang dua lac jru ba tui piah pasang iek ruak brei harak angan jru.”

Gam haong pasang iek ruak saong taong ruak, gah Y te tinh Dak Lak brei caik dahlau bruk ngak hacih sa-at labik daok hadei ia sua. Dom kapul ngak bruk samar di So Y te pambuak saong kong an, bol lin saong karja patui veik pataom hareik harom, am cuh klak atau athur, ngak hacih sa-at – pahacih ia pandar. Di dom labik ia tathuak, janih hoa chat pametai halak haling hu pruh gam gam piah patakik bruk mbuan rah tabiak jit ruak. Bingun ia hu rao hacih meng Cloramin B; bruk pasang iek dom ruak pambak yau pandiak tabiak darah, aih caraoh, ndaih baoh tangin takai pabah hu brei ngak rilo.

Bac si Châu Trọng Phát, Phaok Yam ndok Pasak Pasang iek ruak hakik tinh Dak Lak brei thau:

“Yaok harei khol dahlak hulin padang meng 5 tal 10 kapul, peih bruk trun dom palei. Langiu di bruk pathau khan daong bhap bini dalam bruk ngak havih sa-at labik daok, caga ruak khol dahlak jeng patagok dom jalan ngak pasang iek piah duah mboh dom jit ruak mbuan tamuh tabiak. Taphia nan khol dahlak hulin jeng tacei ba rahra dom jalan langyah piah hu halau ia hacih jeng yau pathau khan ka bruk ngak hacih sa-at kaya mbang ka rahra di dom labik dalam bhum palei.”

Meng bruk tame ngak samar chip di gah Y te bhum palei gam haong bruk daong samar chip di kapul bac si dom tinh, tal ini hu labaih 5.000 mbang rahra urang di dom xa bhum gaok kan kandah di ia sua di tinh Dak Lak hu pasang iek ruak, taong ruak saong brei jru. Dom kapul y te mai tal palei jeng langyah ka prein yava, tacei ba sangka di sang saong daong kaya y te njauk hu, daong rahra patakik jit ruak, pasiam bruk daok dang saong tani tanat raidiuk hadei ia sua./.