Di xa Bình Thành, tinh Tay Ninh (huyen Đức Huệ, tinh Long An klak), dom harei tapa, hatai bui sambai hu mboh cambaih laih di angaok mbaok dom urang diuk rai di labik tapen negar tuk hu raok taduan dom baoh sang bahrau daok mbau hồ ngak sang bahrau. Tui amuk Lương Thị Mỹ ini lac bruk hu angan makna dalam raidiuk, brei mboh bruk salih hadei tukvak atah daok dalam baoh sang klak pak, taik tahak. Amuk Mỹ ndom meyai lac:

“Karja daong sang daok pacang pandiak pacang hajan, biak bui. Ngak baoh sang urak ini daok mathik klik, banah daok veik nyim mesraiy ngak blaoh bayar rah rah. Harei raya, kapul karja puk palei, xa jeng blei kaya alin. Drei kathaot min kham merat ngak jeng ginup piah mbang, oh hu kurang hagait”

Daok sa-ai Huỳnh Phúc Bảo – sa di dalam dom urang sit thun umo padang bruk ngak di bhum taneh tapen negar Bình Thành, baoh sang bahrau lac bruk peih akaok camreip ka sa jalan tani tanat saong patagok suai atah. Sa-ai brei thau baoh sang sa-ai hu mai meng Bến Lức tagok diuk rai di ini hu labaih sa thun, min oh ka hu kein lagaih padang sang. Sa-ai Bảo brei thau lac labik diuk rai di ini ngak ka sa-ai mboh sahnang hatai.

Tay Ninh ieu lac sa baoh bhum taneh hu angan brei ka quoc phong an ninh, ngan haong jalan tapen negar atah labaih 369km taphia Negar Campuchia. Dalam tinh Tay Ninh hu salah blaoh 46 labik rahra tapen negar hu 564 baoh sang, taong abih jien buh tabiak labaih 111 ty dong.

Ong Phạm Ngọc Sinh, Urang dang akaok Mban Pato tacei Bol lin xa Mỹ Quý brei thau: kapul rahra bol lin tapen negar tuk halei jeng pambuak khang haong kong an saong Bol lin Bien phong piah ngak bruk pacang khik tapen negar, pacang caga kol duas, pablei menuac urang, pablei dauk tapa negar.

"Daong pacang khik an ninh tapen negar ye rilo meng lac pambuak haong dom gah saong rahra. Danak dak di Quan khu ba rahra nao tal tapen negar, padang dom labik daok rahra taphia tadai bol lin rahra, daong thau hu bruk daok rah tabiak jeng yau lac patagok kinh te bhum tapen. Dom baoh sang rahra ka tapen negar hu ngak tabiak bruk mbang ngui."

Dom baoh sang tui bruk Labik daok rahra tapen negar hu taneh praong meng 80-100 m². Yaok baoh sang Quan khu 7 daong 100 trieu dong, tinh daong 75 trieu dong, banah daok veik kayua baoh sang rik daong. Yaok baoh sang tuk taduan sang daok hu alin tivi 32 inch, thaik Wa Ho, hala dok Taneh ia saong dom kaya alin karei.

Dalam majam bruk ngak pahadar 80 thun Harei Kapul lin Pan phao karaong Quan khu 7, thun 2025, Bo Tu lenh Quan khu pambuak UB Bhap bini tinh Tay Ninh peih pakak saong jao veik 69 baoh sang tapen negar hu taong abih jien buh tabiak jaik 12 ty dong. Thieu ta Trần Vinh Ngọc lambaok ka Quan khu 7 brei mboh hatai caong mikva patui veik kham merat patagok kinh te, ngak meda di angaok bhum palei; hu mbaok tame dom danak dak di bhum palei, jum tangin padang dom xa tapen negar dak harei dak meda, siam mekre; padang baoh sang trei sir, haniem phol:

"Ini lac danak dak brei mboh anit ranam, bruk ngak, bruk tahau dhar phol di kapul lin pan phao karaong Quan khu gam haong rahra dalam bhum, dalam nan hu bhap bini bhum tapen negar tinh Tay Ninh, lac bruk hadah gheih di hatai gul pataom bol lin rahra, bruk jum pataom di taong abih bangsa. Gam haong nan lac bingun piah kapul lin pan phao karaong Quan khu jum tangin daong prein gam haong mikva rahra chreih chrai srap gap raok sa bal pataih bahrau bui sambai, trei sir, anit ranam saong haniem phol."

Dalam luac jalan 80 thun padang, mesuh saong praong tagok, Kapul lin pan phao karaong Quan khu 7 patui veik brei mboh bruk di drei lac labik pambak karo kajap di rahra, daong ngak jeng dom bhum tapen negar ginup meda, tani tanat, salamat – labik yaok urang jeng hu diukrai, rik daong saong pagam suai atah saong bhum palei./.