Jaik meteh bilan blaoh, tal mon 8 tuk page, di Balai Y te xa Lâm Tân gilac chreih chrai sap uranaih pasram luai ia. Dom adei meng 6 tal 15 thun chreih chrai ba drei tame tal bac karo salamat dalam Danak dak pacang caga mblung ia.

Anak meta khol dahlak hulin lac dom mbaok meta biak chreih chrai. Hadei dom bruk mbeik rup, dom adei dak gauk trun danao pasram luai ia saong ngan haong bruk tacei ba abih hatai tian di gru pato. Kamuan Trần Huỳnh Quốc Thoại, anek saih tal bac 3 di Sang bac Tieu hoc Lâm Tân 1 hu ba drei tame tal bac luai ia, brei thau: “Anek bac hu 7 var paje, cei gru pato nan urak ini anek hu thau caluai ia ha sit ha sit paje.”

Tal pato luai ia di Balai Y te xa Lâm Tân daok dalam Danak dak “Daong peih ngak dom bruk siam lagaih saong karo kajap piah caga, pacang mblung ia ka uranaih” kayua Kapul Campaign for Tobacco-Free Kids, Nagar Amirik daong brei. Danak dak ini pamaong tal jalan ngak paglaong ilamo, bruk ngak di karja, kapul, sang bac, baoh sang saong bhap bini dalam bruk pacang caga mblung ia; gam haong nan patakik tal tuk biar abih dom bruk njauk rambuac saong metai kayua mblung ia di uranaih.

Danak dak brei pato magru luai ia brei ka 4.400 uranaih dalam umo 6-15 thun di 8 xa, phuong dalam nan hu: xa Vĩnh Lợi, xa Phú Lộc, xa Lâm Tân, xa Lai Hoà, xa Vĩnh Hải, phuong Vĩnh Châu, phuong Khánh Hoà saong phuong Vĩnh Phước; gam haong nan khik kajap taong abih anek saih hu pathau khan ilamo pacang caga mblung ia saong dom bruk khik kajap karo salamat. Daok di xa Lâm Tân, Danak dak peih ngak 30 tal pato ngan haong 600 anek saih tui bac. Ong Phan Trường Giang, Phaok akaok Jabat Ilamo xa Lâm Tân, brei thau: "Tapa jalan ngak ye xa peih 30 tal pato hu 600 adei anek saih, mek thun umo meng tal bac 1-9, ruah dom adei oh thau luai ia piah pacang caga mblung ia. Khol dahlak hulin peih ngak meng harei 19/11 tal urak ini pasang iek jaik 20 tal pato, tapa tal pato ye adei thau hu ilamo nyuk saong luai ia".

Dom adei hu bac di danao luai njauk tanut brei, hu gru pato naih joi. Hadei dom harei pasram, rilo adei meda hu thau ndong, thau caluai saong thau palagaih tuk laik trun ia. Gru Sơn Ngọc Thường, gru pato caluai ia, brei thau:

 “Dahlau di abih tacei ba dom adei trun tagok danao saron mbon salamat, ngak krein haong ia. Tuk adei oh daok huac ia ye pasram mek suan, palao ndong. Hadei nan tacei ba bruk luai kiuk. Yaom lac ilamo luai ia ini pato suai min tuk salah blaoh dom adei brei luai ia hu atah.”

Anai Thạch Thị Búp Pha, gru pato Sang bac Tieu hoc Lâm Tân 1, brei thau: di xa Lâm Sơn, kraong ribaong rilo, bruk srap gap ilamo caluai ia saong caga dalam ia ka uranaih lac biak njauk lagaih. Kayua yau nan ye, tuk Danak dak hu peih ngak, Kapul urang pan akaok sang bac biak sangka, pathau khan tal amaik ame saong pachreih dom adei ba drei tame. Tui nan, sang bac hu 60 anek saih hu mbaok tame tal bac pato luai ia.

 “Tapa bruk luai ia ini, dom adei bac biak siam lagaih, hu gru pato tacei tani tanat. Meng nan daong dom adei khang hatai jang meyah gaok bruk kan kandah, meda hu ta-eng pacang khik rup drei.”

Meda ndom mayai lac, Danak dak “Daong peih bruk siam lagaih saong karo kajap piah caga, pacang mblung ia di uranaih” daok ngak jeng bruk salih siam, meng ilamo tal bruk di bhap bini. Caga tani tanat ilamo luai ia salamat ka uranaih, pathau khan bruk mbuan mblung ia ka rahra, lac bruk ngak siam ka harei hadei, ka bruk salamat di uranaih, di yaok baoh sang saong dalam rahra.

Siam lagaih mboh di mata lac, rilo bruk mblung ia rah tabiak kayua uranaih oh thau caluai ia atau urang praong oh caga maong tal. Bruk pathau khan yah, paglaong ilamo bhap bini lac biak hu makna dalam bruk pacang caga bruk mbuan gaok bala mblung ia. Pacang khik uranaih patruh bruk mblung ia oh lac bruk di sang bac, karja, bo daok lac bruk ngak di yaok amaik ame, yaok urang dalam bol bhap rahra. Tok meng tuk hu thau saong ngak catang ye meng meda hu ngak jeng labik salamat, siam mekre ralo brei ka uranaih./.