Sa-ai kamei Trần Hồng Nhiên khan brei thau lac, hadei tuk tamat sang bac dai hoc sa-ai ngak bruk ka sa baoh gilang pariak hu jien mek tame jaik 10 trieu dong sa bilan. Yaom lac bruk ngak jeng tani tanat min kayua hu anek daok sit nan sa-ai Nhiên klak bruk ngak piah mai palei 2A, xa Tân Hòa. Dalam sa mbang ngak ahar ka baoh sang mbang, lisei li-u hana mbau pahe tagok di grauk sang biak bangi, ngak ka sa-ai Nhiên hu sahaneng pandar kophi pagam haong lisei li-u hana piah lai menyum iek. Bruk ngak hu lac brei tabiak sa kaya gam mbau pahe bangi gam lamek.

Hadei tuk mek hu mayaom yai khuyen khich pakat huyen saong yai 3 pakat tinh di Mbang pakacah urang kamei peih mbang ngui, ngan haong bruk daong di mban, di gah, di kapul sa-ai Nhiên hu khang hatai buh jien tame rilo jang ka ndap nda kophi li-u di drei saong ngak kaya, pablei kophi li-u.

Tui sa-ai Nhiên, meyah yau di darak pasar hu kophi pagam saong ia iak li-u ye labik di sa-ai ruah ngak lisei li-u hana ta-eng saong chai klik, srau ka lagaih piah ba tal bangi lamek yamen, mbau pahe karei, abih di nyu nan lac ndap nda ini oh laval veik saong kaya halei. Oh lac dak harei paglaong asar siam ndap nda, sa-ai Nhiên daok buh prein roh duah ngak papaok langiu, papaok ndap nda, padang angan je “Kophi li-u Hồng Nhiên”.

Tuk ndap nda hu urang pandar caik hatai tal, sa-ai Nhiên khang hatai jhul khang yaih khan ndap nda. Di Tiktok, sa-ai ngak dom video panak hu rilo asal kadha yaih khan angan je “Kophi li-u Hồng Nhiên”. Dalam jaik 3 thun tapa, yaok harei, sa-ai Nhiên pablei meng 1- 30kg kophi ngak jeng ndap nda, tabung glaong hu harei tagok tal jaik 50kg, brei jien mek tame labaih 20 trieu dong sa bilan.

“Adei padang sa labik gam pabak hatai asal kadha ngak di sang oh hu janih khik suai, gam pabak hu asal kadha salamat kaya mbang piah hu hatai je asar siam ndap nda di drei hu patagok. Adei biak caong khin meng rayak di drei, langiu di bruk pablei hu kaya blaoh daok pambak hu hatai khin peih mbang ngui tal dom adei sa-ai kamei yau adei.”

Tui ong Nguyễn Tiến Mộng – Akaok jabat Kinh te xa Tân Hòa, bhum palei ndik taphia tui tapen ar ribaong barait Xà No, pambak tame kein lagaih di gah ngak nong gam haong bruk hadah krah dalam bruk ngak kaya, rilo urang ngak nong di ini hu patagok jak jeng dom ndap nda OCOP karei, ngak tagok yaom kaom kaya ngak nong. Dom bruk ini daok peih tabiak kein lagaih pambuak jalan jirah rivang, dui pachreih tuai damuai mai rivang, bac tangi saong ba drei tame bruk ngak kaya. Urak ini dalam xa hu 14 ndap nda OCOP. Ngan haong labik di sa-ai Trần Hồng Nhiên, langiu bruk patagok kinh te di baoh sang, daok daong brei bruk ngak ka meng 5 tal 7 urang ngak bruk di bhum palei, ngan haong jien mek tame angaok ala 200.000 dong sa harei. Oh lac yau nan, labik di sa-ai daok rik daong pablei li-u thu di rahra dalam xa hu di tanut yaom tani tanat.

“Gam song ndap nda di labik Hồng Nhiên ye urak ini dom ndap nda mek hu tanut OCOP 3 patuk. Bhum palei jeng patui veik daong dom gah ngak mbang pablei salih piah patagok veik dom ndap nda bahrau pabak hu hatai caong di darak pasar. Asal kadha ka dua lac daong ka gah ngak mbang pablei salih, nao taphia haong gah ngak mbang pablei salih dalam tukvk anak tal, ngak habar piah ndap nda OCOP dak harei dak hu paglaong saong nao hu tal urang pandar piah khik kajap asar siam.”

Meng sa sahaneng di dalam ging sang sit di bhum palei sron mbon, sa-ai Trần Hồng Nhiên hu dak harei hu ba ndap nda kophi li-u jeng sa kaya menyum hu angan di bhum ribaong barait Xà No. Oh lac ba mai ka tuai damuai sa kaya pahe bangi karei, kaya di sa-ai daok brei mboh hatai salih bahrau, hadah krah saong caong khin uak drei tagok di urang kamei bhum palei dalam jaman salih lek taka so./.