Caong khin nao tame hu palei Bac Ray 1, xa Bac Ai Tay hu sa jalan nao kabak, cagar craoh tui jalan tapain kraong. Palei Bac Ray jeng lac puk palei puac abih di xa Bac Ai Tay jeng daok neh rabha pacang cakak. Pak ini, taneh haluk laman nan ye bruk ba mac moc tame pasiam veik jalan mbak glut lajeih jeng daok gaok rilo kan kandah. Ong Pi Năng Xuống, palei Bac Ray 1 brei thau:

“Ceik jaleih meng tuk 4 biar harei, mai meng mikva nduac samar, sang danaok tayah tayac abih. Glut jaleih trak rilo, oh ka nao mai hu, mikva daok pak ini yau pacang cakak”.

Mbang ribuk dom harei tapa, hadiuk pasang sa-ai Pur Pur Đên hu samar drah dil ba anek likei umur 8 thun nao nduac ribuk aia sua min klau harei hadei gilac mai ye baoh sang di drei njauk aia sua ba tatheik, jaleih abih. Aia sua nao tapa, sang danaok jaleih abih, hadiuk pasang sa-ai jeng oh thau ngak hagait kayua oh pataom ramik hu.

“Ceik druh jaleih mbang ka 2 nan lac biak prong, khaol dahlak mai iew dom adei sa-ai nduac, jak gauk nduac nao tagok sang bac Phước Bình C piah kanduac pak nan. Meng 6 tuk biar harei tal page mesup hajan gam gam, nao trun mong iek ye sang danaok oh daok hagait”.

Bruk ceik glai druh tuh jaleih taneh patau daok ngak ka jalan nao tame palei Bac Ray, xa Phuoc Binh jeng oh ka nao mai hu, urak ini radaih oh ka nao mai hu. Bhap bani palei Bac Ray 1, xa Bac Ai jeng bhian randap haong hajan prong min oh thei thau dahlau nyu yau ini, mbang ini aia sua gilac khang saong oh thei thau dahlau. Ta-eng palei Bac Ray 1 hu blaoh 19 baoh sang njauk khut khat triak, dalam nan hu 10 baoh sang njauk glut jaleih taong abih oh daok hagait. Ong Nguyễn Văn Cảnh, Phaok Akaok UBND xa Bac Ai Tay, tinh Khanh Hoa ndom lac:

“Tukvak anak mai tal jeng caong khin dom gah karja samar peih ngak bruk quy hoach piah grap tanat labik daok brei ka bhap bani di dom labik mbuan glut jaleih glaong dalam tukvak anak tal piah grap tanat rai diuk bhap bani”.

Mai pasang iek bruk pasiam dom khat lahik kayua hajan aia sua ba mai di paleei Bac Ray 1, xa Bac Ai Tay, ong Trịnh Minh Hoàng, Phaok Akaok UBND tinh pandar puk palei saong dom jabat karei samar drah peih paha jalan 707 saong peih ngak bruk daong brei pandap panda kaya mbang ka bhap bani daok di labik pacang cakak. Langiu di nan, pambuak bruk haong dom gah karei jak ba jang radaih mac moc piah pasiam veik labik glut jaleih puac di abih. Ong Trịnh Minh Hoàng, Phaok Akaok UBND tinh Khanh Hoa khan mayai lac:

“Jak ba abih dom gah piah pasiam veik dom canah jalan daong ka mikva nao mai hu daok pacang cakak yau urak ini. Anak meta tinh jeng peih ngak bruk daong ka bhap bani dalam labik glut jaleih, lam abih sang danak jeng yau daong brei pandap panda kaya mbang ka mikva dalam tuk vak ini. Ndom ka suai lavik tinh njauk padang ngak gilac labik daok bahrau brei ka mikva piah plaih njaik hu bruk glut jaleih taneh patau’’.

20 urang lin gah canh sat pacang padam apui khuah saong daong duah urang njauk bala Polih Khanh Hoa jeng hu mbaok di palei Bac Ray 1 piah daong ka bhap bani pasiam veik dom khut khat kayua hajan aia sua ba mai. Pandap panda daong ba ka mikva jeng njauk panduan ba tui jalan rabha tabiak jeng pok sit piah gui kabak nao tapa dom labik glut jaleih. Hadei harei ini, puk palei jeng daong pathau tagok caong khin UBND tinh padang ngak dom labik daok bahrau piah grap tanat rai diuk brei ka bhap bani./.