Di takai tatua Chu Văn An (quan Binh Thanh klak), tui dua gah mbaok ar ribaong nan lac mbuk mbuk hareik meng dom mbo salon klak, kapal kik tayah tayac, khan ao, kadung hareik, kadung xop kasu…

Nao cagar tui ar ribaong Xuyen Tam canah jaik sang bac Trung hoc co so Lê Văn Tám, mong tapa gah diah jalan anak bah mbang sang bac, gah likuk hala paga meng tol biak glaong nan lac sa mblang hareik. Mbaok aia juk khuyt, cako gilac yau nhot radaih patuh hu tapa pandar blaoh, mbuk hareik dui atah meng tapen jalan nao tabiak tal mbaok ribaong…

Sa canah dhua mbau nerak trak bahrau khan nan jeng lac dreih yau baoh barait ribaong Xuyen Tam nao cagar tapa Binh Thanh saong Go Vap klak.

Hu sang daok di jalan 47 Bùi Đình Túy rilo thun ini mai, amuk Chu Thị Tú, brei thau dalam akaok saneng di amuk, baoh ribaong meng kan diah yaom lac jangaih hijao. Min dalam labaih 10 thun tapa, baoh barait ribaong njom nerak, aia juk khuyt, bak hareik hareim saong mbau briuk luac thun. “Dom harei pandiak taong abih palei njauk gam seir abih pabah mbang luac harei kayua nyu biak mbau briuk ”, amuk brei thau. Jaik baoh sang amuk Tú, angaok jalan 47 Bùi Đình Túy, rilo bhap bani njauk jan sang piah pok jao mblang taneh, bruk ngak samar drah hu mboh cambaih di angaok mbaok yaok urang.

"O nhiem nerak athar khong khi, mbang oh hu hagait urak ini daok suak yava khong khi o nhiem, daok ini mui mbau ciuk oh nioy. Wa caong rilo, caong mong yaok harei, thun ini umur labaih 80 thun paje, caong khin ngak habar barait ribaong ini hu ngak hacih dreih yau ribaong gah Truong Sa - Hoang Sa. Diuk hu tal harei nan jeng mboh hu taneh aia drei dak harei dak nao tagok, jeng mboh bui sambai dalam hatai".

Hadei di rilo thun caong mong, canah dhua barait ribaong Xuyen Tam hu peih ngak di bilan 5/2025. Tui Mban khik iek danak dak padang ngak jalan mbak ha tang ban raya HCM (Po buh jien tame ngak), danak dak pasiam veik ribaong Xuyen Tam dui atah meng ribaong Nhieu Loc – Thi Nghe tal kraong Vam Thuat, atah jaik 8,9 km. Taong abih phun jien buh tame ngak danak dak nan lac labaih 17.000 ty ndong meng kadung jien ban raya.

Ong Đậu An Phúc, Akaok Mban Khik uek danak dak padang ngak jalan mbak ha tang ban raya HCM, brei thau hadei di harei roya peih ngak, yaom lac gaok biak rilo kan kandah ka langik tasik saong aia tagok min po buh jien tabiak ngak saong dom po thau thei jeng kham merat piah yam tapa kan kandah piah ngak siam bruk ngak di drei.

"Tuk khaol dahlak akau peih ngak dua pok daok ye ba abih kham merat lac ngak salah blaoh njauk haong tukvak masa ba tabiak. Taong abih sang thau urak ini jeng ngak njauk tui tukvak ba tabiak. Meng blaoh tuk nao pasang iek, khaol dahlak taduan mek hu bruk taong yaom di bhap bani nan lac bruk ngak angaok kong truong biak samar drah, adei sa-ai peih ngak biak siam gheih. Khaol dahlak caong khin ngan haong hatai saneng yau nan saong bruk pambuak gauk di bhap bani ye danak dak hu ngak salah blaoh njauk haong tukvak ba tabiak."

Danak dak pasiam barait ribaong Xuyen Tam hu pambak biak prong ngan haong jaik 2.200 baoh sang di dua quan Binh Thanh saong Go Vap dahlau diah. Gah karja puk palei hu tabiak sarak ba-yar jien ka jaik 1.800 urang saong ba-yar jien ka labaih 1.300 urang min bahrau hu 225 urang pok jao mblang taneh. Di harei roya peih ngak bahrau di ini, phaok akaok UBND TP.HCM Bùi Xuân Cường pandar dom puk palei ngak siam bruk ba-yar jien, peih paha mblang taneh, mong bruk ngak ini yau bruk ngak chinh tri dang akaok:

"Hukum sarak, adat brei ngak ye UBND TP hu ba tabiak ginup. Dom adat brei ngak dalam bruk ba-yar jien, pasiam veik labik daok, dalam bruk daong ba dom sarak karei ye jeng hu jao brei ka karja pakat phuong. Caong khin dom ayut sahabat sangka, jak ba taong abih he thong chinh tri piah peih ngak siam bruk ba-yar jien, pasiam veik labik daok, grap tanat rai diuk brei ka bhap bani saong hu mblang taneh hacih brei ka danak dak."

Danak dak brei pasiam barait ribaong Xuyen Tam nan ieu lac bruk ngak hu makna biak prong, tuk ngak salah blaoh, TP.HCM meda hu jang sa baoh barait ribaong hijao saong canah dhua jalan cagar tui ribaong siam gheih, nao tapa pasak Ban raya piah pambuak pagam haong dom ribaong Nhieu Loc – Thi Nghe, Tham Luong – Ben Cat – ribaong Nuoc Len… hu jeng tanut pandiak ka gah jalan mbak di Ban raya HCM./.