Klau Thaik thaot sang hu rajaei mbaoh tangin padang ka rahra bhum ia sua jeng ngak tui kadha “3 khang”: takai sang khang – ganing haluk khang – pabung sang khang, daong pacang ciuk angin ribuk praong saong ia sua khang, lac dom bruk rah tabiak rilo di bhum Kreh Negar.

Jalan langyah hu makna lac paglaong mbaok sang atau padang tada meteh sang/tal 2  kajap piah ngak jeng “labik salamat” glaong jang tanut ia sua praong glaong. Dalam dom bruk ini, hu 2 thaik thaot sang 2 tal: Tal ala meda luai thaoh atau caik takik kaya piah ia sua nduac tapa; tal angaok lac labik pandaok saong khik kajap drap ar.

Dom thaik thaot sang jeng pambuak saong ilamo ky thuat bahrau saong thaik thaot randap daok dalam bhum palei pala bhum Meraong kreh Negar, khik kajap bruk ngak gheih saong daok dang lagai. Taneh meng 36–54 m² daong dom baoh sang rahra palih ruah patui yaok kein lagaih taneh riya, hatai caong di baoh sang danaok khin.

Ong Trần Văn Khánh, daok di Kapul 3, palei Phú Hữu, xa Hòa Thịnh, tinh Dak Lak (huyen Tây Hòa, tinh Phu Yen klak) hu sang jaleih taong abih dalam mbang hajan ia sua meng blaoh. Hu bol lin Quan khu 5 daong pasiam, ong ruah Thaik thaot 01 ngan haong tal angaok ngak labik plaih ia sua. Ong Khánh brei thau:

“Tapa mbang ia sua biak trak ini, dahlak mek hu ilamo, ruah ngak sang sa mê piah hu mbaok sang ciuk ia sua, ciuk ribuk. Dahlau diah ia sua mai oh thau pandaok di halei, urak ini hu bol lin daong ngak sang bahrau, dahlak sahang hatai jang.”

Thieu tuong Trần Thanh Hải, Phaok Tu lenh Quan khu 5, brei thau labik hu Rajaei saong Mentri Caga Nagar jao bruk pambuak haong dom bol lin binh chung, dom bhum palei klau tinh Dak Lak – Gia Lai – Khanh Hoa padang labaih 400 baoh sang ka rahra bhum ia sua. Thieu tuong Hải ndom lac:

“Ini lac bruk mesuh dalam tukvak sron mbon. Dom kapul brei jak ba radaih, gilai, ahaok, peih bruk padang ngak hu ilamo, khik kajap tukvak ngak salamat abih. Yaok baoh sang lac sa labik pambak daong rahra tani tanat raidiuk.”

Di Dak Lak, bhum palei ralo khat lahik trak abih jaik 700 baoh sang jaleih, 1.400 baoh sang khut tayah trak saong labaih 106.000 baoh sang ia dauk. Ong Tạ Anh Tuấn, Akaok UB Bhap bini tinh Dak Lak jeng brei thau, tinh brei jak ba rilo gah, kham merat salah blaoh padang sang bahrau dahlau 31/1/2026, pasiam blaoh khut tayah dahlau 31.12.2025.

 "Khol dahlak jeng brei jak ba rilo gah di Karja, bhum palei, jien saong prein rik daong di dom gah ngak pahla saong di rahra piah ngak danak dak. Taphia bruk padang sang ka rahra khol dahlak hulin jeng padang hu labaih 300 baoh sang daok bhap bini ragra plaih ia sua piah meda hu daong mikva plaih ribuk ia sua”

Dahlau di nan, Thu tuong Rajaei Phạm Minh Chính hu tapak trun bhum ia sua gah Pur tinh Dak Lak (tinh Phu Yen klak), ngak bruk haong dom urang pan akaok dom tinh Tay Nguyen – Meraong Kreh Negar saong pandar peih jalan ngak “Quang Trung samar chip” piah padang sang danaok daok ka dom baoh sang lahik sang daok, khik kajap rahra hu labik daok bahrau dahlau Tet Nguyen dan nethak Asaih Waw 2026. Thu tuong ndom khang lac pandar pasiam veik majam sang daok bhum ia sua tui kadha “3 khang”, gam haong nan cih tabiak bruk caga hu praong anak dom bala trak jang.

Meng dom harak cih saong pato tacei tani tanat, tal ini dom takai sang akaok meti hu padang trun. Labaih 1.500 baoh sang, taong abih jien buh tabiak labaih 255 ty dong, brei hu padang ngak di Dak Lak, Khanh Hoa, Gia Lai… jeng labik pambak khang kajap piah rahra Meraong Kreh Negar truh tapa bala, labik daok karo salamat saong patagok karo kajap jang dalam harei hadei./.