Di Trường Hoà, phuong Phước Thới hu labaih 347 ha, dalam nan hu 248 ha taneh padai saong 87 ha taneh bein, hu 540 baoh sang, urak ini oh daok baoh sang kathaot. Ralo urang di ini ngak nong saong pablei salih sit.

Ong Nguyễn Văn Nhứt, Bi thu, Akaok labik Trường Hòa brei thau, mbang jak ba “Taong abih rahra jum pataom padang palei pala bahrau, ban medin hadah krah “gam haong dom danak dak sangka urang kathaot jeng sa bruk dalam rahra, pambak tabiak di dom gah kinh te, ilamo, rahra, quoc phong, an ninh. Rahra di labik chreih chrai patagok bruk ngak mbang, pala njam patam hacih sa-at, raong glang, ngak kong sit saong pablei salih. Dom baoh sang meda mbiah, meda ginup hu tagok rilo, jien mek tame kuhria tui yaok urang hu labaih 70 trieu dong sa thun. Rilo thun tapa labik hu brei angan “Labik rahra ilamo naih gheih”, ngak jeng bruk jum pataom dalam bhap bini rahra.

"Mikva sa hatai, gul pataom, pambuak pagam daong gauk piah dalam bruk pasiam bein taneh piah patagok veik kinh te ka mikva dalam baoh sang, piah daong dom baoh sang ini mesraiy hu phun jien tui sarak, piah ka dom baoh sang di ini ngak mbang uak drei tagok patruh kathaot karo kajap."

Tui ong Nguyễn Văn Thắng, Akaok Dhan kapul Urang ngak nong labik Trường Hòa, phuong Phước Thới, dhan kapul urak ini hu 159 urang. Dhan kapul padang jalan ngak lagaih haong bruk daok rah tabiak, khik tani tanat harei ngak hu karo tui yaok bilan, pabak harak gal, khau tin thoi su, dom kadha ka bruk pala drak, raong glang piah paglaong siam lagaih bruk ngak saong klah rabha ilamo ngak mbang. Gam haong nan peih dom danak dak lagaih, paglaong asar siam mbang jak ba, gam haong nan pacang khik bruk njauk hukum di urang dalam kapul.

"Peih praong dom bruk ngak mbang siam lagaih, parilo jien mek tame, daong patrun kathaot dalam kapul. Kapul mek bruk di urang ngak nong ngak mbang naih joi ngak gai kandeih pachreih dom bruk piah paglaong tani tanat raidiuk ka urang dalam kapul."

Dalam tuk nan, Dhan kapul Urang kamei di labik Trường Hòa jak ba urang dalam kapul padang baoh sang trei sir, samu gauk, hadah krah, haniem phol, pagam saong bruk “5 oh, 3 hacih”. Asal kadha ka “5 oh”, lac oh eik kathaot, oh ngak suan hukum saong oh laik tame bruk kanjah jhak dalam rahra, oh taong paoh dalam baoh sang, oh menek rilo dut haong hukum, oh hu uranaih lavang lavaih saong klak bac saong “3 hacih” lac hacih sang, hacih ging, hacih labik daok.

Ong Võ Văn Hiện, rahra urang di labik Trường Hòa brei thau, baoh sang ong chreih chrai hu mbaok tame bac pasram pandar ilamo khoa hoc ky thuat tame bruk ngak mbang, paglaong bruk ngak hu, patakik jien buh tabiak ngak. Hu mbaok tame rik daong Kadung jien “Ka urang kathaot”, padang tatua, jalan, gam haong nan jak ba rahra ngak siam hukum, salamat jalan mbak, pamaong tal padang bhap bini siam mekre, jum pataom.

"Baoh sang dahlak daok tui bruk tut angan saong jak ba rahra vil taom dan ngak dom asal kadha Mbang jak ba saong dom asal kadha njauk tanut baoh sang ilamo kayua labik peih ngak, gam haong nan jak ba mikva ba drei tame ngak."

Sarak di Ndang mbo phuong Phước Thới anak meta hu salah blaoh njauk tukvak, dalam nan tanut brei ka jien mek tame mek hu lagaih saong kuhria hu truh tapa labaih 15% dut haong jalan ngak hu jao bruk. Bruk daong gah ngak mbang pablei salih, labik ngak mbang dalam bhum, rilo meng lac bruk phuong hu labik ngak kong saong rilo urang jakar bahrau tame bruk.

Gam haong dom bruk ngak hu di labik Trường Hòa, phuong Phước Thới oh lac brei mboh bruk di Mat tran Negar saong dom kapul dalam bruk jak ba, tacei ba rahra, bo daok brei kein lagaih piah bhum palei patui veik patagok karo kajap dalam tukvak anak tal. Cambaih laih lac, ngan haong bruk kham marat di rahra, labik Trường Hòa daok kajap khang padang raidiuk ilamo, rahra hu rilo, kinh te patagok saong bhap bini gul pataom, daong ngak siam lagaih dom jalan patagok di phuong saong Ban Can Tho dalam tukvak mai meng anak tal./.