Ong K’Bé ieu lac sa di dalam dom Urang hu angan naih gheih di xa bhum ceik glaong Phan Sơn (tinh Binh Thuan klak), ini lac tinh Lam Dong. Thun ini ong K’Bé langiu umo 60 thun, rah tapa rilo labik ngak bruk di bhum palei, di labik halei, ong jeng hu mikva urang bangsa K’ho, Raglai di ini anit ranam saong iek praong.

Ong K’Bé pambuak saong Mban dui ba palei pathau khan ka mikva ka jalan ngak di Ndang, sarak, hukum di Karja. Abih di nyu nan lac pathau khan mikva hu mbaok tame danak dak padang palei pala bahrau, patagok kinh te, padang hatai gul pataom, khik an ninh siam mekre di bhum palei saong kham merat khik ramik dom yaom kaom ilamo bangsa.

" Dahlak mboh bruk ngak di drei dak harei dak trak jang ngan haong bhap bini, dahlak hulin gam haong mikva bhap bini, ngan haong mikva palei pala. Kayua nan, dalam tukvak tapa, dahlak hulin gam haong mikva palei pala hu dom panuac ndom menyai ka pakat uy, karja brei ngak siam saong ginup jang dom jalan, piah ngak habar raidiuk di mikva dak harei dak paglaong. Hu yau nan, hatai je di mikva haong Ndang, Karja hu paglaong jang. Cambaih laih lac meng dom jalan ngak nan, dalam tukvak tapa, hu daong paglaong raidiuk di mikva bangsa takik di xa Phan Sơn."

Paglaong hatai urang dang akaok nao dahlau, ong K’Bé oh lac ngak siam dom jalan ngak, sarak hukum di Ndang, Karja blaoh daok ieu lac urang pasak asar dalam bruk patagok kinh te di baoh sang, kareih pasang ka anek taco saong rahra di ini ngak tui.

Langiu di patagok kinh te baoh sang, ong K’Bé daok jak ba but pajaih, mikva palei pala salih phun pala, anek athur raong, khang hatai mesraiy phun jien gilang pariak piah ngak mbang; jak ba mikva tayah klak dom adat oh daok lagaih, rilo meng lac bruk caik dahlau ka anek bik tok diuk tok pasang tuk oh ka ginup tal thun tal umo tui adat hukum brei.

Ong K’Vi Ang, daok di xa Phan Sơn brei thau, dahlau diah, dalam mbon palei daok rilo urang tok diuk tok pasang oh ginap thun tui adat hukum brei, hu adei tok pasang tuk bahrau umo 13 – 14 thun. Hadei di tuk hu ong K’Bé langyah, pathau khan ka dom bruk oh lagaih oh siam brei ka urang tok diuk tok pasang dahlau umur brei di hukum adat nagar di dom mbang nyaom biai di mbon palei, daong mikva thau ka dom kanjah jhak di bruk ini. Dom thun ini, bruk ini oh daok rah tabiak oh daok kandaong.

" Cei K’Bé hu angan biak praong tal bruk patagok kinh te jeng yau ye dom bruk di bhum palei. Cambaih laih lac bruk jak ba mikva kaoh taneh alin hadiah brei piah ngak dom jalan kraong ribaong, jalan mbak nao mai. Cei K’Bé jeng jak ba mikva khik ilamo bangsa, gam haong nan jak ba mikva ngak siam asal kadha an ninh siam mekre di bhum taneh Phan Sơn."

Meng dom kham merat, bruk rik daong di kapul Urang hu angan je, tal ini xa Phan Sơn, tinh Lam Dong ngak hu dom bruk siam lagaih di dom gah: dom jalan mbak di palei pala hu ngak meng betong, baoh sang rahra hu pandar gom ndien pakat negar; dom palei jeng hu sang ilamo bhap bini, dom baoh sang kathaot jeng patrun yaok thun… Ilamo bangsa hu khik ramik, patagok; an ninh chinh tri, siam mekre salamat rahra hu khik kajap, bruk jum pataom taong abih bangsa hu patagok.

Ong Bùi Ngọc Sơn, Phaok Yam ndok So Bangsa saong Agama tinh Lam Dong brei thau, piah paglaong bruk di Urang hu angan je, meng bilan 7/2025 tal ini, So hu padang 4 tal pato pasram pabak ilamo saong paglaong ilamo ka kapul Urang hu angan je dalam tinh, piah Urang hu angan je thau tani tanat saong pathau khan siam lagaih jang tal Mikva bhap bini.

Hadei di pagam, Phan Sơn ieu lac sa baoh xa bhum ceik glaong di tinh Lam Dong hu rilo mikva urang bangsa takik, raidiuk di mikva daok rilo kan kandah. Lac urang hu angan je di drei, ong K'Bé oh lac patagok siam bruk ngak talei pambuak bo daok pambak tabiak sarak saong jhul tagok bhum mikva urang bangsa takik di xa bhum ceik Phan Sơn./.