Sang gilang tapuk di baha Nam Nhã chreih chrai saong yava sap pato bac, dom kadha tanyi sua bac megru, dom sap ndom sameng tabiak meng tal bac halan tian kayua dom anek saih halan tian pambuak haong sang baha peih ngak. Tal bac dui pachreih jaik 50 urang adei anek saih meng tal bac 1 tal tal bac 8, rilo meng lac anek di dom baoh sang urang kan kathaot, jaik kathaot, ngak bruk di bhum palei. Dom adei hu bac oh mek jien dom anang bac yau Toán katih, Sap Viet, Sap Engrik, Cih thaik binguk saong kompute. Tal bac daong dom adei ngak jeng jalan sahaneng, ilamo ndom puac saong krein randap dalam labik bac magru bahrau.

Maong tame mbaok jamraik compute, tangin taong akhar huroh cih vak kadha hu gru pato pandar, adei Kim Trần Gia Bảo, thun ini bac tal 6 di sang bac THCS An Thới, oh padauk hu hatai bui sambai tuk mbang ka 2 hu mbaok tame tal bac: " Harei ini anek bac cih Thaik rup binguk, bac compute, sap Engrik. Tal bac daong ba mai ka adei hu ilamo gah compute saong asal kadha dalam sap Engrik Anh, daok tuk bac cih thaik ye adei meda cih hu rilo thaik ba mai alin ka baoh sang. Bruk bui sambai abih lac anek daok thau hu rilo ayut cuai sahabat, jie hatai drei jang".

Mban peih ngak tal bac halan tian ruah sang baha Nam Nhã ngak labik bac magru kayua baha ini nyu klak lavik hu pagam haong danak dak Đông Du, urak ini jeng labik ilamo saong pato megru bhap bini. Yaom lac oh njauk lac tal bac chinh quy, min labik ini jeng hu ramik caga tani tanat hu 16 mac tinh, mac pasang, loa, tadik angin… khik kajap labik bac megru siam mekre saong siam lagaih ka dom adei.

Bruk karei crih lac taong abih dom urang pato bac lac dom sinh vien halan tian…Hu hatai anit ranam, dom ayut tari taring, piah ngak ka dom adei hu labik bac megru jaik taphia abih. Ayut Nguyễn Nhựt Linh, sinh vien Sang bac Cao dang Can Tho brei thau ini lac thun ka 3 tal bac hu peih:  "Ngan haong dahlak hulin ini lac bilan pandiak biak hu makna, tapa di nan dahlak hulin bac hu bruk thau pang, thau saong klah rabha tapa dom asal kadha ka raidiuk yaok harei di dom anek saih di ini. Dom adei ye jeng bac hu bruk klah rabha, hu kein lagaih jaik taphia saong pambuak saong gauk rilo jang".

Oh lac sa janih hu pato akhar huroh, dom ayut bac univesiti daok peih ngak danak dak langiu di bac megru yau kadha me-in bhap bini, khan kadha ilamo, ngak kaya meng tangin… daong dom adei pasram ilamo diukrai, patagok taong abih ka rup pabhap saong hatai sahaneng.

Tal bac oh lac sa labik brei pato ilamo ka dom adei sit, blaoh nyu daok lac kein lagaih piah bac pasram hu yaom glaong ka dom adei sinh vien. Tapa yaok var pato, dom ayut meda hu pasram, paglaong ilamo drei bac magru hu saong duah hu ilamo ndom puac, langyah dom asal kadha karei gauk. Sa-ai Đinh Hoàng Minh – Phaok Bi thu kapul Ndoan Sang bac Cao dang Can Tho brei thau: "Bruk ini daok dalam Jalan ngak dam dara halan tian bilan He thun 2025. Hu mbaok tame bruk ka sa piah dom ayut patagok hatai xung kich, halan tian di drei; ka dua lac dom ayut meda patagok bruk drei bac tame raidiuk. Tapa di nan, dom adei hu pabak hatai anit ranam, daong dom urang jaik taphia di drei".

Meng bruk jao ba anit ranam – mek hu anit ranam dalam sang baha kan klak rituh thun sron mbon kreh ban Can Tho, je lac, caong takre mbuan mbiah di dom adei sit dak harei dak hu brei ngak, daok dom yaom kaom diuk siam mekre “brei palao nao oh cang taduon mek urang brei dhar phon ” di dom ayut dam dara patui miat miat tal hadei./.