Hu mbaok di Pasak Duh bruk karja di xa Ea Knốp meng hadah page, blaoh tal 10h30 amuk Phạm Thị Lý di kapul khoi 2, brei mai sang kayua urang jakar javap jalei lac harak di amuk oh ka ngak hu. Amuk Lý brei thau, ini lac mbang ya ka 4 amuk mai tal xa bahrau piah tanyi sua ka bruk harak gar karja pasiam tapuk merah bhong, min tuk halei mai tal, urang jakar javap jalei lac oh ka hu anek inem baoh mboh tra:

“Nao mai thau dom mbang paje, mek lek taka blaoh daok cang labaih sa jala, sa harei oh hu hagait. Blaoh lac oh ka hu anek inem brei mboh tra.”

Biak di nyu brei mboh, hadei di tuk salih tapa bruk bahrau, rilo xa laik tame bruk “khang jeng patau” harak gar kayua kurang anek inem mboh tra saong gar tavak harak gar karja salih di pakat huyen klak saong labik bahrau. Bruk ngak suai ini tapak ngak kan kandah tal kein lagaih njauk hukum di rahra.

Jeng yau rahra, kapul urang jakar di dom xa daok yau kateik geik praong tuk gam ngak randap haong bruk ngak bahrau, gam ndua naong langyah harak gar daok kandaong. Ong Nguyễn Như Hiếu, Phaok Yam ndok Pasak Duh bruk Karja xa Ea Knốp brei thau, labik hu brei ngak bruk karja ka 9 urang jakar, dalam nan 60% njauk mek ngak dom bruk oh bac magru yau nan ye di drei suai kan si plaih hu.

“Khaol dahlak hulin bac magru bahrau meng akaok, ngak langiu tukvak ye bhian ngak, dahlau diah meda hu tal tuk 17h ye padeih, urak ini pandiak jala 11h30, tal jaik 12 tuk meng mai sang huak, biar harei tuk 18 meng padeih saong hadei tuk huak blaoh ye malam brei samar drah ngak di sang, biak rilo bruk.”

Di xa Quảng Phú – labik hu maong yau lac pasak, yaom lac ndap nda kaya ngui karja hu khik kajap, blaoh bhum palei jeng oh plaih hu dom kan kandah ka urang ngak, jalan pabak saong prein ngak. Ong Nguyễn Công Văn, Akaok UB Bhap bini xa Quảng Phú brei thau, meng harei 1/7 tal ini, xa oh ka hu pabak kadung jien ka dom danak dak hu makna nan tamuh tabiak rilo jien masraiy di langiu, biak kandah kandaiy:

“Urak ini tal tukvak ini xa jeng oh ka hu pabak halau piah peih ngak danak dak, jaik di abih piah pabak hu hatai caong ye brei hu masraiy, nyim atau mbaoh tangin pambuak bruk saong dom jitvu ngak dahlau blaoh bayar hadei. Min tapi dalam bruk peih ngak jeng taduan hu bruk sa hatai, sa prein di urang jakar pan bruk saong bruk sangka di rahra saong sa hatai caong dak harei dak ngak bahrau bruk karja piah pabak hatai caong khin.”

Dang Anak bruk ini, urang pan akaok tinh Dak Lak hu dom pato tacei, ka bruk pandar jabat klak, samar drah pasiam aduk bilik; pambuak haong Viettel saong VNPT piah paglaong jalan pabak Internet. Tinh jeng pandar gah Kong an jhul samar tukvak ngak pabak salih anek inem mboh tra ka dom labik karja. Ong Tạ Anh Tuấn, Akok UB Bhap bini tinh Dak Lak ndom lac, tinh sanya daong dom xa, phuong, taoh talaih kan kandah yaok yam piah karja pakat xa bahrau samar drah hu ngak bruk tani tanat:

“So Jien padai ngak samu kadung jien ka dom bhum palei, dalam nan hu paok jien Trung uong daong 500 trieu dong sa xa hadei pagam. Dom xa urak ini rabha pagat rabha quyen pan bruk biak praong, xa ngak bruk blaoh oh hu jien padai ngak habar si jeng. Biak caik hatai ka harak gar hu pambuak tapak tal rahra saong gah ngak mbang pablei salih, oh ngak kandah kandaiy, khol dahlak brei pasang iek gilac taong abih dom asal kadha ka bruk daong ba ngak.”

Bruk karja dua pakat ieu lac jalan ngak njauk hu piah ramik harak gar karja, paglaong bruk jak jeng, siam lagaih bruk pasang iek karja di bhum palei. Min, biak di nyu di Dak Lak brei mboh, piah ka majam politik he thong hu ngak lagaih, biak khin caong hu bruk pambuak samu gauk meng pakat tinh tal labik, gam saong nan lac bruk ngak lagaih, samu taoh talaih dom kan kandah, tavak tavaiy di tukvak akaok meti./.