Bruk pagam Ban raya Ho Chi Minh saong Ba Ria Vung Tau (klak) saong Binh Duong (klak) oh tok sajanih peih praong bruk ngak, labik patagok bruk jirah rivang blaoh daok drap ar brei ka jirah rivang di Ban raya Ho Chi Minh jeng tagok drah ralo.

 Amuk Nguyễn Thị Ánh Hoa, Yam ndok So Jirah Rivang Ban raya Ho Chi Minh brei thau, hadei di pagam, Ban raya Ho Chi Minh hu rilo janih jirah rivang, yau ye: jirah rivang ban praong ban sit, labik ngak kong (di Ban raya Ho Chi Minh, Binh Duong klak); jirah rivang tasik kaoh pulao – labik padeih padei (Ba Ria – Vung Tau klak), jirah rivang pambuak soang nyaom biai, roh duah, jirah rivang ilamo, sajarah, sinh thai, duh agama yang mebang, pren yava (yau Dinh Độc Lập, dom gilang di Ban raya Ho Chi Minh, sang guk Côn Đảo, thiền viện Trúc Lâm, palei ngak lan sứ, bein baoh kayau di Binh Duong)… Langiu di nan, majam ha tang jalan mbak saong ha tang jirah rivang hu samu yau gauk mbiah, gam saong rahra labaih 14 trieu urang brei ngak tabiak kein lagaih praong piah pachreih jirah rivang dalam bhum hu siam lagaih. Amuk Nguyễn Thị Ánh Hoa ndom mayai lac:

“Meyah bruk samu yau gauk di dom ban di Asia Taenggara ye asar siam saong dom drap ar di Ban raya Ho Chi Minh meda dak tame labik dang akaok di dalam bhum. Urak ini khol dahlak daok gam saong gah ngak mbang pablei salih jirah rivang ngak salah blaoh dom ndap nda hu ngak saong daok ngak piah ba tabiak dom ndap nda jirah karei di Ban raya Ho Chi Minh bahrau. Dom ndap nda ini brei ngak tui dom angan yau ye: “Meng ban tui kraong tabiak tasik” atau ieu lac dom ndap nda ka malam, dom ndap nda pandar ilamo jamraik ngak kong”.

Asar siam saong dom drap ar jirah rivang di Ban raya Ho Chi Minh tagok samar daong brei ka tuai damuai jirah rilo bruk pilih ruah. Lambaok dom gah ngak mbang pablei salih jirah rivang brei thau veik, dom labik daok pasang duah dom ndap nda tour klak piah pasiam, padang ndap nda bahrau. Tui di nan, dom labik brei sangka iek praong patagok tukvak saong bruk ba drei tame ka tuai damuai meng bruk pambuak dom ndap nda jirah rivang dalam Ban raya Ho Chi Minh dahlau daih, gam saong dom ndap nda padeih padei tasik, kaoh pulao saong pambuak saong dom ndap nda palei ngak bruk, sinh thai, ben baoh kayau.

Taong yaom ka kein lagaih jirah rivang di Ban raya Ho Chi Minh bahrau, Tien si Dương Đức Minh, Phaok Jabat Roh duah Patagok Kinh te saong Jirah rivang ndom meyai lac, hadei di pagam, labik dang di Ban raya Ho Chi Minh lac hu patagok. Kein lagaih ngak jirah rivang di Ban raya Ho Chi Minh lac biak praong. Oh lac sa baoh “ban praong – kinh te praong”, Ban raya Ho Chi Minh bahrau daok ieu lac sa labik “he sinh thai jirah rivang hadah krah praong”, pataom ginup dom janih ba drei tame meng jirah rivang tasik kaoh pulao, sinh thai, ban hadah krah, ngak kong tal jirah rivang sajarah, ilamo, agama yang mebang. Dalam nan tien si Dương Đức Minh lac Ban raya Ho Chi Minh drei ruah Thiềng Liềng – puk palei kaoh pulao di xa Thạnh An ngak pasak bruk piah patagok:

“Yau puk palei kaoh pulao Thiềng Liềng daok di xa kaoh pulao Thạnh An di Cần Giờ tapa tal Ba Ria – Vung Tau klak. Nan ieu lac sa labik kein lagaih piah khaol drei pandar tasik, pasang iek tasik tani tanat saong iek dom yaom kaom di tasik, thau yaok jalan ia nduac di tasik piah pandar dom yaom kaom karei di tasik. Ban raya Ho Chi Minh brei pilih ruah Thiềng Liềng – sa puk palei kaoh pulao biak lagaih piah jeng sa “ciim akaok kapol”, pataom dom gah jirah rivang bhian saong gheh ghang”.

Urak ini So Jirah rivang Ban raya Ho Chi Minh daok pambuak saong urang ilamo saong urang ngak mbang pablei salih jirah rivang piah pasang iek, salah blaoh Sarak patagok jirah rivang Ban raya Ho Chi Minh tal thun 2030, njauk saong bruk bahrau pagam. Sarak ini brei radak veik labik dang di angan je jirah rivang Ban raya Ho Chi Minh saong dom yaom kaom hu makna, brei mboh darak pasar saong ndap nda hu makna, gam saong jalan langyah panak katut harei saong suai atah harei. Dalam nan, Ban raya Ho Chi Minh jeng jhul abih pren piah pataom tame ka dom danak dak jirah rivang hu daong pren, pamaong tal jalan ngak samar drah ngak jeng labik mai jirah dang akaok Asia tanggara dalam thun 2030./.