Bruk HTX Tuấn Ngọc, ong Trần Thanh Oanh, Yam ndok Kongti TNHH ABZ (xa Hưng Long, Ban raya Ho Chi Minh) hu ruah jalan nao hadah krah ka ndap nda OCOP hu alak jru kayau phun đinh lăng. Oh ngak tui jalan ngak klak, ong ba alak ndap nda tame dom majam kadai pablei karei karei di mblang kapal ahaok par dunya yau ye: Tân Sơn Nhất, Nội Bài, Đà Nẵng, Cam Ranh saong Phú Quốc, ngak jeng jalan “pablei tabiak di tapak labik” siam lagaih. Piah mek hu bruk nan, ABZ hu pandar takik abih dom bruk daong meng danak dak OCOP. Min, gah ngak mbang palei salih jeng gaok kan kandah piah ngak gilac lek taka bhum pala, bruk njauk piah hu pablei tabiak pakat dunya, taneh sit ganik, kurang phun jien saong sarak daong piah peih praong sang jamraik mac mok. Ong Oanh caong takre Ban raya Ho Chi Minh samar drah pasiam veik majam halam OCOP saong daong bruk harak gar taneh riya, sang jamraik mac mok, lek taka bhum piah jhul tagok karo kajap bruk ngak mbang.

"Dahlak biak caong khin Kapul urang ngak nong Ban raya atau sa jabat karei di Ban raya hu jalan langyah piah pambuak saong dom po gilac, oh njauk brei padang kapul yau dahlau. Brei hu akaok gok daong, khol drei daok gilac pato ilamo ka gauk, gam lanyah kadha siam glaong, mek hu brei ka samu gauk… Piah drei pambuak, brei saong gauk padang jeng dom combo ndap nda OCOP pablei tabiak dunya atau duh hatai caong dalam negar ye hu siam lagaih jang."

Hadei meng tuk pagam saong tinh Binh Duong dan saong Ba Ria – Vung Tau, dom ndap nda OCOP hu tagok labaih 920 ndap nda mek hu tanut meng 3 tal 5 patuk. Ini lac bruk patagok khang meng ndap nda ngak hu tal asar siam di ndap nda. Kuhria meng thun 2019 tal ini, ndap nda OCOP Ban raya Ho Chi Minh hu peih praong meng ndap nda mbang, ndap nda ngak gheih ngak meng tangin tapa ndap nda jru cavao, ndap nda menyum, ngak ndap nda kaya saong jirah rivang bhap bini. Rilo gah ngak mbang pablei salih sit saong gam pandar ilamo ngak kong lek taka so tame ngak, duah thau mai meng halei, pablei saong sangka tuai damuai.

Ong Nguyễn Đình Hoàng, Yam ndok Kadung jien buh tame meng Luxembourg di Viet Nam, taong yaom glaong bruk kham merat salih lek taka so di dom po OCOP, blaoh ndom mayai tal bruk brei ka hu bruk daong meng hệ sinh.

"Urak ini dom labik peih mbang ngui ka gah ngak nong rilo meng lac daok duh hatai duah gah piah pablei tabiak. Gah nan daok biak caong hu jien padai, ilamo ngak kong, bruk pambuak saong karja…piah jhul tagok bruk pambuak pablei salih ka urang ngak nong dalam luac jalan jhul khang ndap nda, blei pablei."

Ndap nda OCOP oh sa janih brei bruk ngak, parilo jien mek tame ka rahra blaoh nyu daok pambuak ngak ndap nda palei pala saong darak pasar ban raya ndo thi. Ong Trần Phú Lữ, Yam ndok ITPC Ban raya Ho Chi Minh ndom mayai khang brei ka bruk yaih khan, jhul tagok darak pasar pablei salih rilo labik, dalam nan ralo abih di nyu nan lac tapa lek taka so saong dom mblang me-in pakat dunya.

Ong Lữ jeng pachreih dom gah ngak mbang pablei salih OCOP khang hatai pambuak saong bruk jirah rivang bhap bini, jirah rivang ba drei tame piah patagok bruk pambuak gauk, thau ka angan je saong ngak jeng labik yaih khan ndap nda siam bangi, gheih siam jang.

" Dom ndap nda di gah ngak mbang pablei salih di Viet siam glaong dak harei dak hu patagok, hu roh duah piah pabak hatai caong khin di urang blei pandar. Asal kadha daok di nyu ieu lac veik, khol drei brei patagok dom bruk yaih khan, jhul tagok piah rilo urang thau tal ndap nda kaya di Viet hu siam glaong… Gam haong di nan pambuak veik he thong majam pablei, abih di nyu dalam nan lac majam he thong di dom kapul rilo negar".

Danak dak OCOP ieu lac sa di dalam dom bruk hu angan makna ka gah ngak nong, tukvak Nyaom roya Ndang bo Ban raya Ho Chi Minh mbang ka XI (2020-2025). Dalam 5 thun tapa, Ban raya Ho Chi Minh oh lac labik peih camreip rilo bruk OCOP hadah krah blaoh nyu daok ieu lac labik daning karo kajap, daong tapa phun jien, pambuak darak pasar saong yaih khan angan je. Bruk daong ini ieu lac sa bruk piah dom po OCOP patagok karo kajap, paglaong yaom kaom urang nagar Viet Nam./.