Tui urang kuhria, hu labaih 20 jalan di pasak ban Can Tho bhian dauk ia, gar tavak, kuhria rah tapa mboh bhian dauk meng 0,1m tal 0,3m; tukvak ia dauk kuhria rah tapa meng 2 tuk tal 4 tuk. Gam saong nan, di dom tukvak dalam thun meng bilan 8 tal bilan 12, rah tabiak dom mbang ia dauk kayua njauk tame tukvak ia ndik di kraong tagok glaong abih saong ia ndik glaong.

Amuk Lê Thị Hồng Loan, Akaok UB Bhap bini phuong Tân An brei thau, Mban Pasang iek ODA peih padang mbaok jalan saong jalan ar dua tapen kraong Can Tho hu padang braong thuak ia glaong jang mbraong ribaong brei thuak ia nan lac tuk labik gah likuk di jalan Tầm Vu oh meda thuak ia tapak tabiak dom pabah thuak ia di kraong, ngak brei ka ia dauk di labik ini.

“Phuong hu labaih 5 ribaong ka 5 barait kayua Mban pasang iek ODA ngak po buh jien tame ye jeng oh ka salah blaoh, ngak kan kandah tal bruk pandar ia thuak, ngak hacih sa-at alam langik jeng yau bruk nao mai di rahra. Jalan dalam labik panduan mai daok di Thới Nhựt 1 njauk ia dauk tuk hajan praong ye jeng kayua braong ia sit ganik, tok hu sa braong thuak ia saong rilo bruk jeng njauk halam dan ngak kan kandah tal bruk thuak ia”.

Tui So Padang Can Tho, tapa pasang iek taong yaom brei ka bruk ia dauk di dom jalan dalam ban lac pabah thuak ia sit, oh praong ginup tathuak ia di jalan; njauk hareik harom, glut halam dar. Gam saong di nan, labang ga oh ka hu kuac kuah bhian; hu dom jalan biar. Langiu di nan, ribaong njauk ngak sit ganik jang oh daok thuak ia hu lagaih. Ong Nguyễn Đăng Khoa, Phaok Yam ndok So Padang Ban raya Can Tho brei thau:

“So Ngak nong saong Alam langik pato tacei kakei dom labik pataom hareik harom caik hatai patagok bruk pataom hareik haarom, dom janih hareik harom khang dalam labik daok rahra; pasang iek, hu jalan langyah dom labik pataom mek hareik harom oh njauk labik dhua lagaih. Pambuak saong Mban Pasang iek danak dak ODA taduan, ngak bruk pasang iek dom mbuan rah tabiak ia dauk dalam labik daok gam saong bruk pacang ia, braong cakak ia ndik, kadai njuk ia. Gam haong nan pasang duah dom jalan ribaong njom nerak piah hu jalan pasiam labik yau meng dahlau akaok meti”.

Piah caga ngak ka siam, patrun hu bruk dauk ia ka dom jalan, labik di pasak ban raya Can Tho, brei hu pasiam majam mbraong ribaong thuak ia saong hu jalan langyah pambuak pagam thuak ia njauk saong taneh tambok glaong, jalan ia nduac, labik glaong di dom jalan. Gam song di nan, patagok bruk pathau khan piah ka rahra, dom baoh sang ngak mbang pablei salih oh brei tabik klak barat hareik harom, ndap nda kaya mbang, janih nerak tachauk trun labang ia, labang ga, pabah thuak ia. Gam haong nan pasang iek, taong bhat dom bruk meblah taneh kraong ribaong tathuak ia.

Akaok UB Bhap bini ban raya Can Tho, ong Trần Văn Lâu ndom mayai lac: asal kadha brei ka bruk ia dauk dauk ia di ban Can Tho kayua jalan padang, pasang iek majam mbraong ribaong thuak ia oh ka njauk lagaih, bruk meblah taneh tapen jalan, ar ribaong ngak bruk thuak ia oh lagaih sanang.

“Gam saong bruk langyah suai atah dahlak hulin likau So Padang brei roh duah padang sa danak dak majam ia, thuak ia di dalam labik ban hu suai atah. Kayua kadha ini pambuak tal rilo jien lo, kayua hu dom negar karei tuk ia ndik di kraong ribaong nyu glaong jang dut haong ban 1 - 2 met min jeng oh njauk ia dauk, daok nagar drei oh ka tal tanut nan yau habar drei njauk ia dauk. Kayua yau nan ye dom adei sa-ai dalam So brei roh duah padang sa quy hoach majam thuak ia di labik ban raya”.

Jalan langyah hu Can Tho ba tabiak piah langyah bruk ia dauk lac padang danak dak taong abih majam mbraong ribaong thuak ia di tukvak suai atah. Gam tui di nan brei bhian kuac kuah, pahacih sa-at saong paglaong majam ribaong braong thuak ia. Gam haong nan, salah blaoh dom danak dak pasiam majam thuak ia saong padang ar pacang; patagok bruk pasang iek, langyah dom bruk meblah taneh ar ribaong thuak ia. Ngan haong bruk peih ngak samu yau gauk, siam lagaih di dom jalan langyah ini brei daong ka ban raya Can Tho langyah patruh bruk ia dauk dalam ban./.