Craoh Ea Tuôr bilan ini ia ndik bak, ia nduac tame dom paplah patau pagam njec njom. Ala takai phun Kơ Nia tha rituh thun, ong Y Wer Ktul, Akaok mbon Palei Tuôr, xa Hoà Phú cheh chai kayua mbon palei drei tok randap haong apuh pak, kophi, amraik talu, urak ini thau ngak jirah rivang bhap bini ndung bak ilamo bangsa Randaiy. Gam saong bruk ngak bahrau, mikva gam patagok bruk ngak mbang, gam khik hu ilamo palei pala, piah ka yava sap gong sap, ragam adaoh hu samâng miat miat di ceik glai Tay Nguyen.

"Urang jakar xa bahrau ka gah dak vah pathau khan, ngak habar pandar dom kein lagaih di craoh ia Ea Tuôr, kraong Sêrêpôk saong hadom ilamo karei piah patagok jirah rivang bhap bini, jirah rivang sinh thai. Mbon palei jeng hu peih ka rilo urang sit thun umo nao bac dom tal bac pasram magru ngak jirah rivang paje, urak ini ba tangin tame ngak. Mbon palei hu srap gap, brei kham merat saong jeng caong dom pakat karja daong veik piah meda hu ngak jak jeng.”

Baoh sang sa-ai H Belly Êban peih ngak homestay dalam sang danaok meng kal di drei. Sa-ai H Belly brei thau, homestay di sa-ai rilo meng lac duh tuai langiu nagar dalam nan hu lac tuai damuai mai meng negar Prang. Meng akaok meti, sa-ai sahaneng bruk ngak jirah rivang biak kan, min tuk tame peih bruk, sa-ai mboh biak mbuan mbuah:

“Yau tuai damuai di negar Prang mai tagok ini jirah rivang ye tuai hu ba drei tame langik ceik kraong glai, tuai hu mbang kaya mbang bhap bini biasa, ilamo, tuai hu nao darak saong tanek huak haong drei saong hu nao apuh haong drei meng radaih kong nong. Raidiuk yaom lac yaok harei min drei ba tame jirah rivang. Drei mboh jalan sahaneng ini biak gheih, patagok jirah rivang bhap bini, ba mai kein lagaih kinh te ka gauk urang, oh tok lac ka drei.”

Xa Hoà Phú hu padang meng bruk pagam 3 xa Hoà Phú, Hoà Khánh, Hoà Xuân, taneh praong labaih 109km, rahra jaik 50.000 urang, lac labik daok suai atah di dom mbon palei Randaiy, hu kraong Sêrêpôk saong hu dom craoh ia praong nduac tapa, hu kein lagaih praong ka patagok jirah rivang. Hadei pagam, ramik gilac jabat karja, xa brei mboh hu brei nao duah tal rahra, mai tal mbon palei piah pang caong takre, panuac ndom di rahra… saong praong abih lac biai ka gruk patagok kinh te haong prein ngak, kein lagaih hu dahlau. Ong Đỗ Xuân Hiếu, Phaok Akaok UB Bhap bini xa Hoà Phú brei thau:

“Karja urak ini lac karja duh bruk, oh luai ka rahra daok cang ye karja brei nao tal rahra, gah ngak mbang pablei salih. Duah thau ka hatai caong di rahra, gah ngak mbang pablei salih piah drei padang sarak, ba tabiak dom jalan ngak, danak dak piah pabak hatai caong di rahra.”

Gam saong patagok jirah rivang, jitvu, dalam tukvak ngak bruk bahrau ini, Ndang bo xa Hoà Phú jeng brei salih samar bruk ngak mbang tapa ngak kong – padang, piah ngak jeng ha tang ndo thi ngak kong bahrau. Tapa di nan, samar patruh bruk pambak rilo tame ngak nong tàu urak ini, saong ngak jeng bruk karo kajap piah jeng ndo thi ngak kong di thun 2035.

Meng sa baoh xa ngak nong, xa Hoà Phú harei ini daok padang dom bruk akaok meti dalam jalan jeng ndo thi ngak kong – jitvu ndung bak ilamo, sa pasak daong prein gah Meraong di tinh Dak Lak. Jalan nan lac daok rilo kan kandah, min haong hatai caong uak drei tagok, kham merat dalam bruk ngak politik chinh tri cambaih laih saong bruk sa hatai di rahra, Hoà Phú daok truac tagok hatai jie tame siam lagaih di bruk karja palei dua pakat, njauk lagaih, samu saong njauk hatai rahra./.