Jalan taphia ribaong Khai Hoang, xa Quách Phẩm daok jeng sa dalam dom brik pandiak ka bruk jaleih taneh di tinh Ca Mau. Yaom lac dao hu buh jien tame peih jalan mbak palei pala min dalan bilan 6 meng blaoh, dua mbang jaleih taneh danak gauk ngak “jaleih” labaih 100m jalan mbak bahrau padang. Sa-ai kamei Huỳnh Thanh hằng, sa dalam dom urang gaok bala di bruk jaleih di jalan taphia ribaong Khai Hoang, daok oh ka abih thur mek tuk baoh sang di sa-ai jaleih trun kraong:

“Hu jalan adei jeng uan tabuan piah nao mai bo harei ini jalan glut jaleih, baoh sang dahlak hulin jeng jaleih trun kraong. Sang dahlak jeng kan kandah, ia ndik ye dauk, daok sang urak ini taik tahak ye hajan thac tame ye tathah. Anek bik daok sit labik ndih jeng kan kandah. Urak ini daok dalam baoh sang yok oh ka jaleih, ia ye dauk nan jeng caong hu karja pasiam jalan piah nao mai ka mbuan, saong hu sarak daong ka baoh sang piah padang gilac sang danaok”.

Atah di nan oh atah, di xa Thanh Tùng, meng akaok thun tal ini jeng rah tabiak 23 mbang glut jaleih taneh praong gam sit. Njauk caik hatai abih lac mbang glut jaleih di danaok Amuk Thủy Long di bilan 6 meng blaoh hu ngak khut tayah 55m ar betong, ngak kan kandah tapak tal danaok, danak dak hu pasiam oh ka suai. Labik danaok Amuk Thủy Long daok di kreh canah klau kraong, labik ia nduec khang, nan meng lavik mai lac “labik pandiak” ka bruk glut jaleih. Yaom lac mek hu bruk daong di jabat karja palei piah pacang cakak glut jaleih. Ong Nguyễn Nam Phong, Akaok Mban pasang iek Danaok Amuk Thủy Long brei thau:

"Bruk ngak glut jaleih lac kayua ia kraong nduac, meda hu mboh di langiu nan, ia nduac khang, ngak ka haluh taneh, ngak jeng taluk labang dalam ba tal bruk jaleih. Meyah hadei ini karja hu buh jien tame ngak ye brei ngak ka kajap khang, takai ar hu ngak dalam ka meng khik kajap suai atah. Kayua di ini lac canah klau di kraong ia, ia nduac tagok atau trun jeng ngak kanjah jhak abih”.

Tui ong Nguyễn Thanh Tùng, Akaok Chi cuc Kraong ribaong tinh Ca Mau, hu rilo makna ba tal bruk glut jaleih ar raong trak. Dalam nan, taneh di bhum palei lac taneh lan, taneh haluk mbuan haluh, abih di nyu nan lac tuk tathah rilo njauk hajan njom tame ngak kurang bruk kajap khang di taneh mbuan ngak glut jaleih. Ia nduac khang, ia nduac salih gah kayua ia ndik, riyak praong jeng lac dom asal kadha ngak kurang ar kraong. Langiu di nan, bruk padang sang danaok, danak dak jaik ar kraong ngak sot taneh, jeng mbuan ngak glut jaleih. Anak bruk njauk sangka ini, karja palei daok peih ngak dom jalan langyah piah patakik khut khat. Ong Lê Thế Anh, Phaok akaok UB Bhap bini xa Thanh Tùng, brei thau:

"Dom jalan glut jaleih trak xa jeng buh tabiak kadung jien piah pakajap, dom jalan daok veik ye jak ba mikva ngak jalan pakajap ar piah jeng jalan langyah suai atah. Ngan haong dom jalan laman lamuac, mbuan rah tabiak glut jaleih ye UB Bhap bini xa ngak bruk haong puk palei saong mikva, jak ba rahra panduan tame dalam. Meng nan, tuk hu glut jaleih rah tabiak oh ngak kanjah tal bruk diuk rai, drap ar di rahra”.

Meng akaok thun tal ini, dalam tinh Ca Mau hu rah tabiak 54 mbang glut jaleih taneh tapen kraong hu atah labaih 1.400m, dalam nan, hu 682m jalan betong khut tayah, 3 braong danao raong hadang njauk khut khat ka drap ar hu tagok tal jaik 17 ty dong.

"Bilan glut jaleih taneh" jeng daok rah tabiak saong mbuan ngak khut khat di Ca Mau rilo jang. Bruk pacang cakak bruk glut jaleih oh lac bruk di dom jabat karja, karja palei bo daok brei ka hu bruk sa hatai, jum tangin di rahra piah pacang khik ka raidiuk, drap ar di drei./.