Lac urang bangsa Cam, saai Sa Lây Man thau cambaih mikva palei drei, abih di nyu nan lac dam dara dalam palei 6. Kinh tế pak ini daok rilo kan kandah, rilo urang doan, dam dara oh hu bac megru ginup, bo daok kurang bruk ngak, yau nan ye, dahlau diah, hu dom urang laik tame jalan alak tapai, mein mbài. Saai sahaneng ngak habal padang hu jalan diukrai  siam makre ka dam dara puk palei. Thun 2012, saai Sa Lây Man hu pilih ruah ngak Bí thư chi Đoàn palei, meng nan, saai peih ngak dom bruk xã hội hu  siam mekre, kein laba, pamedeih tagok hatai halan hatian ka yaok urang doan, dam dara. Abih di nyu nan lac bruk ngak brei hacih saat palei pala, kuac raok cống rảnh hu peih ngak gam gam, pachreih hu dam dara dalam palei saong jaik 300 sang urang Cam pataom mbaok tame ngak. Langiu di nan, saai Sa Lây Man daok pambuak bruk saong dom cơ sở Đoàn palei taphia saong  xã Đoàn, peih ngak rilo bruk daong ka dom adei thieu nhi kan kathaot, pagap yau brei tapuk, katap ka anek saih kan kathaot di harei tame thun bac barau atau harei ia bilan bak baok, harei tet  Thiếu nhi 1/6, saai gam saong kapul dam dara xã Bình Sơn jak ba dam dara, nao cakak mbuk ka yaok rabau adei umo sit thun di bhum atah bayah, bhum bhapbini bangsa takik dalam saong langiu xa. Saai Anh Lê Anh Tuấn, Bí thư Đoàn xã Bình Sơn brei thau:Saai  Sa Lây Man hu mbaok tame gam saong mban chap hanh doan yaok thun ngak dom bruk, yau thn bloh peih ngak hu siam melam pataom ia bilan bak baok, pachreih hu labaih 2 rabau anek saih, sinh vien saong peih ngak ka palei Cam hu labaih 500 adei, dalam nan pambuak bruk saong sang thieu nhi huyen Long thanh alin 20 paok pandap ka dom adei anek saih kan kandah bac joi dalam palei Cam”

Lac urang pan akaok kapul dam dara, saai Sa Lây Man tuk halei jeng nao dahlau dalam dom bruk ngak, abih di nyu nan lac bruk daong ka bhapbini, khik caga an ninh trat tu di puk palei. Gam ngak bruk chi doan palei gam ngak cong an xa Binh Son, saai hu pambuak pagam saong kapul cong an xa nao khi iek, pasang iek, thau cambaih bruk di yaok sang, yaok urang. Dalam xã Binh Son hu rilo bein cao su praong, ini lac labik lagaih ka kol jhak ngak bruk. Yau nan ye, bruk khik iek dom urang daok dalam diện te nan gaok rilo kan kandah. Saai  Sa Lây Man gam saong dom urang cong an xa gam gam nao glang iek tuk melam, daong pacang cakak samal dom urang jhak pandar ma tuy, me-in bài atau dom bruk ngak srau kadau an ninh trat tu. Saai khan veik sa kadha oh var hu: Tuk nan 8 tuk melam, tuk drei daok di jalan mai sang hu sa nyaom pataom gauk nyuk ma tuy. Min, tok hu sa drei, meyah ieu kapul nyaom mai nyu nduac klaak abih oh mek hu, tuk nan drei yam  tame,, oh hu pandap hagait daong ka drei. Tuk nan drei prieu khang, ngak yau drei hu pandap piah mek. Sa drei mek hu abih 4 urang daok gindang.” 

Saai gam gam nao taom gaok dom urang dam, thieu nien bleik saleik, jak ba saong cảm hóa, pachreih dom urang nan klaak dom bruk ngak kanjak jhak. Urak ini, dalam palei 6 dom bruk te nan xa hoi, bruk bleik saleik ngak brei srau kadau palei pala yau lihik abih. Oh ta-eng  hagait mikva Cam bo dom urang dam, thieu nien pak ini jeng anit ranam saai. Sang amuk Marigiah (Ma Ri Giá) dahlau thiah kayua oh thau,  hu pala phun cần sa, hadei di tuk saai Sa Lây Man langyah brei thau  bruk kanjak jhak di phun ini, dom urang dalam sang thei jeng pang tui sa-ai saong halan hatian cuh klak taneh pala phun cần sa.

Yaom lac barau ngak cong an  labaih 3 thun ini mai, min meng bruk kham merat di drei brei ka bhapbini, thun 2013 saai Sa Lây Man hadah mbaok meta hu mban Tuyên giáo Tỉnh ủy tỉnh Đồng Nai alin harak meyaom “greih camin urang siam, bruk siam”, uy mban bhapbini xa alin harak meyaom kayua ngak siam bruk doan saong dam dara, thieu nien xa thun 2013. Saai jeng hu tinh doan Dong Nai pilih ruah pok brei angan Bí thư chi Đoàn palei hadah krah thun  2014 dalam tuk pahadar 83 thun harei padang Kapul dam dara 26/3/1931- 26/3/2014./.

Thúy linh