Sa-ai Trần Thị Ngọc Thúy – urang dalam BCH xã Đoàn Phú Phong

Di sang sa-ai Thúy, tuk tabung glaong hu tal labaih 100 urang pataom gauk ndung saong tuk ahar tapei nung. Tui panuac jak ba di sa-ai Thúy, rilo urang rik jien, rik prein, hu urang daong pandap ngak tapei nung yau ye: brah ndiuk, saradang, ratah, hala patei, talei kak…Urang ba abih hatai rik tame saong ngak tabiak dom mbaih tapei nung njal laman, samar ba nao daong ka urang bhum ribuk ia sua. Kayua thuvi thuvar pataom tame bruk tuk ahar tapei nung di sang yau nan ye sa-ai Thúy oh nao tal bhum taneh miền Trung piah alin pandap ka mikva, bo hu dom urang pambuak bruk ba pandap alin tapak atau payua pandap ka dom nyaom kapol ngak pahla karei. Langiu 3.000 mbaih ahar tapei nung, dalam mbang ka 1 daong ka bhum kreh negar, nyaom pahla di sa-ai Thúy hu daong 20 triệu đồng tra. Trần Thị Ngọc Thúy brei thau, bruk ngak ahar tapei nung yaom lac glaih biak min tuk alin ka urang, mikva bhum ribuk ia sua biak uan tabuan, mboh yau nan dom urang rik daong ngak bruk ini biak sambai:

“ Adei daok jak ba rik pataom hu 10 tấn pandap paje, tuk menuac di dahlak khan lac pandap mbang ginup ye, dahlak mek jien bo mikva rik piah payua tabiak langiu nan; jien daok veik meyah thau lac mikva abih khin tapei nung ye dahlak blei pandap karei bo mikva daok caong khin.”

Urak ini, langiu bruk di jabat, sa-ai Trần Thị Ngọc Thúy daok pambuak  saong dom urang ngak pahla, dom urang pambuak bruk daok ngak tapei nung saong jak ba hu labaih 10 tấn pandap piah daong bhap bini dom tỉnh bhum kreh negar.

Sa-ai Trần Thị Ngọc Thúy lac sa urang đảng daok ranaih, tuk halei jeng abih hatai saong dom bruk ngak di palei. Tukvak tapa, urang jakar kumei nan bhian jak ba pandap, padang dom nyaom kapol nao rivang, alin pandap ka dom urang rai diuk kan kandah dalam saong langiu tỉnh. Ong Nguyễn Trường Huấn, Phó Akaok UB bhap bini xã Phú Phong brei thau, Trần Thị Ngọc Thúy lac urang đảng naih gheih dalam bruk bac megru saong ngak tui panuac Wa Ho, thau sahaneng daong ka manuac sia, sami samar dalam yaok bruk ngak,  hu urang đảng saong bhap bini anit ranam:

“Sa-ai Trần Thị Ngọc Thúy biak gheih jak ba, ndem meyai bingi pang dui pachreih hu urang. Tapa bruk jak ba  di sa-ai hu biak rilo manuac ngak tui, padang hu hatai jia dalam bhap bini. Dalam bruk ngak sa-ai tuk halei jeng ngak siam bruk di drei.”

Dom mbaih ahar tapei nung pahe bingi, dom paoak pandap ndung bak hatai anit ranam kayua đảng viên Trần Thị Ngọc Thúy daok di xã Phú Phong, huyện Châu Thành, tỉnh Tiền Giang payua ka mikva bhum kreh negar, hu daong klah rabha dom kan kandah, glaih glar saong hu pabak prein khang piah ka mikva bhum ribuk ia sua gaok bala yam tagok, kham merat pasiam veik dom khat lahik, padang veik raidiuk./.

Urang lang: Aí Nghiêm - 2/11/2020