Ia tasau ja oh lac oh ba mai kein lagaih ka rup pabhap, blaoh daok ngak kanjah jhak tapak tal urang menyum, abih di nyu nan lac ngan haong urang kamei metian, anek naih menek dahlau awak. Ngan haong dom kanjah jhak trak meda rah tabiak tuk uranaih menyum ia tasau ja, Thac si, Bac si Hồ Ngọc Lợi – Jabat pasang iek ruak uranaih saong klauk jru caga, Sang iek ruak Dai hoc Y Duoc Ban raya Ho Chi Minh brei thau, ia tasau ja ieu lac ndap nda oh khik kajap janih dinh duong hu brei thau dahlau, gaok mai meda hu janih oh lagaih hu pakauk pandar dalam pandap mbang brei ka uranaih. Bruk menyum ia tasau ja meda ba tal bruk kanjah jhak trak ngan haong prein yava uranaih yau ye srau kadau jalan tung pruac, aih caraoh, taglaoh aok, bak tatang tung hatian…

Bac si Lợi brei thau, bruk meyum ia tasau ja, oh hu tanut chuan asar siam nru ngak kanjah jhak tapak tal bruk patagok prein yava saong glo akaok di uranaih. Uranaih hu meda lavang lavaih njuel kilo saong biaar. Bruk kurang dom janih siam yau DHA, Choline, pasei meda ngak suai cakrok bruk thau drei jan, trun bruk bac tangi saong bruk sahneng di uranaih.

Dalam bruk pasang iek ruak, bac si Lợi hu gaok dom bruk uranaih mai pasang iek ruak dalam bruk lavang lavaih saong aih caraoh dui atah bo oh thau meng halei mai. Hadei tuk roh duah tantu tani tanat saong pasang dut iek ia tasau hu menyum, mboh hu dom ndap nda oh mek hu tanut ka asar siam, dom janih di nyu hu njauk piah medil lac ia tasau ja. Dom bruk ini brei taong ruak pambuak haong bruk pabak ia, ndian giai lang halai, pasiam jalan dinh duong saong pasang iek pasiam bruk cakrok suai atah.

Piah thau samar drah ka dom bruk rah tabiak tuk menyum ia tasau ja, bac si ini brei thau amaik ame meda medil lac uranaih hu menyum njauk ia tasau ja tuk rah tabiak dom bruk brei mboh. Cambaih laih lac, uranaih salih bruk randap mbang ruak (alah mbang, klak mum, mbuan ndaih baoh bhong kalik), bruk brei mboh ka jalan tung pruac (aih caraoh, taglaoh aok, mephei, pandik tian, trak tung), suai praong (oh mek hu tanut trak saong glaong njauk haong thun umo). Dom uranaih meda brei mboh bruk kurang darah, kalik hijao, glaih glar dui atah kayua kurang janih siam; jeng yau rah tabiak dom bruk ndaih baoh, katal kalik saong bhong merah kalik.

Tui Thac si, Bac si Hồ Ngọc Lợi – Jabat pasang iek ruak uranaih saong klauk jru caga, Sang iek ruak Dai hoc Y Duoc Ban raya Ho Chi Minh, yaom lac oh meda mboh hu meng meta min amaik ame meda caik hatai tal dom bruk ka sambo bar saong tanut klik, bruk mbau di nyu, bruk brai dalam ia… Cambaih laih lac ka sambo bar saong tanut klik, ia tasau biak bhian hu sambo bar patih, klik saong samu gauk. Ia tasau ja meda hu sambo bar karei, oh klik saong hu pataom jeng asar. Daok ka bruk mbau di nyu ye ia tasau biak nyu mbau pahe njuel. Ia tasau ja meda oh mbau hagait atau mbau janih hoa chat.

Bac si Lợi pachreih amaik ame brei ruah blei ia tasau di dom kadai kuan, kadai pablei jru, sieu thi hu angan je saong brei thau cambaih laih mai meng halei; pasang iek tani tanat kadung ndap nda, tem pacang pandap ja, mã vạch, harei pandar hu di ia tasau saong angan gah ngak ndap nda.

Amaik ame jeng plaih blei ia tasau tui dom bruk pablei ndap nda oh tapak yau ye Livestream, mang xa hoi, atau ndap nda hu yaom kaom biar oh yau bhian; gam haong nan brei caik dahlau blei dom ndap nda hu pasang iek saong hu mbaoh tangin brei pablei meng jabat y te./.