Bruk siam abih piah pacang khik rup drei anak kanjah jhak di tanrak hadah di ia harei ieu lac takik tabiak pandiak. Brei plaih tabiak langiu dalam tukvak pandiak khang (10 - 16h) atau luk jru pacang pandiak ginup.

Langiu di nan hu dom ndap mbang meda daong patakik bruk kanjah jhak ka kalik kayua pandiak. Min dom janih pandap mbang ini oh meda salih ka taong abih bruk luk jru pacang pandiak saong dom bruk pacang khik kalik karei.

Dom janih ikan hu Omega – 3

Omega - 3 lac sa janih acid lamek njauk ka hu oh lac daong ka chuc nang tim mach bo daok hu pambuak siam tal kalik saong mbuk. Kayua nan bruk patagok bruk mbang ikan hu rilo Omega - 3 brei siam ka kalik. Ikan hồi, ikan darei… lac hu rilo Omega – 3, daong patrun bruk kalik mbang pandiak tuk gaok tanrak pandiak ia harei.

Tamun hu dom janih pacang oxy mbang yau ye vitamin C saong daong pacang khik kalik patruh dom kanjah jhak di alam saong pacang caga taha kalik. Abih di nyu nan lac tamun hu rilo janih vitamin K daong ngak siam kalik, nan biak siam piah ngak dhit inem kalik mbang pandiak.

Tamekai ieu lac sa janih baoh kayau daong pacang khik kalik patruh dom kanjah jhak di alam langik. Kayua tamekai hu janih acid amin L-citrulline glaong. Acid amin ini hu pasalih jeng L-arginine dalam rup pabhap saong bruk pambuak ini daong pacang khik kalik pacang caga dom kanjah jhak meng alam langik yau ye langik thu lagu saong njom nerak. Ini lac janih baoh kayau hu janih pacang oxy mbang lycopene saong acid amin arginine. Dua banah nan jeng daong pacang khik kalik caga kanjah jhak di tanrak pandiak.

Dom janih njam hala hijao bhian hu rilo vitamin jeng yau dom janih pacang oxy mbang, daong pacang khik rup pabhap patruh dom gok tu do saong patagok prein pacang ruak siam ka prein yava. Njam hala hijao yau njam kai soon, njam bina… hu rilo carotenoid saong janih pacang oxy mbang, daong pacang khik kalik patruh kanjah jhak di tanrak pandiak ia harei.

Dom janih asar dinh duong daok hu rilo janih siam hu kein lagaih ka prein yava anek menuac, dalam nan hu janih asar rilo vitamin E siam ka kalik. Brei mboh asar chia, asar bingu ia harei, sa janih pacang oxy mbang meda daong pacang khik kalik patruh kanjah jhak di UV pasang tanjrak.

Hu rilo jalan pacang khik kalik klah gaok kanjah jhak di tia UV. Bilan pandiak nan pandar nduan praong gavang, kreih camin mat, pandap pabang mbaok kapal, khan ao atah… Siam abih tuk langik pandiak brei panduan tame daok di labik halui, cuk khan ao atah saong maom nduan. Takik gilac tukvak tabiak pandiak tuk kreh pandiak, tia UV di ia harei khang abih meng mon 10 tuk page tal mon 4 tuk biar harei, kayua nan brei takik gaok tapak tanrak pandiak dalam tukvak ini.

Meyah kalik mbang pandiak, klua pandiak njuel, brei duah labik halui samar chip piah pandaok. Takik tabiak pandiak dalam dom harei hadei nan. Luk jru khik tathah hu dom janih acid hyaluronic, vitamin C, taiy hijao... piah ngak dhit pandiak mbang saong daong pasiam kalik siam jang. Bruk klua pandiak trak, hu ngak tabiak ia, laka kalik, pandik trak ye brei nao pasang iek ruak kalik piah hu jru ruak samu./.