Pandik pruac hatian tung guel ieu lac sa janih ruak di dalam tung pruac rah tabiak rilo urak ini. Ruak hu biak rilo bruk brei mboh saong jaik abih urang ruak jeng hu mboh dom bruk yau ye eik mesam, catang pruac hatian hatung, eik yava, pandik hatung jaik tada … ini jeng lac bruk hu mboh rilo abih di ruak pandik hatung guel.

Pandik tung guel kayua mai meng rilo janih:

Kayua menyum alak mbie: Ralo di nyu mboh dom janih dalam alak mbie jeng ngak ka kulih hatung pruac tung guel njauk rambuac rah rah ba tal bruk njauk pandik barah saluah tung guel atau trak jang lac tabiak darah atau mbruac hatung guel meyah oh taong padam ruak dil samu brei aval.

Kayua mbang menyum oh siam: Bruk mbang menyum oh siam lagaih, padeih padei oh ginup, oh njauk tukvak atau kayua kaya mbang oh lagaih, rilo kaya mbang hang pandiak… ba nao tal ruak ngak pandik hatung guel dak harei dak khang.

Kayua anek ruak HP: Saluah, pandik hatung guel jeng thau lac kayua njom anek ruak H.P. Anek ruak HP hadei sa tukvak masa ndih dauk di daok dalam hatung guel nyu ngak brei kan kandah ka niem mac ba tal bruk saluah ba tal bruk pandik tung guel.

Kayua katang akaok: Katang akaok jeng ngak ka tung pruac hatung guel dui tame tabiak khang, ngak brei pandik dalam tung hatian tung guel dak harei dak trak khang jang.

Piah patrun pakurang pandik hatung guel, langiu di bruk taong ruak tui panuac kakei di bac si. Urang ruak meda pandar dom bruk daong patrun pakurang pandik saong daong taong ruak siam lagaih yau ye:

Papait hatung hatian: Mbuan si ngak abih di nyu yau ye: Luk menyek pandiak tame tangin tal tuk tangin ndik pandiak. Brei papait hatung tagok trun gam gam dalam 10 – 15 minit atau tal tuk mboh hatian hatung pandiak daong brei pakurang pandik siam lagaih.

Menyum ia pandiak: Sa glah ia pandao tuk pandik hatung pruac daok ngak kan kandah lac sa bruk biak njauk ngak. Ia pandao ngak palai ia mabar di dalam hatian hatung pruac, patrun kurang pandik. Menyum ia pandiak dalam var page jeng ieu lac sa bruk randap brei khik tani tanat haong dom urang ruaktung guel hu jalan tung pruac oh siam. Jalan tung pruac brei rao hacih saong drap gap ka harei ngak bruk biak chreih chrai.

Uh pandiak hatung: Pasain tanjiak pandiak di khan bai uh brei daong ka darah dalam hatian hatung nduac lagaih. Darah nao tal rilo jang daong patrun pandik hatung pruac samar drah jang saong siam lagaih. Oh sa janih yau nan, hatian hatung hu ngak pandiak jeng daong ka jalan hatung pruac ngak bruk siam jang. Langiu di nan, urang ruak meda buh sarak atau brah hana brei pandiak tani tanat, hadei di nan pandar tanjak atau buh tame kadung uh brei ka pakurang pandik.

Langiu di nan, tuk pandik hatung guel tamuh, juai suhsah, brei madeit madeit dan dan ndih trun ghe taneing, kham merat ndih mblaing rup gah ieu. Thuak yava dalam saong samu yau gauk. Meda mbang roti ahar mì, ahar quy, menyum ia tasau pandao pandiak,…

Dui pataom abih nyu lac: Pandik hatung pruac ieu lac asal kadha bhian mboh, piah pacang caga dom mbang pandik hatung pruac meda tamuh veik nan drei padang ka drei sa bruk randap siam mekre yau ye: Mbang ndap mbang laman, mbuan tung pruac, rabha ralo var mbang huak saong menyum ginup ia. Caga juai ralo catang glao akaok atau duh hatai, kateik geik dui atah. Juai menyum alak mbie, njuk pakao saong dom janih ndaoh dalam hatian. Juai medeih malam, ndih brei paginup. Padang bruk randap pasram pahat padhih yaok harei harei./.