Bac tamat đại học gah Quản trị kinh doanh 4 thun dahlau saong eng drei kham merat bac megru mek hu rilo chứng chỉ gah truyền thông, thiết kế, min tuk nao duah bruk ngak, sa-ai Trần Ngọc Mỹ, sa urang jaoh jo daok di quận 10 meng mboh biak glaih glar. Hu rilo urang tacei jalan, Mỹ tagok blah web vieclamnguoikhuyettat.vn duah thau ka bruk pilih ruah menuac ngak di dom doanh nghiệp. Min kayua blah web brei thau biak takik, kurang email saong điện thoại piah ieu tangi, nan ye bruk duah thau atau taom gaok haong doanh nghiệp ngan saong urang ngak khin duah bruk ngak lac oh mbuan.

    Tal tuk likau hu bruk ngak bloh, ye kan kandah nyu tamuh tabiak haong sa-ai Mỹ kayua doanh nghiệpoh mbak carak, hu tuk daok kateik greik urang jaoh jo. 4 thun nao ngak, sa-a Mỹ njauk salih tapa rilo labik karei di gauk min jien bilan oh samu haong bruk ngak, oh samu haong pren yava buh tabiak di urang kumei jaoh jo ini. Sa-ai Trần Ngọc Mỹ brei thau, ini lac bruk daok ngak ka rilo urang jaoh jo mboh drei daok njauk urang iek lap dalam tuk ngak bruk di dom doanh nghiệp:

  “Urang jaoh jo bhian mặc cảm saong gaok kan kandah dalam tuk duah bruk ngak nan ye oh khin salih labik ngak saong mbuan ba tal “cam chịu. Thau hu hatai sahneng ini, rilo doanh nghiệp bayar jien bilan biar, min kateik greik urang jaoh jo ngak bruk rilo jang. Bruk ngak yau gauk min jien bilan di urang jaoh jo bhian biar jang urang oh jaoh jo.”.

    Nan jeng lac bruk duh hatai di sa-ai Đinh Công Duy, sa urang jaoh jo daok di quận Bình Tân. Hu pato bruk ngak biak siam, hu ilamu ndom puac nao mai, min rilo mbang sa-ai oh taduan bruk ngak di doanh nghiệp kayua oh lagaih haong labik ngak brukJaoh jo ngak bruk trak, bruk nao mai di sa-ai Duy biak kan kandah dalam tuk dom doanh nghiệp taduan sa-ai tame ngak oh hu labik lagaih ka urang jaoh jo:

     “Bruk bruk bloh, thau bruk bloh min rilo urang oh likau hu bruk ngak di gah lingiu kayua dom doanh nghiệp, dom công ty oh sangka tal dom urang ngak lac urang jaoh jo. Lingiu di nan, dom urang jaoh jo bhian daok la xe lăn yau dahlak. Tuk nao ngak, yaom lac hu doanh nghiệp taduan tame ngak min kol dahlak oh ngak bruk hu meyah labik ngak bruk nan oh hu labik lagaih ka urang jaoh jo, yau ye jaman nao meng kanyan ye kol dahlak oh nao hu.”.

    Urang jaoh jo eng drei nao duah bruk ngak lac biak kan, dom labik duah bruk ngak ka urang jaoh jo ye dak glaih glar jang. Lac menuac ba tabiak bruk “Padang mbang ngui haong urang jaoh jo”, meng bilan 5/2018, sa-ai Nguyễn Hoàng Trung hu peih cửa hàng Pambuak talei anit ranam di quận Phú Nhuận. Labik di sa-ai urak ini daok ba bruk ngak saong jien mek tame tani tanat ka 8 urang jaoh jo meng bruk pablei ia menyum saong pandap mbang. Sa-ai Nguyễn Hoàng Trung brei thau, bruk oh cambaih laih di dom adat hukum atau nghị định daok lac paga pacang, ngak brei oh takik urang jaoh jo gaok thiệt thòi tuk patagok bruk ngak mbang, pablei salih:

 “Urak ini ndom tal adat hukum ye hu ginup abih, oh kurang hagait, min urang jaoh jo biak caong hu bruk sangka cambaih laih saong peih ngak hu. Kol dahlak caong lac, dom sở, ban, ngành pandar hukum yau habar piah ka urang jaoh jo ngak hu bruk, oh lac pandar hukum bo kol drei oh ngak hu. Kol dahlak jeng caong lac, dom pakat lãnh đạo sangka jang tal bruk duah dom labik daok kurang, yaom lac biak sit min nyu daong hu ka urang jaoh jo ba drei tame haong cộng đồng.”.

    Urang jaoh jo daok caong hu dom sarak, dom quy định cambaih laih njauk haong bruk di anak meta piah hu jalan patagok siam di abih pren ngak bruk di drei. Dom sarak daong njauk cambaih laih tui bruk di yaok bhum palei, jhui samu gauk, jhui yau gauk. Saong praong jang di abih lac, urang jaoh jo caong hu sa labik ngak bruk bình đẳng, thân thiện di dom doanh nghiệp piah chreih chrai ba abih ilamu saong pren yava di drei tabiak ngak bruk./.