Sa-ai Châu Thị Xéo hu pok ngak Akaok Hợp tác xã dịch vụ ngak nong tổng hợp Châu Rế

Lac urang kamei Cam, menek tabiak saong prong tagok di bhum taneh cuah Thành Tín kan kathaot, langik pandiak thu luac thun, sa-ai Châu Thị Xéo thau hu bruk cuang kandah, glaih glar di bhap bani, rai diuk kan kandah ngak ka rilo urang kamei njauk klak palei nao ngak mbang atah. Meng mboh yau nan, sa-ai kham merat roh duah, bac megru ilamu meng dom bruk ngak mbang laghaih haong bhum taneh thu lagu. Sa-ai mboh taneh riya di palei meda pala hu phun rabung hijao piah cak rok patagok kinh tế sang, daong mikva tabiak truh kathaot angaok bhum “taneh metai”.

Puac thun 2016, sa-ai Xéo ba akaok nao dahlau pasiam veik bhum taneh cuah thu lagu di sang drei piah pala iek 1 sào phun rabung hijao. Meng bruk pandar jalan pruh aia patak pataom saong ngak njauk tui ilamu mong iek nan ye phun rabung hijao cak rok patagok siam, brei năng suất glaong. Meng hu kein laba yau nan,, sa-ai Xéo peih prong tagok 5 sào pala phun rabung hijao, yaok bilan brei jien mek tame labaih 40  triệu đồng.

Meng jak jeng di drei, sa-ai Xéo nao jak ba mikva pambuak gauk pala phun rabung hijao piah patagok kinh tế. Sa-ai Xéo khan lac: “Dahlak mboh lac urang kamei hu bruk ngak, hu jien mek tame tani tanat, ye labik dang dalam baoh sang saong langiu puk paga hu sangka, hu iek prong jang. Dahlak hu ndom biai haong Kapul urang kamei xã pok panuac haong UB bhap bani xã Phước Hải brei padang Hợp tác xã pala rabung hijao piah daong ka bhap bani, abih di nyu lac urang kamei Cam hu bruk ngak tani tanat, yam tagok tabiak truh kan kathaot”.

Meng sami samar saong hatai kham merat, thun 2018, sa-ai Châu Thị Xéo hu pok ngak Akaok Hợp tác xã dịch vụ ngak nong tổng hợp Châu Rế. Meng kein laba kinh tế ba mai, meng 37 urang tuk camereip, tal harei ini hợp tác xã pachreih hu 83 urang, dalam nan hu 63 urang kamei jak gauk pambuak bruk pala phun rabung hijao angaok mblang hamu praong jaik 20 ha. Langiu di phun rabung hijao, dom urang dalam hợp tác xã daok ngak padai saong pala dom janih njam patam, ratak, traong nde.

Pala phun rabung hijao daong ka kinh tế di dom urang dalam hợp tác xã hu patagok, jien mek tame di xã viên biar abih lac 10 triệu đồng sa bilan saong baoh sang glaong abih lac tal 90 triệu đồng yaok bilan. Tuk akaok mereip Hợp  tác xã hu 7 baoh sang kathaot, tal harei ini taong abih hu tabiak truh kathaot saong yam tagok ngak kaya meda. Hu mbaok tame pambuak bruk ngak mbang pala drak, hợp tác xã hu ba bruk ngak yaok harei ka yaok pluh urang ngak dalam palei, rik daong ngak hu tanut 13 dalam bruk padang ngak palei pala bahrau di ở xã Phước Hải.

Ndom ka bruk ngak di drei, sa-ai Châu Thị Xéo brei thau, yaok bilan, sa-ai pambuak bruk haong Kapul urang kamei dom pakat peih bruk ndom biai nao mai ka dom baoh sang daok dalam hợp tác xã, daong ka dom urang ini klah rabha ilamu ngak mbang, diuk pasang klah rabha bruk ngak dalam sang. Meng dom bruk ngak ini, dom urang dalam hợp tác xã biak bui sambai, abih di nyu lac dom sa-ai likei hu thau klah rabha bruk ngak dalam sang danaok haong diuk anek, palaghaih ka adei sa-ai hu mbaok dalam bruk ngak di bol bhap rah ra. Adei sa-ai hu bruk ngak, jien mek tame tani tanat nan ye rai diuk dak harei dak siam jang.

Ong Huỳnh Thanh Huy Thái, Phaok akaok UB bhap bani xã Phước Hải brei thau, sa-ai Châu Thị Xéo nan lac urang ba akaok nao dahlau dalam bruk salih janih phun pala, jak ba dom urang dalam HTX salih meng mblang taneh klaak sraoh oh hu phun halei praong hu, salih tapa pala phun rabung hijao  ba mai kein laba kinh tế biak glaong.

Meng dom jak jeng dalam bruk ngak nong, rik daong biak rilo ka bruk cak rok patagok di puk palei, sa-ai Châu Thị Xéo taduan hu rilo Harak pok meyaom di Kapul urang kamei Việt Nam, Akaok UB bhap bani tỉnh Ninh Thuận./.

Urang lang: Jasi – 22/03