Hadei di 5 thun, kinh tế sang saai Sú hu siam tagok mboh di anak meta

Yau rilo sang bangsa H’Mông karei karei, dahlau dieh sang saai Hạng Thị Sú biak kan kandah. Dalam sang hu jaik pluh menuac tok caong tame tame 2 ha taneh puh ngak padai sa vụ;  Yaom lac biak kham marat ngak, min eik lipa, kan kathaot jeng daok tui sang saai. Mayai haong khol dalak hulin, saai Sú brei thau: “di Tuần Giáo, Mường Nhé, hu rilo urang nong ngak mbang hu haong bruk ngak bein di mbon ceik. Iek ti-vi, mboh rilo kreih camin urang nong ngak mbang naih joi, dahlak iek nao iek mai blaoh mek ba-ar cih veik biak cambaih jalan bo dom urang nan ngak. Hadei di rilo melam saneng, dahlak biai haong pasang nao mesraiy 50 triệu đồng di gilang pariak sarak kanja huyện piah blei mac chai padai, peih kuan pablei pandap panda  kabhap bini dalam bhum”.

Meng puac thun 2015, sang saai Sú daok hu ngak bruk bahrau. Pasang saai lac Sùng A Chư iek bruk chai padai, tangei ka bhap bini puk Tỉnh B saong dom puk jaik taphia; daok saai Sú pablei pandap saong raong tapon pabui. Meng tari taring, sang saai biyar abih jien sraiy di gilang paraik saong hu jien peih praong bruk raong pabui. Meng nan, hadei di 5 thun, kinh tế sang saai Sú hu siam tagok mboh di anak meta. Dua thun mai ni, yaok thun sang saai Sú jeng hu pablei jaik pluh tấn pabui ralaow; jien meng mac chai, meng pablei salih tagok tal yaok rituh triệu đồng.

Meng ngak rilo bruk yau nan, sang saai Sú hu phun jien peih praong bruk raong kubao, limo palimek. Saai Sú brei thau: “bhap bini bhum ceik glaong bhian raong palao kubau, limo, takik brei mbang tangei, mbang haleik nan ye kubao, limo lavang lavaih, pablei oh hu yaom. Mboh yau nan, dahlak kakei blei kubau, limo di dom baoh sang blaoh ba mai raong kareik, palimek nyu meng brei mbang pabak tangei, haleik. Hadei di labaih 3 bilan, kubau, limo tagok kilo samar, pablei hu yaom saong teik trak rilo. Pataom abih jien mek tame meng bruk pablei salih, chai padai, tangei, raong glang, yaok thun sang saai mek tame hu jaik 300 triệu đồng”.

Meng bruk ngak hu yau nan, rilo thun gam saai Hạng Thị Sú hu pok mayaom lac urang naih gheih dalam bruk ngak mbang di palei. Lingiu di nan, saai Sú daok lac urang đảng ranaih umo hu angan je. Patagok bruk ba akaok di urang đảng, dalam dom thun tapa, saai tuk halei jeng nao dahlau dalam dom bruk ngak di palei, tuk halei jeng ngak tui sarak di Đảng, kanja, jak ba bhap bini cak rok patagok bruk ngak mbang, patruh eik patrun kathaot.

Saai abih hatai pato tacei urang karei jalan ngak kinh tế sang danaok. Meng bruk daong di saai, rilo sang daok ranaih umo dalam palei hu phun jien, hu ilamo piah khang hatai padang mbang ngui. Jalan ngak saong hatung hatai di saai Sú hu pabak prein ka mikva bangsa H’Mông daok di bản Tỉnh B saong di xã Xá Nhè jia tame jang tuk salih bruk pala drak, raong glang piah yam tagok, patruh eik, patrun kathaot./.

Urang lang: Thu Thảo – 01/02