Urang likei dam ba abih pren ka bruk ngak

Yaok harei, sa-ai Nguyễn Duy Anh jeng tame ứng dụng Zalo Connect duah thau saong cih vak veik angan dom urang daok gaok kan kandah, caong khin hu bruk daong dalam ban Cần Thơ. Tui sa-ai Nguyễn Duy Anh, lac sa urang jakar công an ngak bruk di phường Long Hoà, sa-ai hu thau cambaih bhap bani daok caong khin oh lac prein yava hu khik caga bo daok caong khin hu pandap mbang piah diuk tapa harei. Pandar ứng dụng công nghệ lac jalan ngak siam di abih, kayua nyu samar drah, saong drei  thau kuhria caga dom hagait:

Tapa Zalo drei jeng takik taom gaok haong mikva, meda ndom puac nao mai hadei atau dahlau di tuk drei ba brei pandap, duah thau ka rai diuk di baoh sang urang nan, tok daong ba pandap nao caik di anak pabah mbang sang blaoh mikva tabiak mek. Hadei di tuk drei brei bloh dom urang nan mboh yau habar ye  ndom menyai tapa Zalo.

Meng pambak tame pren khang di dom blah mạng cộng đồng yau Facebook, Zalo, sa-ai Nguyễn Duy Anh hu klah rabha bruk ngak pahla di drei saong oh thau meng tuk halei sa-ai hu jeng talei pambuak bruk di bhap bani haong dom menuac urang, jabat, urang ngak pahla. Duy Anh hu pathau tagok jabat drei daok ngak bruk nan lac Công an phường Long Hòa, quận Bình Thủy. Taduan hu bruk pachreih tui, tuk abih mon ngak bruk, gam haong dom adei sa-ai dalam jabat nao trun dom labik, ba pandap brei ka mikva gaok kan kandah. Pan pok pandap angaok tangin, ong Nguyễn Văn Bé Tám, daok di phường Long Hòa, quận Bình Thủy, bal Cần Thơ drut droi lac:

Hu daong prein meng dom urang ngak pahla dalam dom harei jit, sang dahlak biak thau dhan phol. Dom pandap nan jeng daong ka drei oh cang nao darak dalam 1 adit, bo urak ini darak pasar jeng kan kandah.

         Langiu di bruk daong ka bhap bani, Duy Anh daok pamong tal dom urang daok ngak bruk di labik pasang iek pacang caga jit COVID-19. Sa-ai haong kapul bhian nao ngak bruk pahla di drei, peih bruk tapaok tapei nung piah alin hadiah. Mbang ka 1 ba 500 mbaik tapei nung alin hadiah ka dom urang daok ngak bruk di labik pacang caga jit di quận Bình Thủy, quận Ninh Kiều saong quận Cái Răng. Tui kuhria, kapul di sa-ai meda daok ngak 3 mbang tra abih tih 2.000 mbaik tapei nung. Jien piah ngak kayua adei sa-ai dalam kapul buh tabiak. Ong Võ Thành Sang, urang daok dalam tổ khik caga phường Long Hòa, quận Bình Thủy, ban Cần Thơ khan lac:  

Khik iek pak ini bo mboh hu bruk sangka di dom pakat mai daong brei, adei sa-ai mboh bui sambai lo. Dahlak jeng thau dhal phon hatung hatai di Duy Anh sangka tal adei sa-ai. Khaol dahlak hu daong brei pandap mbang, hu pren yava piah ngak siam bruk ngak di drei, daong jhul kadhul likuk jit ruak..

Urang likei – Trung úy daok ranaih umo Nguyễn Duy Anh jeng daok abih drei angaok jalan ngak bruk pahla. Bruk ngak siam gheih di Duy Anh haong ayut sahabat, dom urang ngak pahla daok truac hadah dalah apui caong khin samar jhul kadhul likuk jit ruak, bhap bani hu mai veik haong rai diuk siam mekre yau dahlau daih, bak bui sambai./.

Uang lang: Jasi -27/9