Baoh sang ong Hoàng Minh Thông di palei 3, xa Phú Văn daok dalam huyen tapen negar Bù Gia Mập, rinh Binh Phuoc pala labaih 1.000 phun kaphe dalam bein pa-aok blait labaih 20 thun. Labaih 10 thun tapa, kaphe hu pala dalam bein pa-aok blait ba mai jien mek tame yaok rituh trieu dong yaok thun ka baoh sang.

Ong Hoàng Minh Thông brei thau: Rilo thun tapa, baoh sang ong hu pandar taneh saoh dalam bein pa-aok blait piah pala phun kaphe. Haong taneh pala pablak rilo phun dalam labaih 2ha saong yaom pablei thun 2023 lac 80.000 dong sa kilo hu jien mek tame jaik 300 trieu dong. Kaphe pala mala phun pa-aok blait yaom lac paik oh hu rilo asar min hu cakrok patagok tani tanat dalam langik pandiak di Binh Phuoc.

Daok di xa Đường 10, huyen Bù Đăng, baoh sang ong Đỗ Đường Dự daok di palei 5 tapa rilo thun pala tok sa phun pa-aok blait. Kayua yaom mek baoh nang xuat, yaom kaom oh tani tanat nan thun 2018, ong pala pablak muluk phun kaphe di taneh saoh dalam bein pa-aok blait saong bein durian oh ka kaip dhan. Daok takai phun pa-aok blait ye pala muluk phun amraik kalu. Kein lagaih praong abih di bruk pala muluk pablak ieu lac hu rilo jien mek tame dalam sa taneh, phun ini lahik bilan, lahik yaom ye phun karei mek hu jien. Meng bruk ngak ini, dalam 4 thun tapa, thun halei bein phun di ong Dự jeng cakrok patagok siam hijao, brei nang suat glaong, hu jien mek tame meng rilo janih phun karei di gauk.

Ong Đỗ Đường Dự brei thau, thun 2023, pala kaphe dalam bein pa-aok blait hu 3,5 tấn kaphe sa ha, daok kaphe pajaih hala pa-aok ye pala dalam bein durian mek hu meng 3,8 tấn tal 4 tấn asar sa ha. Baoh sang ong brei buh tame pala, gam haong drak khak piah ka phun oh kurang khak dinh duong, hu prein yava saong caga ruak siam.

Tui ong Dự, piah ka bein phun cakrok hijao siam, mek hu baoh karaoh siam nang suat glaong, urang pala brei ruah hu janih phun pala njauk piah pala pablak, pala hu rilo mbang, pandar khoa hoc ky thuat jeng yau sangka, drak khak ka phun pala njauk haong yaok tukvak cakrok.

Ong Nguyễn Phú Hải, Akaok Chi hoi Urang ngak nong palei 5 xa Đường 10 brei thau, di palei urak ini hu labaih 75% baoh sang pala phun kaphe, dalam nan hu labaih 55% baoh sang daok pala pablak muluk haong phun karei. Bruk pala muluk phun kaphe, phun amraik kalu dalam bein pa-aok blait, bein durian daong mikva dalam palei daok pandar taneh saoh dalam bein phun piah pala muluk pablak mala dhar phun biak siam lagaih. Kuhria dom thun anak tal, dom baoh sang pala phun muluk di bhum palei daok glaong tagok jang.

Ong Hoàng Văn Đoàn, Akaok Kapul Urang ngak nong xa Đường 10 brei thau, bruk pala pablak maluk hu bhum palei pachreih ka urang ngak nong, abih di nyu hu dom baoh sang takik taneh bein, baoh sang mikva bangsa takik.

Urak ini, di rilo bhum palei dalam tinh Binh Phuoc, rilo baoh sang rahra mboh hu kein lagaih praong glaong dalam bruk pala pablak muluk rilo janih phun dalam sa taneh. Tinh Binh Phuoc pachreih urang ngak nong peih tabiak jalan ngak bahrau, ngak njauk, hu khang kajap saong ba mai rilo jien mek tame./.