Ong Lương Tấn Đạt hu 4 baoh danao ikan bei, yaok kavei hu labaih 1.500m2. Ong tuk halei jeng palao raong 3 kavei, daok 1 kavei hu pasiam srap gap caik dahlau. Danao brei caik daok saoh ieu lac bruk khik siam brei ka bruk ngak jak jeng di ong.

“Bilan hajan, ia taba ngak ka ikan bei suai praong ye dahlak hulin palao ikan tabiak danao raong hadang. Tuk nan, ikan mebaoh biak samar drah, tal akaok bilan thu, thac ia dalam kavei pataom ikan gilac blaoh neh rabha piah ba tame raong dalam danao. Meyah mboh ikan ruak ye panduan ikan tapa danao karei lac bruk siam lagaih di abih, jru cavao ye brei pandar takik. Tuk raong ye brei srap gap dahlau danao karei, piah meyah iakan hu gaok ruak ye drei thac ia tabiak, ba tapa danao karei”.

Ong Đạt hu raong ikan bei hu 15 thun saong jeng lac urang akaok meti ngak bruk ini di xa Phú Mỹ. Tui langyah di urang taha, ikan bei raong tui jalan ngak kong hu ngak biak rilo, tal tuk ikan mabuh ruak meng dom janih anek ruak, virus ngak ruak pambak drah dalam halau ia. Bruk langyah ikan halei hu njauk ruak, oh hu ruak tabiak truh danao kavei ye lac bruk oh lagaih. Tuk nan, tok brei caik karei dom drei ikan ruak trak, ikan laka rup, daok dom ba taong abih tapa kavei bahrau. Labik ia hacih sa-at brei daong ikan samar drah pacang cakak ruak, ta-eng drei abih ruak.

Meng jalan raong ini, gam haong bruk hu dom ikan ritaong hu dahlau dalam kavei piah ngak ndap mbang ka ikan bei blaoh baoh sang ong Lương Tấn Đạt hu jien mek tame rilo. Meng blaoh, baoh sang mek pablei 1 ikan danao di drei, jeng daok hu jien laba siam: "Dom thun bahrau akaok meti raong hu jak jeng rilo, dahlak hulin raong meng thun 2010. Raong ikan bei hu kaya ndap mbang ye bhian brei mbang, oh hu ndap mbang ye 2 - 3 harei brei mbang sa var jeng hu. Meng harei daih dahlak hulin mek ikan dalam 1 kavei, ruah drei ikan praong pablei hu jaik 60 trieu, meyah pablei abih kuhria jeng hu labaih rituh trieu".

Ong Lương Tấn Đạt ieu lac sa urang bol lin meng kal dahlau, thun ini umo 78 thun min jeng daok tari taring ngak bruk di urang bol lin dalam jaman sron mbon. Ong ndom meyai lac: “biar halei oh daok prein yava piah raong ye padeih”. Langiu di nan, ong daok bhian daong dom anek saong mikva dalam xa raong ikan.

Ong Đạt dalam jaman mesuh metak hu rilo bruk rik daong saong hu karja pok alin hadiah Huy chuong taong khamang dak Hasa. Daok di jaman sron mbon, ong oh lac sa janih urang naih gheih ngak bruk laoh daok tuk halei jeng halan tian parabha jalan raong glang di drei piah daong ka mikva rahra piah patagok bruk raong ikan haong gauk. Ong Phan Văn Hung, Urang bol lin xa Phú Mỹ meng kal hu taong yaom:

"Di ini ye sa-ai Hai Đạt maong yau ye urang dang akaok dalam bruk ngak mbang di bhum palei. Sang ong ngak mbang patagok meng bruk raong ikan bei, raong hadang siam lagaih jeng mbiah min oh tal raong iakan bei. Yaok thun klau danao kavei ikan di sa-ai hu jien laba tame sang labaih 150 trieu. Sang Urang jeng hu 3ha taneh danao raong yau di sang sa-ai bo oh raong ikan bei ye mboh alah paje. Dahlau daih sang halei jeng raong hadang, tal tuk mboh sang di sa-ai raong ikan bei jak jeng ye rilo urang mai bac megru, ngak tui. Karja Xa ba tabiak bruk hagait ye baoh sang sa-ai jeng ngak siam, dalam Kapul urang bol lin meng kal jeng yau nan, kayua baoh sang hu ngak bruk katmang meng kal mai".

Urang Bol lin meng kal angan Lương Tấn Đạt daok peih tabiak sa jalan nao, urang nao dahlau bruk raong ikan bei di bhum palei. Meng di nan, baoh sang ong dak harei dak hu mbang hu ngui. Rilo urang di bhum palei hu bac megru bruk raong ikan bei di urang bol lin meng kal piah patagok bruk ngak mbang. Jalan jak jeng di ong lac ngak pataom hu ilamo saong tuk halei jeng tari taring kham marat chreih hatai tame bruk ngak mbang./.