Dom thun 2010, dalam bruk taong mek kaya ikan dalam ia takik gilac ye bruk raong ikan ia meteh mbak meteh taba hu danei tagok yau sa jalan nao lagaih di Bhum taneran kraong Cuu Long. Mboh ikan chẽm meda lagaih haong langik tasik di bhum njom ia mbak di Soc Trang, ong salih kavei ia raong hadang jeng kavei raong ikan chẽm.

Meng akaok meti, kayua darak pasar daok oh ka thau tal rilo, ong palao raong gap takre di angaok 1,5 ha. Thun akaok meti, mek hu labaih 50 – 70 tan ikan. Ngan haong jalan sahneng “gam ngak gam bac”, ong dak harei dak peih praong bruk ngak. Tal puac thun 2019, ong padeih truh bruk raong hadang, buh jien abih tame raong ikan chẽm ngan haong bruk raong di dalam 40  ha tui jalan raong pablak ngak kong.

Labik raong buh bruk tame raong tani tanat ngan haong majam salih ia, khik kajap labik daok tani tanat ka ikan praong lagaih. Tui ong Dũng, piah raong ikan chẽm jak jeng, brei njauk ngak dahlau lac bruk pasang iek ia, abih di nyu nan lac tanut mbak brei khiki tani tanat meng 5 - 15‰. Drei pajaih bri hu pilih ruah tani tanat, praong labaih 10cm tuk palao raong. Tukvak raong meng 8 – 12 bilan, patui darak pasar piah pablei

Tui ong Dũng, ngak nong oh lac sa janih ta-eng bruk ngak tabiak. Caong khin patagok karo kajap ye brei padang bruk ngak nong pambak tame dalam 4 bruk: ha tang salah blaoh; kapul urang saong majam pasang iek tani tanat; pandar ilamo khoa hoc ky thuat; thau ka hatai caong, pasang iek asar siam ndap nda piah pablei tabiak langiu negar.

Urak ini, labik raong ikan di ong Dũng ieu lac labik raong ikan chẽm praong abih di labik Bhum taneran kraong Cuu Long, yaok thun pabak labaih 1.000 tan ka dom baoh sang ngak ndap nda pablei tabiak langiu negar phi lê ikan chẽm tapa nagar Thai Lan, Australia, My, Canada saong Trung Ndong. Gam saong di nan, hu labaih 2.000 tan pablei dalam negar, rilo meng lac di Ban raya Ho Chi Minh, Can Tho, Long An, Tien Giang…Meng nan, ong hu jien mek tame yaok rituh ti dong yaok thun.

Oh lac tok ngak meda ka drei, ong Dũng daok pambuak saong 5 – 10 baoh sang raong dalam labik, daong ilamo ky thuat, drei pajaih saong pataom blei ikan hu tanut njauk piah pablei. Ong padang ka pul 10 urang ky su pasang iek tapak di dom bhum raong, khik kajap bruk praong siam samu gauk saong hu thau cambaih laih mai meng halei. Nan lac sa asal kadha pasak piah meraik haong dom darak pasar praong yau nagar Trung Quoc, Thai Lan, Malaysia…

Yaom mada ngak jeng, ong DŨng tuk halei jeng khik hatai caga: “Kaya dalam ia lac gah mariak gauk kan kandah, oh lac sa bruk brei ngak samar drah. Khin ngak tui jalan suai atah ye brei ka hu ilamo, hu hatai kham merat saong abih di nyu nan lac pambuak gauk khang di urang raong, sang mac ngak ndap nda saong gah ngak mbang pablei tabiak langiu negar”.

Ong Phan Văn Hà, Akaok balai pachreih ngak nong huyen Trần Đề brei thau yaom kaom ikan chẽm duh tame rilo bruk meng jien buh tabiak ngak, bruk tagok trun di darak pasar. Kayua yau nan ye, urang raong brei padang bruk pambuak haong gah ngak mbang pablei salih, pablei tabiak langiu negar piah patagok karo kajap. Langiu di nan, urang ngak nong brei kuhria tani tanat, hu bruk ramik caga tuk ngak jalan ngak ini kayua phun jien buh tabiak biak ralo./.