Atah pasak xa Phước Hà labaih 2km tui gah Meraong, labik taneh pala panat Siam Thai di 15 baoh sang haong 3ha taneh tapen kraong Lu biak siam hijao, phun rilo baoh. Bein hu dak quy hoach tani tanat, hu jalan nao ginup praong ka radaih patuh pajeng panat tabiak jalan pambuak xa Phước Hà – Phước Ninh.

Mai tal bein mbau pahe asar panat Thai di baoh sang, sa-ai Chamaleá Nam, akaok palei Giá chreih chrai brei thau: Meng bilan hajan thun 2019, UB Bhap bini xa Phước Hà hu pabak pajaih saong nding katak piah mikva pala panat Siam pruh tuh takik ia, lagaih haong langik salih karei di palei. Yaok baoh sang hu pabak 120 phun pajaih di angaok 2.000m² taneh, njuk ia meng kraong Lu tagok pruh tuh ia. Mikva padang Kapul pambuak panat Siam saong hu tacei ba ky thuat jamraik sangka, ngak meng taneh tal drak khak, caga pamatai halak haling saong paik baoh. Hadei labaih 2 thun tabiak agha, phun panat Siam cakrok siam, brei baoh praong siam yamen bangi. Mikva klah rabha ilamo cakak dhan, cakak klak baoh piah phun raong baoh siam, khik tani tanat karo bruk tabiak baoh di phun.

Ba tangin pok baoh panat Thai trak labaih 15kg, sa-ai Chamaleá Nam brei thau, dahlau daih taneh ini hu mikva pala tangei, ritak saong tok pambak tame ia hajan nan brei baoh takik, jien mek tame oh tani tanat. Meng jalan salih phun pala, yaok baoh sang pala labaih 100 phun panat Siam di labaih 2.000m² taneh. Urak ini, phun panat Siam yam tame thun umo ka 5, yaok phun brei paik baoh tukik di nyu hu 2 baoh/mbang, yaok bilan paik baoh 2 mbang, yaom pablei di bein 12.000 dong/kg. Yaok baoh sang hu jien mek tame labaih 1,5 trieu dong/bilan. Meng hu jien mk tame tani tanat nan mikva hu kein lagaih paglaong raidiuk, sangka anek bik bac megru.

Panat Siam lac janih phun pala oh palai rilo prein sangka, njauk haong ilamo pala drak di bangsa raglai. Urak ini rilo baoh sang daok pandar halui phun panat piah raong palao menuk di bein.

Palei Giá hu 238 baoh sang haong 924 urang, raidiuk mikva pambak tame jien mek tame meng hamu dua mbang ngak padai meng ia bineik Tân Giang saong Sông Biêu, gam haong raong glang labaih 1.100 drei athur saong pala drak jaik 190ha puh pakak pala drak. Meng phun jien di dom Danak dak jalan ngak pakat negar ka ruk padang bahrau saong patrun kathaot karo kajap, raidiuk mikva dak harei dak hu pasiam.

Ong Rai Xuất, bi thu Chi bo palei Giá, xa Phước Hà, huyen Thuận Nam brei thau: “Ngak tui Sarak Nyaom biai Ndang bo xa Phước Hà meng thun 2025 – 2030, pakat uy chi bo urang dang akaok ndang vien saong dom kapuk jak ba mikva peih praong taneh pala panat Siam tapen kraong Lu saong pala dom janih phun mbang baoh brei yaom kaom kinh te glaong, kham merat parilo jien mek tame meng 28 trieu dong tagok 48 trieu dong/thun dalam puac thun 2025. Bruk ruah bruk ngak kinh te ka njauk lagaih, pagam haong kein lagaih hu dahlau di bhum palei, daok peih tabiak jalan nao bahrau daong ka mikva parilo jien mek tame, truh kathaot karo kajap saong padang palei pala bahrau karo kajap”./.