Sang sa-ai Nguyễn Thanh Hải, daok di xa Long An, ban sit Tân Châu, tinh An Giang dahlau ngak njam patam saong padai. Urang ralo kham marat bac magru janih jalan ngak mbang bahrau, hadei bac magru ralo labih, puac thun 2023, sa-ai raong ieik 20 tapai anek, pajaih New Zealand lai.

Tuk camreip raong dom yau tapai ma-in ka bui sambai, mboh tapai praong drah, mbuan si raong, takik ruak, pablei tabiak jeng lagaih yau nan ye sa-ai Hải peih praong raong glang. Tal ini ro var tapai di sa-ai tagok 200 drei gam tapai ine gam tapai mek ralo. Dalam nan sa-ai mek ala tong sang ngak var ro, pakurang hu jien brei ngak blaoh daok sa-at lagaih.

Tapai takre langik alam gah Pei negar, oh pacang caga tal manek mabaoh di nyu. Var ro brei puh bah yaok harei, kaya mbang sa hu janih njam puan that, brei mbang 3 mbang dalam harei, pabak nyu hu padai piah ralo khang. Yaok harei tapai mbang bih 80kg njam, hareik sap janih.

Sa-ai Hải khan lac: “Raong tapai njual min jien raba karo. Tapai raong meng 2 bilan mateh tal 3 bilan hu meng 1,5 tal labaih 2kg mada pablei hu. Jien pablei hu meng 75.000 -100.000 dong/kg tui tukvak di nyu, mboh jien tame bhian bhian”.

Urak ini di Ban Can Tho, Dong Thap, Kien Giang, Vinh Long… bhian mai sang sa-ai blei tapai anek raong yau nan ye Hải oh susah bruk pablei. Hu raong tapai jien tame sang tagok mboh cambac, raidiuk karo jang dahlau.

Urak ini, sa-ai Nguyễn Thanh Hải daok khin patagok ralo 2 mbang meng 400-500 drei tapai di thun 2026. Khin caong di sa-ai padang hu bruk raong ilamo bahrau gam raong gam pablei di labik.

Ong Đồng Văn Lâm, Phaok Akaok Kapul urang ngak Nong xa Long An ndom mayai lac: Sa-ai Hải ieu lac urang ngak nong sami samar dah krah. Meng dua klau drei tapai raong sa-ai peih praong raong patagok ralo ravan tapai. Bruk yau ye ngak main blaoh mbang biak.

Bruk raong tapai yau ye daok bahrau daka harei dak jeng jalan bhian ngak karo kajap jie tui di urang ngak nong di Tân Châu. Mayah patambak praong, nyu jeng sa janih bruk piah mbeik drei patagok kinh te bhum ngak nong karo kajap di palei.

Tapai ieu lac janih anek raong mbuan sanang lagaih raong lagaih pablei jeng ye takik jien buh tame raong nyu, darak pasar jeng ralo takre, mbang tame jeng hu siam ka rup pabhap. Mayah daong ky thuat jeng ye pambuak kaok pablei hu siam nyu mada jeng sa jalan siam brei patagok kinh te ka dalam baoh sang./.