Mbang pala ini, urang ngak nong pala hu baoh, hu yaom yau nan ye mikva biak uan tabuan. Gam saong kuhria paik hu 20 tan/ha saong yaom kaom hu urang pataom blei meng 7.000 - 7.500 ndong/kg, urang ngak nong mek hu yaom paik baoh meng 140 - 150 trieu dong/ha.

Ieu lac sa janih phun hu pala rilo di bhum taneh Đồng Tháp Mười, dalam tukvak blaoh tapa, urang ngak nong Tien Giang hu jah peih taneh, pala hu jaik 15.400 ha baoh menaih, pala praong abih dalam bhum hujung kraong Tiền, rilo abih di huyen Tân Phước, yaok thun brei labaih 300.000 tan baoh.

Piah patagok kein lagaih di phun baoh menaih di bhum taneh Đồng Tháp Mười, bhum palei pataom pala phun menaih di dom xa  Hưng Thạnh, Mỹ Phước, Thạnh Mỹ, Thạnh Tân, Tân Hòa Đông… di dalam huyen Tân Phước, bhum taneh njom lakhun mbak trak, langik oh lagaih, rilo di nyu meng lac taneh glai klo dahlau daih.

Langiu di nan, Tân Phước daok sangka iek praong ka bruk salih tapa ilamo khoa hoc ky thuat, chreih chrai tacei ba urang ngak nong ka ilamo ky thuat pala drak, pilih ruah pajaih siam, pasiam saong ngak meda lagaih ka bein pala phun baoh menaih, ngak ka nyu brei baoh karei bilan piah hu baoh paik luac thun. Gam saong di nan, ruah dom pajaih phun baoh menaih siam piah pala, ba tame dom pajaih bahrau angan MĐ2 hu rilo kein lagaih tame bruk ngak mbang piah parilo baoh menaih saong asar praong siam di ndap nda.

Rilo bruk salih ilamo ky thuat ka urang ngak nong pandar ba tame bruk pala darak, daong parilo baoh paik hu saong asar siam baoh menaih tuk ba tabiak darak pasar yau ye: Bruk ruah pajaih menaih hu angan Queen piah pala di taneh bhum Hưng Thạnh; bruk “Pala menaih angan Queen tui jalan karo kajap di ban sit Hưng Thạnh”; Salih bruk pala baoh hu tanut angan VietGAP di phun menaih saong hu pabak harak gar brei angan taong abih 134 ha taneh…

Njauk di nyu dalam nan ieu lac, gam saong ilamo ky thuat langyah ka baoh karei bilan hu urang ngak nong bhum pala drak hu pandar rilo daong ka baoh menaih di Tân Phước brei paik baoh luac thun. Meng nan, pasiam caga dalam bruk baoh rilo, ye lahik yaom, urang ngak nong sahnang hatai jhul khang bruk pala baoh manaih.

Meng dom thun akaok pluh thun 90, ong Huỳnh Phi Sơn hu ba rahra mai jah peih taneh bahrau, ba urang dalam sang mai ngak mbang di xa Hưng Thạnh brei thau, ong jah peih taneh pala hu 5 ha phun manaih. Bac megru saong pandar ilamo jamraik pala drak phun menaih, yaok thun ong ngak brei paik hu 6 mbang pala menaih/thun, langiu di jien buh tabiak mek hu jien laba labaih 400 trieu ndong/ thun. Meng kein lagaih di bein pala menaih, ong Sơn peih mbang ngui, ong hu ieu lac urang kaya trieu phu di bhum taneh Đồng Tháp Mười urak ini.

Ong Nguyễn Văn Diện, daok di ban sit Mỹ Phước hu jah peih taneh pala hu 5 ha phun baoh menaih. Meng pandar samu saong siam lagaih dom jalan langyah pala drak tui ilamo jamraik bahrau, ong paik hu 25 tan/ha. Gam saong yaom baoh manaih tuk halei jeng hu khik di trut glaong, meng 7.000 - 8.000 dong/kg, yaok thun, baoh sang ong mek hu kein lagaih labaih 500 trieu dong.

Tui mikva urang ngak nong ye gam saong kein lagaih padang bhum pala phun manaih ngak ndap nda praong abih di bhum hujung kraong Tiền yau urak ini daok peih tabiak kein lagaih bahrau piah ka urang ngak nong bhum taneh bahrau jah peih di taneh Đồng Tháp Mười peih mbang ngui saong ngak meda karo kajap./.