Ikan mú trân châu lac ieu sa janih ikan ia tasik hu yaom glaong. Ikan hu takre kayua ralo bangi, pahe bangi, lamek saong hu rilo siam ka rup pabhap. Ikan mú tran chau meda hu ngak jeng rilo ndap mbang bangi, dui pachreih tuai damuai. Hu thau kein lagaih piah patagok janih ikan ini, thun 2004, sa-ai Hải hu raong iek dahlau 1 danao ikan mú trân châu. Meng akaok meti raong sa-ai gaok rilo kan kandah, kayua takik saong jien buh tame takik yau nan ye ikan suai praong saong khat lahik biak rilo. Ngan haong hatai caong duah thau, bac megru, oh duh hatai anak dom kan kandah, sa-ai Hải tari taring bac megru ilamo tui meng harak tapuk, internet saong dom urang raong ikan lavik thun.

Sa-ai Hải buh jien tame ka danao raong ikan, jalan tuh ia tui ia tame tabiak, pandar ilamo jammariak tame bruk brei ka ikan mbang saong pacang caga ruak di nyu. Urak ini, sa-ai Hải daok pandar bruk raong ikan mú trân châu dalam danao hu lang tamra HDPE. Meng pandar ilamo khoa hoc ky thuat bahrau, sa-ai Hải ngak hu jak jeng dalam bruk pasang iek jit ruak, paglaong bruk diuk rai saong bruk cakrok di ikan. Tui sa-ai Hải piah ka ikan praong siam, bruk iek glang tame ia biak njauk caik hatai. Meyah ia hacih sa-at, hu ginup oxi, ikan hu cakrok siam. Ia meng tasik hu njuk tame danao ka 1, sa-ai Hải pandar cun, jru piah pasiam ka ia. Tuk ia hacih sa-at, ia ganap PH, brei salih tapa danao yang ka 2 piah palao ikan tame raong.

 Langiu di nan, bruk pilih ruah pajaih ikan praong do gauk, ikan khang kadang, luai drah samar, oh jaoh jo, oh hu ruak hagait. Tuk bahrau palao tame ye ikan oh mbang, hadei dom harei ye palao pandap ka nyu mbang madeit madeit, yaok harei brei ka nyu mbang 2 mbang di tuk hadah page saong biar harei mesup. Tal tuk ikan praong ye brei mbang 2 harei sa mbang. Sa-ai Hải brei thau: “Danao raong di dahlak hulin pagam he thong majam bluh angin, tadik ia, khik kajap bruk pabak oxi ka ikan. Gam tui di nan, dahlak hulin brei pandap mbang meng ngak kong hu thau cambaih laih, pagam saong brei mbang ndap that yau ye anek ritaong piah pabak prein ka ikan”.

Urak ini, sa-ai Hải daok raong ikan mú trân châu di danao praong taong abih labaih 1,5ha. Yaok mbang sa-ai palao 24.000 drei anek ikan pajaih, yaok drei atah 6cm. Ikan bhian hu palao raong meng bilan 2 saka ia bilan tal labaih bilan 11 saka ia bilan blaoh brei mek. Yaok drei ikan mek hu trak meng 0,9kg tal 1,2kg/drei. Yaok thun, sa-ai pablei tabiak darak pasar labaih 12 tan ikan, hu dom urang blei ikan saong dut iek di danao raong, saong yaom pablei kuhria rah tapa meng 190.000 tal 250.000 dong/kg.

Tuk jak jeng dalam bruk ngak mbang raong glang, sa-ai hu chreih chrai klah rabha ilamo, ky thuat raong ikan brei ka mikva jaik taphia. Sa-ai bhian tacei ba rahra bruk raong ikan mú trân châu siam lagaih. Bruk ini hu daong brei bruk ngak ka 2 urang, ngan haong jien bilan 7trieu dong/urang/bilan.

Urang dang akaok xa Thuận Yến brei thau, “Bruk raong ikan mú trân châu di sa-ai Nguyễn Thanh Hải sa urang hu angan naih gheih dalam bruk ngak mbang di bhum palei. Meng bruk daong di sa-ai Hải, rilo baoh sang raong ikan muk jak jeng, daong parilo jien mek tame saong pasiam raidiuk. Tukvak mai meng anak tal, xa brei patui peih praong bruk raong ikan dalam ia di xa hu tagok ralo jang”./.