Tui gah ngak nong tinh Soc Trang, dom baoh sang raong ikan dalam danao hadang brei ngak tui jalan raong tablak dua bilan raong hadang sa bilan raong ikan saong palao raong ikan saong hadang raong dalam danao piah pasiam ia saong pacang caga siam dom janih jit ruak di hadang raong. Min, ikan tok pablei rilo di darak pasar dalam negar nan baoh sang rahra oh brei patagok rilo danao raong ikan piah plaih bruk ikan pablei rilo jang dut haong hatai caong blei ikan di darak pasar.

Di huyen Trần Đề, tinh Soc Trang, kayua yaom oh tani tanat saong jit ruak di hadang rilo yau nan ye urang raong kanda gireih di dalam bruk paralo paraong danao langiu di nan brei ruah ikan ia taba, ikan ia meteh mbak meteh taba piah raong dalam danao hadang.

Labaih 5 thun raong hadang ia meteh mbak meteh taba min jaik 1 thun mai baoh sang ong Huỳnh Khánh Lượng (xa Trung Bình, huyen Trần Đề) hu salih dom danao tapa raong ikan. Ong Huỳnh Khánh Lượng brei thau, baoh sang ong hu 13 ha danao raong hadang ia meteh mbak meteh taba, dalam nan hu 3 ha raong hadang ilamo kong nghe glaong. Yaok thun, hadang menek mabaoh rilo drei min kayua yaom kaom trun biar yau nan ye 2 thun ini mai baoh sang ong meng brei salih 15 baoh danao raong hadang tapa raong ikan yau ye: ikan nàng hai, ikan dứa, ikan chẽm… haong tukvak raong meng 8-12 bilan; yaom pablei ka urang ikak meng meng 60.000 - 100.000 dong/kg. Langiu di paok jien buh tabiak baoh sang di ong hu jien laba labaih 1 ty dong/thun.

Tui ong Huỳnh Khánh Lượng, raong ikan dalam danao hadang hu rilo kein lagaih yau ye pasang iek jit ruak, labik raong siam nan ieu lac ikan praong samar drah, jien buh tabiak raong takik, takik gaok jit ruak yau hadang urak ini. Yaom lac raong ikan tukvak suai min kein laba glaong jang atau samu haong raong hadang jaman ini.

Soc Trang hu taneh raong ikan hadang 74.000 ha. Tui taong yaom gah chuc nang karja, gam saong dom baoh danao raong hadang hu baoh sang salih tapa raong ikan ba mai kein laba rilo mbiah nan baoh sang raong hu khik tani tanat rilo di dom thun tapa.

Ong Đồ Văn Thừa, Phaok akaok Jabat Ikan hadang tinh Soc Trang brei thau, tukvak tapa bruk salih danao raong hadang ia pablak meteh mbak meteh taba tapa raong ikan hu rilo baoh sang rahra bhum raong hadang dalam tinh ngak. Rilo baoh sang raong tablak dua bilan raong hadang saong sa bilan raong ikan dalam danao piah pasiam ia danao daong pacang caga dom jit ruak ka hadang.

Bruk raong ikan dalam danao raong hadang yaom lac bahrau hu ba tame ngak di rilo thun jaik ini min nyu ba mai rilo siam lagaih ka rilo baoh sang rahra, dom janih ikan rilo meng lac ikan kamora, ikan chẽm, ikan hồng mỹ, ikan caklait, ikan halăng,… Piah baoh sang raong ikan mek hu rilo ikan, jabat brei peih dom tal bac megru piah tacei ba bruk raong ka baoh sang saong khan brei thau tal baoh sang raong dom janih ikan njauk samu haong kein lagaih langik tasik yaok bhum, hatai caong di darak pasar piah baoh sang raong ruah hu janih ikan njauk lagaih./.