Sa-ai Nguyễn Đình Lạc ba khol dahlak hulin rivang iek bruk raong anek dúi di baoh sang sa-ai brei thau, thun 2015, hu yut cuai sahabat yaih khan, sa-ai blei 5 yau anek dúi ba mai raong. Hu mblang chai anak sang, sa-ai pandar kiak men ngak jeng dom labang pak meta nde gauk praong 50x50cm piah palao anek dúi tame raong. Tuk bahrau raong kayua oh ka thau dahlau yau nan rilo drei mabuh ruak blaoh metai. Oh alah di tian, sa-ai brei pabak saong tari taring duah thau, bac megru ilamo raong anek dúi di ayut cuai sahabat, tapuk harak saong angaok dom blah internet.

Sa-ai Lạc brei thau: “Dahlau daih, dahlak hulin jeng raong glang rilo janih anek athur, mboh oh hu siam lagaih yau nan ye salih tapa raong anek dúi. Meng akaok meti oh plaih hu dom kan kandah, min tapi meng hu pandar njauk ilamo blaoh tapol anek dúi khang kadang saong menek samar drah. Urak ini baoh sang hu 3 labik raong anek dúi di mblang taneh labaih 100m2”.

Anek dúi mbuan si raong, jien buh tame takik, oh lahik rilo prein raong glang. Min  meyah nyu mbang njauk kaya mbang ma-ih, ndik bimao, anek dúi njauk ruak barah pruac atau mayah hadah tanrak biak khang jeng ngak ka anek dúi mbuan si pandik meta, ngak kanjah jhak tal bruk pamanek di nyu. Kayua yau nan ye, var ro raong anek yuik brei ka laneing lanoi, caga plaih tanrak ia harei pasang tapak; bhian pahacih sa-at, pruh jru pamatai anek ruak 1 mbang sa adit daong ka anek dúi hu labik daok kein lagaih. Langiu di nan, pandap mbang ka anek dúi brei that bingi, thu njak.

Ilamo raong anek dúi di sa-ai Lạc mboh anek dúi oh menyum ia, kaya mbang rilo meng phun kreim oh biak taha atau oh biak meda, phun tabau, asar tangei, habei bhong, habei plom. Anek dúi mbang takik min tapi nyu mbang malam, ndih harei. Kayua yau nan, njauk brei ka anek dúi mbang 1 mbang dalam tuk tame garauk grip. Di tukvak menek, anek dúi nyu mbang takik jang dut haong tuk bhian, brei raong di labik karei saong bhian caik hatai glang iek.

Yaok thun, anek dui 3 mbang anek, yaok mbang manek 2 drei. Hadei anek hu labaih 2-3 bilan pablei hu anek pajaih, yaom jien pablei 1,6 trieu dong/yau. Tui anek dúi ane mek ralo, raong 7-8 bilan hu 1-1,2kg/drei, yaom jien pablei meng 700-800 ribau dong/kg ralo. yaok thun kuhria rah tapa di labik raong anek dúi di sa-ai Lạc pablei tabiak darak pasar labaih 100 yau anek dúi pajaih, 300 drei dúi mek ralo. Meng di nan mboh yaok thun, baoh sang di sa-ai Lac hu jien mek tame jaik 400 trieu dong hadei di kaoh abih jien buh tabiak raong glang.

Ong Hoàng Ngọc Anh, Akaok Kapul Urang ngak nong huyen Lộc Ninh brei thau: "Raong anek dúi oh lac sa bruk bahrau di bhum palei min bruk raong hu cih tabiak jalan bahrau saong siam lagaih yau ye sang sa-ai Lạc ye daok takik. Tukvak meng anak, khol dahlak hulin pambuak haong dom kapul pathau khan, jak ba baoh sang rahra hu hatai caong khin raong anek dúi mai rivang iek, bac megru bruk raong glang di sang sa-ai Lạc. Gam tui di nan, peih bruk bac pasram, tacei ba ilamo raong anek dúi piah peih praong, daong ka rahra hu bruk brei pilih ruah, rilo jalan ka bruk ngak raong glang, parilo jien mek tame”.

Piah daong ka rahra bhap bini buh jien tame raong glang hu siam lagaih, langiu di brei pajaih anek dúi sa-ai Lạc daok pato tacei ilamo raong glang jeng ye gam blei abih anek dúi di rahra urang raong glang di dalam bhum palei gam saong hatai caong pambuak talei ngak mbang, padang angan kaya anek dúi siam glaong. Tapa di nan, daong ka rahra pagam rup ngak mbang suai atah saong patagok bruk ngak mbang meng bruk raong anek dúi ini./.