Bein praong labaih 3.000 m2 di ong Nhựt daok di palei An Thường, xa An Thạnh 1, hu angan grauk palei, kayua ieu lac sa labik akaok meti camereip ngak jeng pajaih baoh man hu angan hu yaom glaong di abih dalam darak pasar urak ini. Phun daok tabiak chrai baoh gam tui oh ganap brei ka urang khin blei.

Dahlau si pala phun baoh man bhong merah MST, ong hu labaih 15 thun pala phun gara thanh long ralo merah. Labaih 4 thun dalau, ong Nhut pakatuah hu mbang baoh man bahrau gam mboh lamen langem, macam dan saong mbau pahe karei dut tui baoh man bhian mboh. Njauk hatai saong baoh mận ini, ong duah blei hu 150 gok pajaih di sa urang yut sahabat, sa phun yaom 250.000 dong.

Tuk ba tame pala phun baoh man bhong merah MST, ong Nhựt buh ralo tukvak masa nao tal dom baoh bein di Ben Tre, Tien Giang piah bac magru ilamo. Tuk nan dom baoh bein daok pala sit pala takik jeng daok ngak ieik yau nan ye ong jeng gaok kan kandah piah duah tatan tu ilamo ngak siam di abih.

Mai meng bein taneh hu sagait, ong beik ro glaong, ngak jalan patathuak ia brei ka karo, dak majam pruh ia otomatik. Man bhong merah MST pala labaih kurang 10 bilan brei tabiak baoh akaok meti. Meng mbang paik baoh ka 2, tuk phun karo, ong Nhựt meng brei cakak taduk cakak bingu. Tal mbang ka klau nao, yaok phun brei tabiak baoh meng 100kg tagok di dalam sa thun.

Mayah iek glang siam, phun baoh mận bhong merah MST mada brei tabiak baoh luac thun. Mung tuk phun baoh man bhong merah MST coh bingu tal tuk tabiak baoh labaih kurang 105 harei. Urang ngak Nong pan kajap ilamu ky thuat pala mada mek baoh meng 3-4 mbang dalam thun.

Ky thuat phun baoh man bhong merah MST kan jang dut tui phun baoh mận bhian karei kayua baoh mbuan si bram jeng ye druh kaok tadak. Bruk papaok baoh, pilih baoh njauk caik hatai kayua nyu pambuak saong bruk brei siam baoh di phun kayau. Urang pala njauk caik hatai brei papaok baoh tuk nyu praong nde ine tangin, druh balau. Pajaih baoh man ini brei tabiak baoh biak ralo, min mayah urang pala oh pan tantu ilamo ky thuat ye phun oh khang, mbuan si laman lamuac, mbuan si ruak. Langiu di nan, phun tagok siam kayua ro nyu glaong, glaong di mbaok ia takik di nyu meng 70-80 cm, mayah nyu biar mbuan si bruk gha.

Tui harei bilan phun nyu praong blaoh urang pala brei ba ia ka nyu lagaih. Tuk nyu cok bingu saong si tabiak baoh, phun khin ralo ia piah hu prein tagok. Daok tal tuk jaik si piak baoh dak tukik ia jang daong ka baoh nyu macam, meng bingi yamen pahe. Ong Nhựt buh jien blei majam pruh ia labaih 30 trieu piah ba ia ka njauk tukvak di phun di baoh.

Bein phun baoh man bhong merah MST di ong Nhựt ieu lac sa labik hu angan brei pajaih ka ralo urang ngak nong dalam bhum palei jeng ye labik jaik taphia, gam tui yaom blei labaih kurang 70.000 dong sa dhan. Thun blaoh, po bein pablei labaih 2.000 phun pajaih, daok thun ini oh ganap piah pablei. Bahrau kuhria meng akaok thun tal masa ini, ong pablei blaoh 1.000 phun pajaih blaoh daok hu tuai dak dahlau 5.000 phun pajaih.

Ong Nguyễn Văn Đắc, Akaok jabat ngak Nong saong Alam huyen Cù Lao Dung, brei thau meng labaih 5 mbiah mai tal ini, huyện tamuh bruk pala phun baoh man bhong merah MST. Mboh lac pajaih ini lagaih saong bhum taneh di dalam huyen. Taong abih di dalam huyen urak ini hu mangaok 50 ha pala phun baoh man bhong merah MST.

Urak ini phun baoh man bhong merah MST daok mek angan ieu lac janih baoh karaoh OCOP 3, gam pablei mbiah hu siam. Min ralo jabat karja jeng daok brei iek jalan pala ka lagaih jeng ye ieik glang ilamu pala ka ganap tantu dalam bruk ngak mbang pala drak./.