2 thun ini, sa-ai Nguyễn Thị Hà daok di khu ban 9, phường Minh Hưng buh jien tame padang bruk raong nethun dalam bein praong 400m2. Urak ini bein raong hu labaih 300 drei anek nethun, dalam nan hu mateh dom nethun ine amaik ime. Var ro anek nethun padang di labik glaong huan, oh kandaong ia. Dom ro nethun padang jeng 2 talei, di kreih ro hu jalan nao piah tabak ba angan mbang ka nethun. Dalam var parabha jeng ralo ro praong meng 4-9m2. Yaok ro hu tanang buh kaya mbang di nyu, hu tanang padang ia menyum kanyu, hu labik brei ka nyu ma-in nduac nao mai. Tui var ro nethun praong atau sit blaoh brei kareik meng 4-8 anek nethun. Paga var ro glaong 1,2m, mek halam B40 pabang angaok var ro brei caga nethun ndik tapa langiu.

 Nethun ieu lac janih nek mbuan si raong, kaya brei ka nyu mbang hu dom janih baoh kayau, njam patam, bei baoh, asar tangei. Harei harei brei kriem ka nyu 2 mbang, vaktu var page brei ka nyu mbang baoh kayau, njam patam, bei, baoh, biar harei brei ka nyu mbang tangei pabak asar tapung. Di dalam bein ro praong, sa-ai Hà piah 4.000m2 taneh brei pala phun panat Thái drah brei baoh piah brei kaya mbang ka bein raong nethun di drei.

Sa-ai Hà ndom mayai lac: “Raong anek nethun brei pambang meng njam patam baoh karaoh dalam glai. Drei bhian mek baoh kayau, bei baoh khut di darak pasar mai pambang ka nethun. Kayua hu brei mbang meng kaya labaih, 1 mbang nyu manek brei raong labaih 1 thun meng pablei hu, tapi min oh bih ralo jien blei kaya mbang”. Brei ka bruk iek glang, nethun ieu lac janih binatang dalam glai, prein nyu khang, tukik ruak kik. Min, mayah nyu mbang gaok janih kaya mbang oh bhian, kaya mbang njom anek ruak, nethun mbuan mabuh ruak iaik chraoh. Piah padam ruak, caik hatai brei pambang kayu hala uaic, patei hijau, hadei dua klau harei ruak di nyu mada cadu blaoh padam abih.

Anek nethun raong hu 12 bilan nyu mada pamanek hu. Sa thun nethun manek 2 mbang. Tui thun di nyu, blaoh nethun manek jeng karei di gauk. Nethun tơ mada brei manek meng 2-3 drei anek /sa mbang, min nethun taha tok manek hu 1 drei. Anek nethun anek raong meng 15 bilan tagok mada ralo pablei hu. Sa drei nethun praong meng 10-12kg, mada hu nethun tagok tal 15kg. Barau meng blaoh, sa-ai Hà peih pablei labaih 100 drei anek nethun, yaom jien sa kilogram anek nethun 300 ribau dong. Kaoh jien raong brei raba labaih kurang 150 trieu dong.

Langiu raong nethun piah pablei ralo, sa-ai Hà daok pablei anek pajaih nethun jeng ye daong patacei kadha raong glang brei ka urang dalam palei. Anek nethun pajaih 2 bilan trak meng 2-3kg, yaom pablei 2,6 trieu dong/sa yau. Ralo nethun bingi pahe di kadan mbang huak, di labik mbang menyum hu ralo urang takre. Ralo nethun hu yaom meng 450 ribau dong/kg. Meng bruk raong nethun, yaok thun sang di sa-ai Hà duah hu jien raba jaik 200 trieu dong.

Tuk peih bein padang bruk raong anek nethun, urang raong njauk brei blei anek nethun piah raong di labik njauk hatai, pilih anek pajaih siam, caga blei nethun glai kan si raong glang, pamanek. Njauk caik hatai, nethun ieu lac sa janih anek athur dalam glai yau nan ye tuk raong nyu njauk hu harak caga jit, harak brei adat di chi cục kiểm lâm. Caong khin hadei di ni, bruk raong anek nethun mada hu peih praong, daong rik brei patagok kinh tế ka ralo baoh sang rahra di bhum palei./.