Tuk pala: Bamao sò meda pala luac thun. Min tuk lagaih di abih pala nyu di bilan 9 thun dahlau tal bilan 3 thun hadei, tuk ini, langik la-an biak lagaih ka bruk cakrok patagok di bamao sò.

Pilih pajaih: Pajaih bamao sò ieu lac dom paok kadung bamao hu tam pajaih dahlau. Mikva meda nao tal dom labik bein pala bamao piah blei mai. Njauk pilih ruah dom paok kadung bamao patih oh hu bamao hijao, bamao juk pablak, mbau lagaih, oh mbau mesam, oh hu dom baoh bangu karei. Hadei di hajan, drei juai pala chip blaoh luai ka paok kadung bimao pajaih padeih padei dom harei. Dom paok kadung bamao halei oh ka tamuh bak takai ye drei luai ka nyu tamuh bak ka meng brei pala.

Gigah cara pala bamao sò: Bhian pala bamao meng pong, pong kapah, aih kagait kayau,…pong hu takik abih di nyu lac 300kg ka meng ginup uh piah pa-auk.

Mikva brei ngak tasah pong meng ia cun tui jalan 4kg cun/ 1.000 lit ia. Tram pong dalam ia cun meng 15 - 20 minit blaoh chraong tabiak caik njak thu ia. Pa-auk pong tui jalan guan kla pa-auk ka nyu tapak, hu jamang di kreh piah thuak suan thak, prai yaok tal pong tagok kla pa-auk blaoh juak njuel, blaoh mek nilon papaok vil taom dan kla pa-auk piah khik pandiak.

Labik pala bamao sò brei khik kajap pandiak meng 20-30°C, pandiak ganap meng 80-85%. Bilik raong pala brei khik kajap caga pandiak pasang tapak, caga plaih angin tame, tanriak hadah, yava langik tame tabiak lagaih saong meda hu tuh ia tasah bo oh ngak kanjah jhak tal pandap kaya dalam sang saong bilik brei khik tasah tani tanat. Mikva meda caik dalam bilik saoh di labik sit atau dalam bilik menei (tuk halei jeng brei hacih sa-at). Drei meda caik di ala kanyan sang atau labik caik radaih.

Piah pala mikva brei srap gap kadung nilon praong 30 x 45cm, kapah asar, talei su. Kadung nilon brei hu talauk takai. Hadei di nan brei janih ngak pajaih tame kadung hu srap gap, mek tangin papait blaoh jaih tame brei kapal meng 5 – 7cm, blaon prai sa tal bamao vil taom dan kadung.

Hadei tuk tam pajaih 20-25 harei (tui tame langik), pasang iek piah raih kadung. Tuk mboh gha bamao hu cak trun takai paok kadung. Raih 6 - 8 jalan atah di gauk meng 5 - 6cm, dom jalan raih tablak tablak gauk.

Brei tuel paok kadung bamao meng talei nilon ngak jeng phun dalam sang pala bamao. Dom paok kadung bamao atah di gauk meng 10-15cm piah tuk bamao tamuh tagok oh ginuh gaok gauk saong mbuan paik laih. Meng 2-3 talei bamao pok ro ngak jeng jalan nao laneing lanoi 40cm piah mbuan iek glang raong pala.

Hadei tuk raih paok kadung hu 4-6 harei, bamao tamuh tagok, pruh ia sit sit yau ia kakuer di langiu paok kadung meng 4-6 mbang/dalam sa harei patui dom bamao mek tabiak rilo atau takik, bruk praong di bamao saong bruk tasah di yava langik glaong atau biar. Meyah kurang ia, bamao suai cakrok patagok, njuel kilo, mbang mboh khang; meyah labaih ia, bamao tagok ia kanyik, bruk bram oh siam.

Pacang caga ruak halak haling ka bamao: Dalam jalan pala bamao sò bhian njauk dom ruak halak haling ngak khat lahik. Kayua yau nan ye, piah ka bamao cakrok siam, patakik ruak halak haling brei pametai anek ruak saong pa-auk pandap tamo tui njauk cara gigah jalan.

Paik bamao: Paik kuak bamao tuk nyu praong nde pangin menyum ia sit, njauk caik hatai lac paik abih banah takai di kadung bamao. Yaok sa rai brei paik jeng 3 - 4 mbang. Hadei yaok mbang paik di 3 - 4 harei oh tuh ia, tuk mboh di dom inem calah hu tamuh dom baoh bamao sit ka meng tuh ia. Tukvak paik bamao meng 30 - 45 harei kuhria meng mbang paik akaok meti. Njauk caik hatai lac tuk paik bamao hu siam lagaih di abih lac meng mbang paik bamao akaok meti tal 30 harei hadei. Meng harei mbang ka 30 ba nao meyah mboh kadung bamao pait trun ye drei kateik paok kadung bamao trun blaoh mek talei kak taphia tame pandap tamo yau jalan kak meng akaok, blaoh raong bamao saong paik bamao yau bhian./.