Atah di ini 4 thun, sa mbang hu mbang baoh man bhong MST, sa-ai Nhựt mboh pajaih phun ini hu kein lagaih ralo kayua baoh praong, langum, yamen, mbau pahe saong takik ia. Pandar ribaong ia dalam bein hu dahlau, sa-ai kaoh klak phun thanh long, pasiam taneh, buh jien tame pala 150 phun man bhong MST, di 3.000m2 taneh.

Tui sa-ai Nhựt, baoh man bhong MST brei ka hu bruk pala drak tui jamraik glaong jang dut saong dom pajaih man karei, Caong khin ka phun cakrok patagok, urang ngak bein brei pok glaong takai phun piah plaih dauk bluk dalam ia. Langiu di nan, bruk pasang iek baoh jeng biak hu makna, luai ka tabiak biak rilo baoh, phun oh hu ginup prein piah raong, baoh sit, mbang oh bangi. Langiu di nan, sa-ai buh jien tame 100 trieu dong padang sang majam hanyuel, daong ka bein phun man patrun rilo ruak kanyik ngak khat lahik saong patak pataom 30-40% jru pacang khik phun kayau, njam patam baoh karaoh.

Dalam sang majam hanyuel, sa-ai ngak dua raok pruh ia, dalam nan hu raok pruh meng talei ba dalam tukvak phun caong hu rilo ia saong ta-eng pruh ia di takai phun piah daong phun khang kajap, baoh hu asar siam glaong.

Sa bruk karei jeng hu makna ieu lac bruk majam hanyuel saong ruah raong baoh siam praong bangi. Meyah oh papaok jam samu, baoh mbuan tanrac, bluk ia saong ngak kanjah jhak tal asar siam. Dom bruk pala di urang ngak bein brei ka tani tanat dalam yaok jalan. Sa-ai Nhựt klah rabha ilamo lac tuk baoh man praong dua akaok tanau tangin, druh balau lac brei majam samar chip. Meyah ngak oh njauk, mbuan njauk ruai kanyik kaik bangal.

Man bhong MST brei tabiak baoh yaok thun, min pataom rilo tame dua bilan pala. Kuhria rah tapa meng tuk tabiak bingu tal tuk paik baoh labaih 105 harei. Yaok phun man brei labaih 100kg baoh/thun, baoh mek hu tanut chuan trak janih 1 meng 6-7 baoh/kg.

Urak ini, urang urang blei blei man bhong MST di bein hu yaom meng 80.000-100.000 dong/kg, meyah pablei takik baoh ye meda tagok tal 120.000 dong/kg. Tukvak pataom blei, urang ikak brei pandar mac dut iek tanut saradang, meyah mek hu labaih 11% ye njauk blei.

Thun blaoh, bein man di sa-ai Nhựt paik hu 16 tan, hadei tuk kaoh abih jien buh tabiak ngak, sa-ai mek hu laba labaih 1 ty dong, oh ka kuhria jien mek tame meng bruk pablei phun pajaih. Daok meng akaok thun tal ini, sa-ai Nhựt hu pablei 1.000 phun pajaih saong daok srap gap ka harak kakei blei baoh tagok tal 5.000 phun.

Ndap nda baoh man bhong MST urak ini daok hu sa-ai Nhựt pabak di dom darak dalam tinh Soc Trang saong dom kadai pablei baoh kayau pakat glaong di Ban raya Ho Chi Minh, Ban Can Tho, Tra Vinh. Min, kayua taneh pala daok takik, baoh man bhong MST jeng oh ka pabak ginup hatai caong kakei blei di urang ikak saong gah ngak mbang pablei salih.

Dalam huyen Cù Lao Dung urak ini hu labaih 50 ha pala man bhong MST. Ong Nguyễn Văn Đắc, Akaok jabat Ngak nong saong Alam Langik huyen Cù Lao Dung ndom mayai lac, man bhong MST daok ieu lac sa janih ndap nda ngak nong hu yaom kaom kinh te glaong abih di bhum palei.

Daok di xa Đại Ân 1, man bhong MST hu mbaoh tangin brei angan ndap nda OCOP 3 patuk. HTX ngak nong Thông Minh, xa Đại Ân 1 daok ngak dom harak gar piah mbaoh tangin brei angan pajaih phun hu pablei tabiak rilo di labik huyen. Langiu di nan, dom po bein man jeng daok pamaong tal bruk patagok bruk jirah rivang ba drei tame dalam bein phun man bhong MST./.