Dahlau di abih lac ndap piah pala:

Phein praong meng 15-20 lit piah pala 1 phun saong meng 30 tal 501 piah pala 2 phun. Phein dak praong phun tamun mbuan rak gha saong njom tame hu rilo asar dinh dưỡng jang. Khak buh ka phun brei hu: khak laneng quế, khak tong hop, khak ngak meng ikan. NPK piah buh ka phun mbang baoh. Langiu di nan, brei hu jru pruh pacang caga halak halin  khik ka phun pala, kadung papaok baoh…

Taneh birau saong taneh pabam phun: Sraw rilo janih hu 60% lac taneh hacih, 40% lac bau meng kam, rak li-u, kanduh ratak lo ratak haluk, sraw hasit cur, khak laneng que, sraw haong gauk, broi sa tal bimao tricodema angaok mbaok saong pruh ia ginup tathak, gam sir pa-auk meng 7 tal 10 harei.

Taneh pala blaoh: Hadei tuk paik baoh blaoh brei tuh ia tame phein 2,3 mbang piah rao hacih khak daok kandong di mbang pala dahlau, pambu taneh meng 7 tal 10 harei hadei di nan sraw veik yau mbang dahlau. 

Asar pajaih blei mai tram tame ia pandao atau ia la-ar bhian meng 3 tal 4 mon. Srong tabiak pa-uak tame siuk tathak, caik labik la-hei, kadung nilon papaok veik saong caik dalam labik sup ka asar pajaih pacah meta samar jang. Brei buac phun tame pala dalam phein tuk phun hu 1 tau 2 hala.

Taneh dalam phein pala hu buh khak pa-uak dahlau yau nan ye oh buh khak veik tuk ini. Njauk pruh ia pagap mbiah ginup dua mbang page saong biar harei, meyah langik hajan ye oh pruh ia. Buh khak laneng saong khak tong hop, pruh ia pablak khak ikan, brei caik hatai pruh ia di vin gha, oh pruh ia dhar phun. 

Hadei pala labaih dua adit phun tabiak caduk sro tagok mejam. Kak talei ka phun sro tagok tapak. Laik klak dom caduk bilau piah phun hu prein khang sro tapak tagok mejam.  Harei phun tabiak bingu brei luk pabak phan piah mbuan pagam baoh. 

Bruk buh khak yaok sa dit sa mbang, buh khak laneng saong khak tong hop, pablak khak ikan. Meyah gaok hajan brei gam pabah phein pala piah plaik njiak khak sre tabiak saong bruk gha.

Tuk baoh tamun praong nde baoh ada ye brei palih baoh piah raong praong. Palih boah di labik dhar praong kajap abih, baoh praong siam, vin oh saluak. Brei papaok baoh meng kadung. Cakak klak dom dhar saong baoh daok labaih. Cakak caduk kak tuk hu 30 hala saong cakak 3-5 hala di gha ka phun lahei piah pacang ruak kik.

Meng 45 harei hadei pagam phan, padeih buh khak saong brei takik pruh ia. Bhian pasang iek radak baoh piah thau baoh tamun mbuan druh. Dahlau druh 2,3 harei  baoh tamun mbau pahe, kanduh kanjik katam saong hu jalan ra-ai vin radak  baoh.

Brei paih baoh tuk hu 47 harei hadei tabiak baoh, baoh sit meda tathak dahlau saong baoh praong tathak suai jang, meyah hun mboh mbau pahe ye brei paik baoh./.