Nữ tu Trần Thị Lý abih drei hu mbaok tame dom bruk sangka iek glang ka hội viên

Yaok harei, nữ tu Trần Thị Lý bo manuac urang bhian iew meng angan anit ranam lac: anai Lý – caik abih tukvak ka duk iek ruak pahla Hy Vọng. Labik cai ka anai mong iek, tuk bahrau peih di labik langiu ban, labik hu rilo urang ruak kan kathaot. Bahrau ini bo 6 thun blaoh. Anai khan lac: Yaok harei, tuk oh ka hu jit, ye hu jaik 100 mbang urang mai iek ruak, taong ruak. Urak ini, kayua jit ruak, labik iek ruak di anai tok taduan 20 urang sa harei, brei taduan dahlau dom urang njauk ruak trak. Camereip, tuk padang duk iek ruak, mikva dalam oh ka thau rilo, min hadei di nan dom urang ruak mai iek ruak dak harei dak rilo jang. Urak ini, duk iek ruak hu 4 bilik taong ruak, 21 meneng iek ruak, bilik vật lý trị liệu, bilik pathram dưỡng sinh, bilik ngak jru, bilik khik piah, pambu jru meng aia harei saong bein phun jru Nam prong labaih 3000m2.

Gaok dom urang njauk ruak trak, oh hu jien padai piah nao taong ruak, anai duah jalan jak ba piah daong ka urang ruak. Dalam lịch ngak bruk, langiu di tuk pasang iek ruak, urang nữ tu - y sĩ haong ilamu dalam bruk ngak lavik thun daok roh duah, ngak tabiak jru saong jeng oh var tukvak nao rivang mikva kan kathaot dalam bhum, tangi sua ka pren yava, alin hadiah brei dom gaok jru biak siam ka prein yava… Amuk Nguyễn Thị Hoàng (55 thun, daok di ấp Giòng Sao, xã Tân Phú Trung) brei thau, njauk ruak talang, nan ye amuk bhian mai pak ini piah taong ruak. Amuk mboh biak bui sambai saong chreih chai tuk taom gaok haong dom sơ: “Bruk abih hatai iek glang saong ndom puac bingi pang di anai Lý jeng yau dom anai karei di pak ini ngak ka dahlak mboh bui hatian”.

Meng ilamu dalam bruk ngak công đoàn, anai Lý hu jeng urang dalam Mặt trận negar tuk hu panuac ieu daa tame. Tuk camereip lac ngak bruk ka Mặt trận Negar Phường 11, Quận Bình Thạnh; lavik nao, anai hu ba tame ngak dalam Mặt trận Negar Việt Nam TPHCM. Anai Trần Thị Lý dahlau daih lac Ủy viên Ban Chấp hành Kapul urang kamei Việt Nam (tukvak 2012 - 2017). Dom mbang jak ba, bruk pakacah di Mặt trận negar, Kapul urang kamei hu anai Lý ieu daa dom nữ tu peih ngak labik cộng đoàn saong anai jeng caik hatai piah ba tame dom mục vụ di drei.

Lac sa nữ tu, anai tuk halei jeng saneng lac ngak habar piah patagok ka urang kamei, abih di nyu lac dom adei sa-ai suan tangin blat takai dalam rai diuk, dom urang hu rai diuk oh patuah jamo, kan kandah. Saneng mboh yau nan, blaoh anai Lý peih ngak dom danak dak ngak pahla. Anai daong ka dom adei sa-ai kamei kathaot mesre phun jien piah blei pandap panda piah duah jalan ngak mbang duah jien. Dom uranaih bac naih jioy, daok dalam baoh sang kan kathaot, mbuan si klaak bac meteh dhi, ye anai brei pok jien bac, alin brei tapuk siphau, khan ao. Tal tuk dom adei bac tamat, ye anai suh sah ka bruk duah bruk ngak, duah labik ngak ka nyu laghaih piah yaih khan, ba tame ngak. 

Dalam tuk TPHCM saong dom tỉnh gah Ðông Nam bộ tamuh jit ruak meng blaoh, piah payua pandap, njam patam baoh karoh tal labik brei daok karei, daong ka pandap panda kaya nong daok lahik yaom, anai hu nao tal dom sang bein di Củ Chi piah blei njam patam baoh karaoh, pandap panda kaya mbang payua tame ka mikva.

Amuk Nguyễn Thị Trang, Akaok kapul urang kamei xã Tân Phú Trung khan lac, dom thun tapa, nữ tu Trần Thị Lý langiu di bruk iek ruak, taong ruak ngak  pahla, daok abih drei hu mbaok tame dom bruk sangka iek glang ka hội viên, bhap bani dalam xã yau, daong brei pandap Tết, jak ba urang rik daong piah brei pok jien bac ka dom anek saih kathaot bac da-a naih jioy, daong jien blei bảo hiểm y tế ka urang ruak kan kathaot, urang oh hu hộ khẩu di labik daok, daong ka urang kamei kathaot dalam xã mesre phun jien cakrok patagok kinh tế…

Meng dom rik daong praong dalam bruk Mặt trận, sangka iek glang bol bhap rahra, anai Lý hadah mbaok meta hu pok brei giải thưởng Prong gun pataom bangsa ban raya Hồ Chí Minh thun 2020, hu pok meyaom dalam danak dak“Dom kareih camin gandi gandang min biak prong”./.

Urang lang: Jasi – 27/12