Urang thaot binguk Nguyễn Thành Trung

Ong Nguyễn Thành Trung pambuak saong bruk padang baoh sang uranam meng di thun 2017. Dalam sa mbang nao duah thaot binguk di xã Đạ M’ri, huyện Đạ Huoai, tỉnh Lâm Đồng mboh urang amaik ruak thần kinh meruai raong dua anek sit dalam baoh sang tauk tôn tayah tayac. Salih ka bruk thaot binguk labik gheih mekre, ong thaot mek dom anek manuac rambah rambeip dalam baoh sang sit sot tapen jalan. Anit ka raidiuk di 3 anek maik sang K’Tôi, ong ba dom blah thaot nan tagok mạng xã hội piah duah urang daong klah rabha. Dom urang ngak pahala gam gam payua panuac mai likau rik daong, oh ka tal sa bulan bo 60 trieu đồng  hu payua tal ong piah daong ngak sang uranam. Tal urak ini hu 3 thun blaoh, dak tui gauk 32 baoh sang anit ranam karei hu ong jak ba rik jien tame padang ngak alin ka urang kathaot di dom tỉnh Cà Mau, Đồng Nai, Ninh Thuận, Bình Thuận, Đắk Lắk saong Lâm Đồng kuhria tui jien lac jaik  2 tỷ đồng.

Thun 2017, ong Lê Trung Thảo, daok di palei Đ’Lây, xã Nam Ka, huyện Lắk, tỉnh Đắk Lắk lac urang taduan hu baoh sang birau, kayua ong Nguyễn Thành Trung padang ngak. Ong Thảo biak druat druai tuk oh daok dalam baoh sang tayah tayac dalam rilo thun tapa: “ Sang dahlak biak thau dhar phol wa Trung saong dom urang ngak hahala sangka daong padang baoh sang ka dahlak. Dahlak caong lac rilo urang yau dahlak hu daong yau ini piah raidiuk dak harei dak tani tanat.”

Dreih yau nan, puac thun 2019, sang sa-ai Hoàng Chí Trung daok di palei 8, xã Lộc Nam, huyện Bảo Lâm, tỉnh Lâm Đồng jeng patuah taduan hu boah sang birau meng urang thaot Nguyễn Thành Trung padang ngak alin brei. Sa-ai Trung khan lac, dahlau diah ngak gru pato bac pakat 1 pato hợp đồng,  ong muk dua gah daok atah, raidiuk daok rilo kan kandah yau nan ye diuk pasang sa-ai brei paah sang daok. Thun 2019, ruak baoh hatai di sa-ai nyu trak jang, sang njuak mesre labaih 200 trieu dong tagok ban raya HCM iek ruak. Kayua prein yawa oh hu khang kajap nan ye sang bac brei padeih pato, yaok janih jien, jien jru, jien iek ruak tok pambak tame jien bilan pato di diuk. Taduan hu baoh sang birau kayua wa Trung jak ba dom urang ngak pahala rik daong padang ngak brei sa-ai Trung biak druat druai:“ Dahlak ruak kik nan ye raidiuk biak kan kandah, jeng oh thau tal tuk halei meng padang hu baoh sang birau ka diuk anek daok. Patuah hu wa Trung saong dom urang ngak pahala anit ranam rik jien tame daong brei ka dahlak hu sa baoh sang birau. Sang dahlak biak uan tabuan. Hu sang daok ini diuk pasang dahlak kham yam tapa ruak kik, ngak mbang patagok dalam raidiuk.” 

Umo 67 thun, salih ka bruk padeih padai, diuk rai bui sambai saong anek taco, urang thaot binguk Nguyễn Thành Trung daok palih ruah ka drei bruk takre ngak pahala daong urang kathaot. Meng jamriak thaot, ong oh lac thaot veik dom hagait gheih mekre di alam dunya saong  raidiuk bo ong daok hu khik veik dom raidiuk kan kandah anagok dom jalan nao tapa.

  “Mboh urang kan kandah, dahlak bhain nao tal labik dauh thau iek daong ka urang hu ha-oh. Atau hu dom urang bo dahlak mboh lac 5 tal 7 thun tra urang jeng oh yam tapa truh kan kathaot hu ye dahlak ba angan tabiak brei thau. Hu urang mboh dahlak brei thau cambaic ye rik jien daong jip, hu dom baoh sang dahlak likau dalam 3 harei hu meng 5 tal 60 triệu đồng. Hu tuk birau ba angan tagok mboh hu urang daong brei baoh sang. Kayua urang jia dahlak tuk jao jien ka dahlak oh lahik sa đồng halei jien di urang. Urang payua mai ka dahlak 50 trieu dong  ye 50 trieu đồng nan daong ka urang kan abih. Jalan sahaneng di dahlak  jang yau tuk ngak bruk saong karja palei dahlak jeng ndem lac juai ngak lahik sa đồng halei di urang kathaot”.

Oh lac kham merat tagok mạng xã hội jak ba dom urang ngak pahala rik daong, ong Trung daok jak ba gauk gar, ayut sahabat rik prein, rik drap ar piah ngak hu rilo baoh sang anit ranam alin ka urang kathaot. Dom bruk ngak hu makna di ong hu daong ka rilo baoh sang kathaot dak harei dak tani tanat raidiuk./.

Urang lang: Ái Nghiêm - 28/12/2020