Rilo urang dam dara halain hatain hu mbaok tame pacang caga jit 

Sa-ai Lê Huỳnh Diệu Hiền, Bí thư Chi đoàn khu phố 1 brei thau, akaok bilan 6, tuk jit Covid-19 tamuh tabiak, 17 urang đoàn dam dara dalam khu phố ba gauk tame dom bruk pacang jit. Karja ba tabiak dom asal kadha, Đoàn phường Hòa Thạnh ba trun, urang đoàn dam dara khu phố taduan bruk blaoh parabha gauk ngak. Urang Đoàn dam dara khu phố 1 hu mbaok di jaik abih dom bruk, meng jak ba bhap bini oh tabiak truh sang, tacei ba di dom labik mek mẫu dut iek, klauk vaccine tal bruk pajeng ba pandap mbang tame dom labik pacang veik, labik brei daok karei.

Labik njauk biai di khu phố 1 lac hu biak rilo sang trọ, dalam nan rilo meng lac urang ngak. Piah oh caik brei kurang dom menuac urang hu daong, dom dam dara khu phố 1 nao gam haong dom anai, dom cei tổ dân phố piah pasang iek. Jeng tapa bruk ini, dom dam dara hu thau cambaih dom menuac kan kandah piah duah labik daong brei.

Bhap bini di dom labik dahlau daih njauk pacang veik yau jalan Nghiêm Toản haong hẻm 52 Thoại Ngọc Hầu jeng oh var hu labik pablei pandap 0 đồng hu padang tagok dalam labik pacang veik, duh ka bhap bini dalam luac 14 harei pacang veik. Ini lac sa dalam dom labik pablei pandap 0 đồng camereip abih kayua urang đoàn dam dara padang tabiak di quận Tân Phú. Gah likuk dom labik pablei pandap nan, lac dom urang ao hijao kham merat biak rilo piah yaok harei jeng hu brah, njam patam, baoh menuk ada daong ka rahra. Sa-ai Diệu Hiền khan lac: “Dom harei camereip, nao mai rilo dalam blah khan ao khik caga rup pandiak pa-uh, kol dahlak jeng abih prein. Min maong tapa dom urang daok di labik pacang jit, dom y bác sĩ daok harei melam khang drei daong taong ruak ka urang njauk Covid-19, drei haong dom ayut sahabat pachreih gauk kham merat mbang menyum, khik prein yava piah daong palei pacang jit”.

Tui Bí thư Chi đoàn khu phố 5 Trần Ngọc Khanh, chi đoàn hu 11 urang đoàn daok hu mbaok tame dom bruk pacang caga jit. Meng bruk ngak di drei, dom urang đoàn dui pachreih hu rilo anek saih daok mai padeih hè, dam dara bahrau ngak salah nghĩa vụ quân sự ba gauk tame pacang caga jit.

Jeng dalam labaih 1 bilan tapa, Đặng Thành Quốc (ấp 4, xã Hiệp Phước, huyện Nhà Bè), anek saih tal 12 Sang bac THPT Long Thới, haong dom urang đoàn dalam palei likau amaik ame brei daok veik di Sang ilamu xã. Quốc likau tame kapul ba akaok nao dahlau di chi đoàn ấp 4. Yaok harei, mon 7 mesup Quốc haong dom ayut hu mbaok di labik trun pandap piah tame paok, blaoh pajeng tal tangin bhap bini di dom labik pacang veik, dom sang kan kandah dalam palei. Dalam mbang tabung glaong klauk vaccine, Quốc hu mbaok tame kapul daong bruk di dom labik klauk, khik iek bilai di dom labik pacang veik. 

Bí thư Chi đoàn ấp 4, xã Hiệp Phước - Trần Thị Thúy Hằng brei thau, meng akaok bilan 6 tal ini, urang đoàn, dam dara ấp 4 hu mbaok tame rilo bruk, lac: daong nhập liệu bruk mek mẫu bhap bini, tacei ba jalan di dom labik klauk vaccine, khik iek di dom labik pacang veik... Dom ayut daok hu mbaok peih ngak danak dak ATM brah brei saoh, siêu thị 2K, sruh radaih 0 đồng, daong alin hadiah labaih 1.560 paok pandap brei ka rahra daok dalam dom labik brei daok karei, menuac pablei vé số kan kandah.  

Đặng Thành Quốc khan lac: “Drei mboh dom harei hu mbaok tame pacang jit lac dom harei biak hu makna tuk drei mboh drei hu rik daong hasit prein yava ka bhap bini. Drei jeng bac hu rilo ilamu meng bruk halan hatian saong meng dom adei sa-ai daok harei harei mesruh pacang jit piah khik caga ban raya di kol drei”./.

Urang lang: Jasi -20/9