Đha nuôr lâng pr’zơc da dêr!

Coh pr’ăt tr’mông xooc đâu, zâp bêl xa nul cha gâr chèo dưr đơơr, loom ma nưih cơnh bơơn rach chô lâng zr’lụ vêêl đong Bắc Bộ - đhị vêy mái đình ma muuc, ch’nang đac, tơơm zri lâng bâc ha dum bhui har ra hô đh’riêng pr’hat. Tơợ đanh, chèo căh muy năc bh’rợ pa căh coh sân khấu ty, năc dzợ đh’riêng p’rá coh loom đhộ. Coh zâp n’juông pr’hat, ting bhr’ươr n’năc năc đoo râu bhui har, râu hay chơớ, năc loom chăp kiêng vêêl đong, loom cr’er mơ pang lâng đợ xa nay ma mông âng đha nuôr.

N’đhơ t’ngay c’xêê lươt z’lâh, đợ bhr’ươr chèo công dzợ ăt liêm chr’năp, công dzợ bhrợ ha der loom căh năl mơ lang tu râu liêm pr’hay pa bhlâng la lay âng đoo. Coh pr’hat xa nul chủ nhật t’ngay đâu, đha nuôr lâng pr’zơc đh’rưah xơợng muy bơr n’juông chèo đhị pr’đơc “ĐỢ BHR’ƯƠR CHÈO CHR’VA TING C’MOO C’XÊÊ”.

Chèo ty vêy cơnh mă ma mông liêm mâng tu coh zâp n’juông pr’hat, xa nul n’jưl ta luôn dưr n’leh pr’dưr pr’dzoọng đha nuôr Việt Nam – loom liêm, zay bhrợ têng công pa bhlâng bhui har. Năc tơợ pr’ăt tr’mông n’năc, chèo âi lươt moot ooy loom ma nưih muy cơnh căh bhr’nêy đhị bâc lang ma nưih.

N’đhơ t’ngay c’xêê vêy tr’xăl, đợ bhr’ươr chèo ty công dzợ bơơn zư đơc liêm lâng năc dzợ ăt chr’va coh sân khấu t’ngay đâu cơnh muy râu p’têêt acoon ma nưih rach chô lâng tu tơơm, cơnh lâng apêê chr’năp pr’hay lang ahay âng ma nưih Việt

N’đhơ pr’ăt tr’mông nâu câi xooc tr’xăl ting t’ngay, n’đhang đợ n’juông chèo công dzợ ăt nhâm coh loom ngai chăp kiêng nghệ thuật ty đanh. Coh zâp bhr’ươr n’năc căh muy vêy tr’coó xa nul, năc dzợ vêy r’vai a ô vêêl đong, vêy cr’noọ hay âng văn hóa lâng râu liêm pr’hay âng ma nưih Việt bơơn zư đơc đhị bâc lang nghệ nhân, diễn viên lâng ma nưih chăp kiêng chèo.

Bâc n’juông pr’hat n’năc âi z’lâh c’moo c’xêê đoọng t’ngay đâu công dzợ chr’va liêm, cơnh p’too moon zâp ngai ahêê p’xoọng chăp kiêng đợ chr’năp văn hóa ty đanh âng k’tiêc k’ruung.