Jat hơ̆, 6 nă cau pơrlòng geh jơnau pơrlòng lơh geh khà điềm jơnhoa ngan rlau jơh neh geh jờng rơ. Cau pơrlòng Tạ Tuấn Anh tus bơh ƀòn dờng Hồ Chí Minh neh lơh geh khà 1, khà 2 gơwèt mờ cau pơrlòng Nguyễn Hương tus bơh càr Dăk Nông, khà 3 geh jàu ai cau pơrlòng Lê Đức Mạnh, tus bơh càr Dăk Lăk in mờ khà pơn jờng gơwèt mờ ală cau pơrlòng: Phan Hồng Phong (càr Quảng Trị), Hồ Hoàng Minh Thắng (càr Kon Tum) mờ Mai Hoàng Phát (ƀòn dờng Hồ Chí Minh).

Jat mpồl ai điềm pơrlòng, broă sền sơwì bơta niam bơkah bơh kơphê dê tàm dơ̆ pơrlòng jat ală jơnau sồr pa bơh Ală  mpồl kơphê bơkah pơnrơ- SCA dê ai neh lơh geh ờ dồ ết kal ke mờ bơta lòng ai ală cau pơrlòng tus bal dơ̆ pơrlòng nam do in. Mơya, ală cau pơrlòng neh jak ngan sơr lèt gan mờ lơh geh khà điềm jơnhoa ngan jat khà điềm Ală lơgar dê. Bơta do pơn jat tai đơs nền mpồl coh kơphê Việt Nam tŭ do ngai sơlơ bơtàu tơnguh broă lơh ờs mờng.