Dơ̆ ràng tơlik “Nam nhai ờ hềt jŏ- Gia Lai- Kon Tum tơnơ̆ nam 1975” geh bơyai lơh tàm Ƀlàng dờng Đại Đoàn Kết, ƀòn dờng Pleiku, ràng tơlik 150 nơm rùp kwơ bè rài kis làng bol Gia Lai- Kon Tum dê tàm ală nam sơn rờp tơnơ̆ ngai tơngklàs. Ală rùp hin ngan ngồn, niam ngan bè rài kis pah ngai, bơsram sră, lơh broă... cih yal nùs nhơm kơ̆ dơn sơr lèt gan kal ke bơh làng bol he dê tơnơ̆ ngai tơngklàs.

Tàm Hìu prap gàr phan kwơ yau càr Gia Lai, dơ̆ ràng tơlik mìng dùl tơngume “Gia Lai 50 nam bơt bơtàu mờ bơtàu tơnguh” yal tơngĭt 3 tơngume tờm: bơta niam bơnĕ niam chài Gia Lai; Gia Lai tàm rài tam lơh tơngklàs jơi bơtiàn; 50 nam bơt bơtàu mờ bơtàu tơnguh. Ràng tơlik cih yal bơhiàn dờng màng mờ ală cồng nha lơh geh lơh sa, niam chài, mpồl bơtiàn, lơngăp lơngai, sền gàr Dà lơgar bơh càr dê, mơkung đơs nền bơta pin dờn tàm bơta đơng lam bơh Đảng dê. Pơn jat hơ̆, là dơ̆ ràng tơlik “50 nam jơnau cih, đơs crih tam ya càr Gia Lai” ràng tơlik 80 pang wăc sềr rùp, cau cùp rùp pơn rơ jak bal mờ 120 broă lơh kơlôi sơnơng bè jơnau cih jơnau, đơs crih tam ya bơh yau. Ală broă lơh ràng tơlik pờ mpồng bơh tŭ do tus ngai 4/05.