Dơi ndâk ƀư bah năm 1928 ta nkual ƀon têh Buôn Ma Thuột, n’gor Dak Lak, Di tích Lịch sử Ngih dak Đình Lạc Giao lah jay đình geh nău uĕh văn hóa nuĭh Yuăn rnôk tât ndâk njêng nău kan ta Buôn Ma Thuột, Dak Lak. Aơ lah ntŭk ƀư âk nău khlay lịch sử khlay bah n’gor Dak Lak lvang 1930-1945, lah ntŭk mbơh Ủy ban Quân quản Thị xã Buôn Ma Thuột tâm lơ 18/3/1975.

Ăp nar lễ, Di tích Lịch sử Ngih dak Đình Lạc Giao, ta nkual ƀon têh Buôn Ma Thuột, n’gor Dak lak lŏ răm m’ak nuih luh lăp hăn uănh. Ăp nuĭh tât mpoh su nhang ta bàn thờ, che Đỗ Văn Vệ, Chánh tế ta Di tích lịch sử Đình Lạc Giao nkoch, ndrel đah mbah nsơr ăp Kđăch Hùng, tâm đình hôm mbah nsơr Khai quốc Công thần Đào Duy Tư n’hanh che Phan Hộ, nuĭh geh soan ƀư ndâk njêng ƀon Lạc Giao. Nkoch bah nuĭh ƀon lan ntŭk aơ.

 Đình aơ bah rnôk wa Phan Hộ hao pơng ndâk njêng  ta aơ. Jêh nĕ lĕ rngôch nuĭh ƀon lan tât ta aơ dăn uĕh lăng, ƀư sa săk geh ăp nău kan. Ăp năm ta đình ƀư 4 lễ, geh tế xuân, tế thu, giỗ tổ n’hanh nkah gĭt ăp tahen Nam tiến. Gâp hăn ndrel đah ƀon bah jêt tât aƀaơ. Nuĭh nô tơm gâp tă lah chánh tế ta aơ, gâp nthoi mpôl jêng chánh tế tât aƀaơ dơi geh 20 năm.

Tĭng ăp sam ƀŭt sam tra lịch sử, tâm ăp năm 1920, che Phan Hộ n’hanh ăp oh nô bah nơm bâh ƀon Đại Cát, xă Ninh Phụng, nkuăl Ninh Hòa, n’gor Khánh Hòa lĕ hăn nkual neh Ban Mê Thuột-jêng lah nkual ƀon têh Buôn Ma Thuột nar aơ, ƀư sa tăch rgâl, njêng ƀon n’hanh ndâk ƀư jêng Đình Lạc Giao. Bôk năp Đình dơi ndâk ƀư bah ja ngâr nkar, tât năm 1932 ri ndâk ƀư nâp đah gạch, ntưm ngói chăng n’hanh dơi Kđrăch Bảo Đại n’hao an Công thần Đào Duy Từ jêng Thần hoàng. Tâm Cách mạng khay 8 năm 1945, Đình Lạc Giao lah ntŭk rgum rƀŭn n’hanh mbơh bah Ủy ban Cách mạng Lâm thời thị xã Buôn Ma Thuột. Lơn lah, tâm lơ 18/3/1975, ta aơ lĕ ƀư mbơh Ủy ban Quân quản Thị xã Buôn Ma Thuột yor Đại tá Y Blôk Êban ƀư kruanh. Năm 1990, Đình Lạc Giao dơi dăp di tích lịch sử gưl ngih dak lăp n’hanh dơi nkra tay tĭng trong ƀư nâm ơm.

Wa Nguyễn Văn Bảy, Groi ban mât uănh ăp nău ƀư văn hóa Di tích lịch Đình Lạc Giao, nuĭh lĕ tĭng 1/4 rach năm đah đình aơ an gĭt, bôl tă geh tâm lơh tâm su phah yơn jay Đình hôm e dơi mât njrăng, nkra tay n’hanh nkra nâp nâl, jêng du nău uĕh mpeh nău ntoh bah ăp nuĭh bah nkual bâh dâng hao Tây Nguyên ndâk njêng nău kan.

Rlău ma sĭt ta aơ gay mpoh su nhang ri hôm geh nău kan nkoch mbơh an ăp nuĭh gĭt mpeh Đình. Yor 5 n’gor Tây Nguyên lơn lah knŭng geh Buôn Ma Thuột geh du đình yor nuĭh ƀon lan nkual bah dâng khân pơng hăn khân pơng ndâk njêng nău kan. Aơ lah du nău khlay ma he mô dơi mô tĭng. Rlău ma nău mât uănh đình ri hôm mpla nsơ lịch sử bah đình gay an kônh wa tât ta aơ râng lễ khân pơng wât lơn n’hanh dơi mpla nsơ nău nĕ an kon sau khân pơng.

Di tích lịch sử Đình Lạc Giao ngih wâl têh ta njônh n’glah 4 trong Phan Bộ Châu n’hanh trong Điện Biên Phủ, nkual ƀon têh Buôn Ma Thuột, n’gor Dak Lak. Tĭng wa Lại Đức Đại, Groi Giám đốc N’gâng kan Văn hóa, Thể thao n’hanh Pâl nđaih Dak Lak, Đình aƀaơ yor Bảo tàng Dak Lak mât uănh, lah ntŭk rgum rƀŭn văn hóa huêng phan n’hanh ntŭk hăn uănh nsong geh nău khlay ntĭm nti lịch sử bah n’gor.

Bah nkô̆ nău lịch sử têh n’hanh ăp nkô̆ nău uĕh khlay kơt nĕ ri Đình Lạc Giao dôl lah ntŭk vêh khâl n’hanh ntĭm nti way ơm ơm bah ăp rơh kơn druh ndăm, lah ngoăy tâm âk ntŭk ma năch ăp rơh vêh khâl nkual ƀon têh Buôn Ma Thuột vêh tât Đình Lạc Giao kơt du ntŭk pâl nđaih uănh nsong mpeh nău way ơm, lịch sử n’hanh nău uĕh văn hóa bah nuĭh Việt ta nkual yôk dâng rđŭng Dak Lak.

Rlet rlău bơi 100 năm hôm e ta nkual neh Tây Nguyên, Đình Lạc Giao lĕ nchih âk lvang lịch sử tâm rnôk hun hao bah n’gor Dak Lak, lah ntŭk khlay tâm nău ƀư pâl nđaih văn hóa n’hanh ntĭm nti nău way ơm an nuĭh ƀon lan ta ntŭk, ngăn lah rơh druh ndăm.