Lôch khay wai kro phang, ăp n’gor ta nkual Tây Nguyên hôm ndăn nchrăp njrăng n’gang đah khay mih phŭt đŏng. Ta nkual ƀon têh Buôn Ma Thuột, n’gor Dak Lak, nkual ƀon têh geh dŭt âk n’hâm tơm si lam dak, mpôl kan mât chăm tơm si nkual ƀon têh lơn ma ndăn đah nău kan, mât chăm- sĭt jêng tay hoa viên-pih ndâr n’hanh njrăng n’gang chôt pă tơm si. nuih n’hâm rŏng đah nău kan bah ăp nuĭh công nhân wăr năm n’guh rôn nhôn đah si gle- pih- kao, dôl rgop njêng an nkual  ƀon têh nđĭr uĕh, geh bri tâm nkual ƀon têh n’hanh geh nkual ƀon têh tâm  bri, n’hao rnoh khlay âk si gle rơ̆ jêng ntŭk gŭ rêh n’hanh uĕh măt uănh rsang rnglăy.

Tâm nău nteh máy koh n’ging khuh n’gôr n’hanh âk mpưm ndeh rklư kon nuĭh rsong hăn, 5 công nhân bah Công ty đô thị Dak Lak rgum koh njŭr dêh du tơm si ndru yău ta meng trong Mai Hắc Đế, nkual ƀon têh Buôn Ma Thuột. Ndeh way dŏng koh si ntung gung n’hao prêh 25 mét, ntoch tât dŭt chông yôch gay n’hao 2 hê nuĭh koh tĭng nging si n’hanh njŭr grĕ grĕ ta meng trong. 3 nuĭh bah dâng nkre njrăng uănh tŭp geh nuĭh hăn trong, nkre dăp tĭng n’ging nthan hao kalơ ndeh. Lôch bơi 3 mông, pah kan mbro, công nhân Trần Văn Tuyến ndrel ăp băl kan mhe lôch jêh nău kan koh lŭt glêh tơm prêh 30 mét jŭr hôm 15 mét. Săk luh rhal mbĕ lam săk n’hanh krêp lam mbuh si, nô Tuyến an gĭt:

Nău way ri nău kan bah mpôl hên ri ntoh wăr năm. Yơn bah năp khay mih phŭt ri nău kan âk lơn, ân koh glêh n’ging nthan ăp tơm prêh hưt. Nău kan bah mpôl hên way hao kalơ chông prêh, dŭt hưt klach, jêng nău kan ân way dŭt njrăng di na nê̆, đăp mpăn lơn.

Lah ăp công nhân kơt nô Trần Văn Tuyến wăr năm pah kan tâm ntŭk hưt klach, ân geh n’hâm suan wên dăng n’hanh nău han săk ndrel njrăng uănh di na nê̆, ri ăp nuĭh công nhân ta 4 rmôt hoa viên bah Rmôt mât chăm tơm si, Công ty Cổ phần Môi trường đô thị Dak Lak ăp khay mơ̆ mih găng nar đah ăp rbâng kao, mpâr pih. Ndrel ăp bu ur kan nsum mât chăm mpâr pih meng trong n’hanh mbor trong Đại lộ Võ Nguyên Giáp, yuh Trần Thị Nga an gĭt: du rmôt 20 nuĭh hŏ đăp rôn nhôn du khay ndrong ta njăr trong dja, yơn nău kan nha hôm dŭt âk đŏng. Yơn lah, ntơm bah rơh mih bôk  năp đah aƀaơ 1 pơh, pih rêp hon mor rơ̆ jêng dŭt ngăch, công nhân ân chôk ndê na nê̆  tĭng mbal neh hvi bar pe jât héc-ta:

Kơt aơ, pih tăm bah năm e nơh tât aƀaơ mhe jêng kơt aơ dơm, yor kro phang ngăn. Yơn tât rnôk mih ri pih rêp hon mor rơ̆ jêng păng tâl âk ngăn. Ƀư mbro dơm,yơn pih rêp hon mor âk ngăn yơn pih tăm mô ŭch hao jêng. Lah ƀon  lan ƀư ta mir ri hŏ bu  puh dak si hôm. Yơn aơ  lah ta trong, mô dơi puh dak si. lĕ rngôch ân ƀư jik ma ti dơm.

Buôn Ma Thuột lah ngoăy tâm ăp nkual ƀon têh geh rnoh nkŭm n’hâm tơm si  dŭt âk lam dak, đah nklăp 26 rbăn tơm si, geh tât 17,4m2/nuĭh. Rbâng kao si, mpâr pih ta aơ geh rnoh hvi hang rhiăng héc-ta đŏng n’hanh dơi mât chăm  ndê na nê̆, tơm-kao si dơi koh drŭng uĕh n’hanh jêng rup uĕh, mpơl nău hôr gĭt văn hóa lịch sử bah nkual neh. Ndrel âk nuĭh hăn  jâng tâm hoa viên dăch kêng jay, wa Trần Đức Hoà, phường Tân Thành an lah, tơm si Buôn Ma Thuột lah du  ndơ geh dŏng nsum ma nuĭh đŏng lan geh dŏng đŏng, n’hanh păng saơ mbor tơm si ta nkual ƀon têh he lah dŭt uĕh:

“Nuĭh ƀon lan geh ntŭk tập thể dục, geh ntŭk an kônh wa, ăp mon său pâl rlưn, geh mông nar nđaih săk, rlu rlău lôch sĭt kan lêt rgănh. Gâp hŏ hăn âk ntŭk hôm yơn he ân dơi lah Buôn Ma Thuột lah geh mbor tơm si dŭt uĕh”.

Tĭng dăp rgum tât năm 2030, uănh ngai tât năm 2050 mhe dơi UBND n’gor Dak Lak mbơh, Buôn Ma Thuột mbra dơi pơk hvi rlău 500km2, rđĭl đah 377km2 aƀaơ, nkre rôih tĭng rdâk  njêng nkual ƀon têh nđĭr uĕh, ăp tŏng nău lư n’hanh săk tơm; “tâm bri geh nkual ƀon têh, tâm nkual ƀon têh geh bri”. Wa Nguyễn Trung Hiếu, Kruanh rmôt mât chăm tơm si, Công ty Cổ phần môi trường đô thị Dak Lak an gĭt, nhih pah kan aƀaơ geh rlău 250 nuĭh kan ndrel đah ndơ ntrŭp dŏng, ndeh rklư têh uĕh mhe. Bah meng nê, lơn âk công nhân geh nuih n’hâm rŏng nău kan, jăp gơih kơt nti- rgum nău tă ơm gĭt kan, jêng mbra tŏng nău dơi gay ƀư wat jêh ăp rnoh tât geh nđĭr uĕh bah nkual ƀon têh.

 Lơn âk lah oh nô tiăr nti êng nău blău kan bah he, gay njêng rup uĕh ăp kôp n’hanh uĕh reh. Đah ăp công nhân lăp kan bah kơi, ri way geh ăp công nhân hăr blău ti kan nkre, jŏ tĭng mông nar ri mbra geh têl mpor kloh rsang.

Ntơm bah năm 2011, Buôn Ma Thuột hŏ dơi kơp dơn lah ngoăy tâm 10 nkual ƀon têh nđĭr, dŭt rsăch se Việt Nam. Tât aƀaơ, nkual ƀon têh  tơm me cà phê hŏ hun hao du mbah gung mhe. Nđĭr uĕh bah nkual ƀon têh lơn lam rêng lam hvi, nkrum lam, uĕh reh n’hanh rsang rnglăy, nơm geh ăp công nhân hăr blău ti kan n’hanh lĕ nuih n’hâm ma nău kan.