Bơi 50 năm hŏ rlău,  nău nkah mpeh ăp nar khay tâm lơh tâm su dŭt krit nji gay rklaih luh miền Nam, dơn ngoăy neh dak nha hôm nkah jru tâm bôk rngok bah ăp nuĭh ƀon lan râng tâm lơh tâm su.

Lah ngoăy tâm 5 trong chruh rdôl lơh rklaih luh Sài Gòn, Quân đoàn 3 đah nău dơn kan pit lơh dơi tach ndeh păr Tân Sơn Nhất n’hanh Bộ Tổng Tham mưu – Bôk tơm bah phŭng rlăng. Gay pit mât dơi ăp ntŭk kan khlay dja di tâm nar 30/4 jêng geh nău nkoch, Quân đoàn hŏ geh ăp nău blău joi trong lơh ma  tahen ngăch ngăr n’hanh lĕ n’hâm suan. Trung tướng Nguyễn Quốc Thước, rnôk nê nơh ƀư tham mưu trưởng Quân đoàn 3, nuĭh leo mpôl rdôl lơh tâm Sài Gòn hŏ nkoch ăp nău nkah ndray jêr chuêl nar rklaih luh.

“Tach ndeh păr Tân Sơn Nhất n’hanh Bộ Tổng Tham mưu hŏ dơi rklaih luh lĕ rngôch tâm 11h30. Ndrĭ ntơm bah rnôk 11h tât 11h30 lĕ 5 trong chruh ta Sài Gòn dơi rklaih luh ndrel du tơ̆ da dê. Nău rhơn dŭt têh, lôch nsĭt geh dơi nău đăp mpăn, rklaih luh hôm rnôk nê plơ̆ sĭt tâm nuih n’hâm  mpôl hên dŭt n’hao êng săk, yơn geh du nău, mô geh Wa Hồ. Rnôk mpôl hên nsrôih lơh dơi Mỹ, Wa Hồ hŏ kop jru, Wa an lah: Ăp kônh nsrôih rklaih luh ngăch Sài Gòn gay Wa dơi khâl kônh wa miền Nam ndŭl mham…Ôi nar bah kơi ta Rađio nău ngơi Việt Nam pơk nău mprơ bah Phạm Tuyên “Như có Bác Hồ trong ngày vui đại thắng”, rnôk nê mpôl hên mơ di ngăn nuĭh  n’hâm, Wa Hồ hăn lăp ta aơ hôm, ƀon  lan miền Bắc ma nhạc sỹ hŏ wơt Wa lăp tât mpôl hên hôm, jêng rnôk nê nơh saơ tâm nuih n’hâm n’gơch aih”.

Bơi tât 50 năm hŏ rlet rlau, kơp ntơm nar rklaih miền Nam đăp mpăn neh dak, yơn nau nkah tât nar tahen nơm rƀŏng leo rklaih Sài Gòn hôm kơt mhe ơm tâm nuih n’hâm nŭih tă saơ. Rhơn rnôk râng tâm rmôt nhà báo Việt Nam bôk năp tâm Dinh Độc lập tâm dĭng nar 30/4/1975, nhà báo chiến trường Trần Mai Hưởng, Tổng Giám ơm Thông tấn xã Việt Nam hŏ nkah tay rup nkah ân nau dơi, đah nkô̆ “deh sar bah tahen hăn rklaih hŏ lăp tâm Dinh Độc Lập dĭng nar lơ 30/4/1975” ndrel âk nau nchih nkoch tât nar rklaih đăp mpăn ơm nê. Nhà báo Trần Mai Hưởng mbơh, rnôk ndeh com-măng-ca rdeng rmôt phóng viên lăp bơi tât tâm nkuăl ƀon têh, ăp ntŭk păng bah phung rlăng hôm mpruh ơm, ndeh rdeng phóng viên âk tŏ nde tâm ndeh sar gay ma der ndrak phung rlăng.

Yơn lăp tâm nkuăl ƀon têh lah du nau êng ngăn, ƀon lan rhơn luh bah dih trong vơt dơn phung tahen rklaih đăp mpăn bah nơm:

‘Nŭih ƀon lan rhơn ngăn, pa ưnklâm ndơ ndrel leo dak ngêt ân oh ôh. Du hê kon se nklăp 13-14 năm hao klơ ndeh phóng viên, păng kuăn tâm mpir ndeh ndrel mbung păng ngơi: Rklaih hôm, rklaih hôm. Hôm nŭih ƀon lan bar ding luh tâm trong, ut ngăn tahen, nhŭp ty, gơm rhơn ndrel mprơ. Mprơ ăp nau mprơ kơt lah “Tiến về Hà Nội bah Văn Cao, geh nchih: “Âk ngăn tahen hăn kơt lah dak lêng, âk ngăn tahen tât ta ntŭk aơ”. Nau mprơ nê tâm di ngăn ma rnôk nê nơh. Ăp nŭih bu mprơ nau nê ndrel geh nau ueh ngăn, khân păng ntĭm trong ân hên lăp tât tâm nê”./.