Tâm rơh tâm lơh mprơh Mỹ, xã Cư Pui, nkuâl Krông Bông, lah nkual căn cứ cách mạng, ntŭk gŭ kan bah cán bộ Tỉnh ủy Dak Lak. Nđơn tay nău han dăng kăl e tâm rơh tâm lơh, aƀaơ, Đảng bộ, n’gâng kan ƀon lan xã Cư Pui tâm rnglăp ntrôl rŭch ach o, nsum ti hun hao wăng sa, rdâk njêng ƀon lan nar lơn ma ndrŏng uĕh.  

Ăp rnôk nkah ndray nar rklaih luh miền Nam, dơn ngoăy neh dak, wa Y Nguôm Byă ta buôn Đắk Tuôr, xã Cư Pui, nkuâl Krông Bông, n’gor Dak Lak hôm nkah tay ăp nar khay râng kâp lơh ndŭ Mỹ. Păng nkoch, rơh nê nơh, rmôt du kích bah buôn ta nâm nău rđău đă bah xã đội trưởng Y Ơn Niê hŏ âk tơ̆ ntru lơh, nsrôih mô an phŭng rlăng nhŭp kônh wa “nkual rgum”. Ama Hoa nkoch, bol mih bom, phŭt ndrak, nuĭh ƀon lan buôn Đắk Tuôr nha hôm kơi ntop tuch tăm, kơl an cách mạng.

“Gay rhŏ dŏng an ntŭk tâm lơh tâm su, gay rhŏ dŏng an tahen he bu jê̆ nău kan jê̆ bu kuâng nău kan kuâng mô dơi chuh chŭn, he ân kơl neh dak he. Nkual jru nkual ngai, gĭt lah ƀon lan rnoi mpôl đê̆ yơn mô dơi an roh neh dak”.

Tât nar neh dak neh dơn ngoăy, Đảng bộ, n’gâng kan, ƀon lan ăp rnoi mpôl đê̆ xã Cư Pui ngăch nkra bah tâm lơh tâm su hăch rlâm an tay bah kơi, mbrôn suan tâm rlong pah kan jan sa, tuch tăm mât rong nsrôih rdâk njêng ƀon tơm nar lơn ma hun hao. Ntơm bah sa mô  ăp nđăp mô tŏng, bok n’gut ao nsoh mô geh, nău kan tuch tăm rluk mâl, aƀaơ âk rnăk  tâm xã hŏ nsan hao ƀư geh ndrŏng đah nsĭt geh wăng sa hang rhiăng rkeh prăk ăp năm. Wa YSự Byă ta buôn Khanh, xã Cư Pui, rhơn nđơr nkoch:

“Rnoh geh nău rêh bah kônh wa aƀaơ rđĭl đah ntơm nơh tĭng kơn rgâl geh. Kônh wa aƀaơ  ndăn dŏng trong wăng sa mir ta neh căn cứ he. Geh du đêt rnăk dŏng khoa học kỹ thuật hôm aƀaơ khân păng geh mbơm oi rđĭl đah ntơm nơh”

Xã Cư Pui, nkuâl Krông Bông, n’gor Dak Lak geh 13 thôn, buôn, đah 2.700 rnăk ƀon lan, rlău 14.000 nuĭh, ƀon lan rnoi mpôl đê̆ âk bơi 90%. Tât aƀaơ, xã nkual jru nkual ngai geh điện trong mpoh  ang, ăp nhih nti, nhih dak si, dak bât, trong dak kloh uĕh… hŏ n’hanh dôl nsĭt nău dơi tam. Wa Y Kok M’Drang, Bí thư Đảng ủy xã Cư Pui, an gĭt, ndrel đah nău  mât uănh ntuh kơl bah ngih dak, kônh wa ăp  rnoi mpôl đê̆ ta xã dôl nsum suan du nuih n’hâm rdâk njêng ƀon lan mhe. Xã mbra ntik n’hao nău khlay kan leo lor bah đảng viên rgŏ jă ƀon lan rgâl trong mĭn, trong kan, nkre ndơ̆ rgâl khoa học kỹ thuật tâm nău kan ƀư njêng, hun hao wăng sa.

“Rgum n’hanh rƀŏng trong an ăp oh nô lah đảng viên ân lah nuĭh dâk  leo lor bôk năp  tâm hun hao  wăng sa rêh jêng kon nuĭh. Đah trong rƀŏng “Đảng viên ƀư ƀon lan mbra kơt tĭng”. Ta trong rƀŏng kơt nê̆ ri cán bộ đảng viên rlău ma pah kan rdâk  njêng đảng, rdâk njêng lam trong kan chính trị mpôl hên rƀŏng trong hun hao wăng sa lah n’gâng tơm n’hao têh nău  dơn kan hun hao rnăk wăng sa rnăk gay hun hao công nghiệp mhe, têh uĕh mhe”.

Ntik n’hao nău way ơm cách mạng, bah nkual jru nkual ngai nkual rnoi mpôl đê̆ âk jêr jŏt, xã Cư Pui dôl nsan hao dăng mpeh wăng sa rêh jêng kon nuĭh gay di săk ntơ dăng janh./.